Ko Kona ni Karekea Am Tai Nakoni Buun te Tari Ae Tiaki Kaain te Onimaki?
1. Bukin tera bwa Kristian aika kaain te utu ae a kakaokoro aia Aaro kaaina, tiaki tii ngaiia n iai nanoia ni buokiia buuia ake tiaki kaain te onimaki bwa a na butimwaea te koaua?
1 Iai taan uarongorongo tabeman n am ekaretia aika tiaki kaain te onimaki buuia? Ngkana iai, akea te nanououa bwa taan uarongorongo aikai a tangiriia buuia bwa a na raonia ni kaaina te taromauri ae koaua. Ma tiaki tii ngaiia n tangiriia buuia aika tiaki kaain te onimaki bwa a na butimwaea te koaua. A katotonga te Atua kaain ekaretia ni kabane n tangiriia “aeka n aomata nako bwa a na kamaiuaki, ma ni karekea te atatai ae eti ibukin te koaua.” (1 Tim. 2:4) Tao ti na kanga ni karekea ara tai nakoia buuia taan uarongorongo n ara ekaretia, ake tiaki kaain te onimaki?
2. E na kanga ni kairira te atatai ni buoka buun te tari ae tiaki kaain te onimaki?
2 Te moanibwai, ti riai n iangoi bwaai n aron iangoakia iroun te aomata are tiaki kaain te onimaki. A bati buuia taari aika tiaki kaain te onimaki ae a tangiriia kaain aia utu ao a kataia n riki bwa buu ni mare ao kaaro aika raoiroi. Tao bon iai aia Aaro ae boraoi ma nanoia ae kaokoro ma ngaira. Tao iai aia atatai teutana ibukia Ana Tia Kakoaua Iehova ma tii baika a tuangaki irouia aomata aika akea aia atatai ao aika inanonano. Tabeman a ribaiia buuia ibukini kabanean aia tai n te taromauri are a kamanena ngkoa ibukin aia utu. E na kairira te atatai bwa ti na taetae ma te akoi ao te karinerine nakon te aomata ae tiaki kaain te onimaki ao n totokoa te raraoma n te aro ae riao ngkana ti mena i rarikina.—TaeRab. 16:20-23.
3. Tao tera te anga ae te kabanea n tamaroa ibukin anaakin nanon te aomata ae tiaki kaain te onimaki?
3 Tabeakinaia Aomata: Te anga ae te kabanea n tamaroa ae moamoa riki ibukin anaakin nanoni buun te tari ae tiaki kaain te onimaki nakon te koaua, bon rinanon aroarora ma tiaki mani maroroakinan te Baibara. (1 Bet. 3:1, 2) Te bwai ae kakawaki ni kaineti ma aei boni kaotiotan tabeakinaia aomata. A kona taari aine n te ekaretia n tabeakina te buu te aine ae tiaki kaain te onimaki, ao a kona ni karaoa naba anne taari mwaane nakoia buu mwaane aika tiaki kaain te onimaki. N te aro raa?
4. Ti na kanga ni kaotiota tabeakinaia aomata?
4 Ma ngkana ko tuai ni kaitiboo ma te buu temanna, tao ko kona ni boo ma ngaia imwini marorom ma buuna ae te Kristian. Tai un ngkana e aki bati n nakoraoi aron te buu are tiaki kaain te onimaki ni butimwaeiko. E kona n anaaki nanon te aomata anne bwa e na kan ongora riki irouia Ana Tia Kakoaua Iehova, n ara iraorao nakoina ao n tabeakinana. (IRom 12:20) Tabeman Kristian aika ikawai n te onimaki a kaoa te aomata ane tiaki kaain te onimaki anne ma ana utu bwa a na katairiki ma ngaiia, ibukini kanakoraoan riki te ikikina ao totokoan iango ni kairiribai. A maroroakini baike e anaaki iai nanona, n oneani mwin te maroro ni kaineti ma te onimaki. Imwina riki, ngkana e a namakina tabeakinana riki te aomata ae tiaki kaain te onimaki tao e na nakoraoi maroroakinan te Baibara ma ngaia. Ke e kona ni kariaia kaoana nakon teuana mai buakon ara botaki n noria bwa tera ae e reiakinna buuna, ao riki ngkai e a tia ni kinaia tabeman kaain te ekaretia. E ngae ngkana e tuai tauraoi n reiakina te koaua, ma e kona ni kamoamoaaki ibukini boutokaani buuna ae kaain te onimaki.
5. A na kanga unimwaane ni karekea aia tai ma te aomata ae tiaki kaain te onimaki?
5 A bon riai riki unimwaane ni karekea aia tai ma buuia taari aika tiaki kaain te onimaki ao ni kamatairikiia ni kakaaei aanga ake e na reke iai aia uarongorongo nakoia. E kona te aomata ae tiaki kaain te onimaki ae aki kan ongora n te maroro man te Baibara, n ongora n taeka ni kaungaunga man te Baibara ngkana e mena n te onnaoraki ke e ituaki n aoraki aika kakaiaki. Ngkana a kaaitara ma te kangaanga kaain te utu ae e kakaokoro aia Aaro kaaina ni maten temanna kaain te utu, a kona unimwaane ni kaoa te aomata ae tiaki kaain te onimaki bwa e na mena i rarikia ngkana a anga taeka ni kabebetenano.
6. Baikara bukini karekean ara tai ma buuia taari aika tiaki kaain te onimaki?
6 Iangoa te kimwareirei ae e na rinanona te Kristian n ara ekaretia ngkana e a butimwaea te koaua buuna ao n riki bwa kaaina! Te bwai ane kakukurei anne, e na karekea naba te kimwareirei ae korakora nakon Iehova, anera, ao kaain te ekaretia ake nikiraia. (Ruka 15:7, 10) Ma ngkana e aki butimwaea anne te aomata ae tiaki kaain te onimaki, ti kona ni kimwareirei ngkai e kukurei Iehova n ara kakorakora ae teimatoa, are “e aki tangira kamaunaan temanna ma e tangiriia aomata nako bwa a na rairi nanoia.”—2 Bet. 3:9.
[Kabwarabwaraan n iteraniba 6]
Te anga ae te kabanea n tamaroa ae moamoa riki ibukin anaakin nanoni buun te tari ae tiaki kaain te onimaki nakon te koaua, bon rinanon aroarora ma tiaki mani maroroakinan te Baibara