Uabong te Bong n Ikaungaunga Ibukin te Onimaki
1. Tera kakabwaiaakira man te bwabwaro ibukin te ririki aei?
1 N te aonnaba ae rangi ni buakaka aei ae ana aonnaba Tatan, ao e teimatoa Iehova ni buokiia ana toro. (Ita. 58:11) Te ibuobuoki teuana ae kabongana Iehova ibukini kakorakorakira, bon te bwabwaro ae kakaraoaki ni katoa ririki. Ngkai e a uakaan te bwabwaro ibukin te ririki aei, ti na kanga ni katauraoira ni butimwaea ao n tibwaa nako te rongorongo ibukin te Atua?—TaeRab. 21:5.
2. Baikara baike a riai ni katauraoaki imwain te mwananga?
2 Ngkana ko tuai karaoa anne, karekea am tai ngkai ni karaoa am babaire ibukim ao ibukin am mwakuri ni kareketianti bwa ko aonga ni kaei bongin te bwabwaro aikai. Ko a tia ni bairea te tai ae ko na kabanea ibukini kaean te tabo are e na karaoaki iai te bwabwaro i nanon uabong, bwa ko aonga n roko ao ni karekea am tabo n tekateka imwain ae waaki te botaki? Ti riai ni kauia moan te botaki ibukin ongoraeani baike e a tia ni katauraoi Iehova ibukini kakorakoraan ara onimaki! (Ita. 65:13, 14) A a tauraoi am babaire ibukin te tabo are ko na mena iai ao baom ni mwamwananga?
3. Baikara babaire ake a na buokira ma ara utu bwa ti aonga ni kakabwaiaaki man te botaki?
3 Tera ae na buokiko bwa ko na kakauongo raoi nakon taiani kabwarabwara? Ngkana e angaraoi, moantaai ni matu n tairikini boong ake a na waakinaki iai botaki. Kakauongo raoi nakon te tia kabwarabwara. Nori kiibu ni kabane man te Baibara. Korei baika kakawaki n am boki. E na nakoraoi riki ngkana a uaia n tekateka utu nako, bwa a aonga ni buokiia natiia kaaro bwa a na kakauongo raoi. (TaeRab. 29:15) Tao ko kona ni maroroakin ma am utu baika kakawaki n te botaki, n tairikini boong ake uabong. A kona ni maroroakinaki n tain te Taromauri n Utu reirei aika kakawaki ibukin am utu bwa a na maiuakin, bwa a aonga n teimatoa ni kaungaaki imwin te bwabwaro.
4. Ti na kanga ni buokiia tabemwaang n ara ekaretia bwa a na karekea kaungaakia n aia onimaki?
4 Buokiia Tabemwaang Bwa A na Karekea Kaungaakia: Ti tangiriia tabemwaang bwa a na karekei kaungaakia n aia onimaki. Iai taan uarongorongo aika ikawai riki ke tabemwaang n te ekaretia ake a kainnanoa te ibuobuoki bwa a aonga ni kaea te bwabwaro? Ko tauraoi ni buokiia? (1Ioa. 3:17, 18) A riai unimwaane, ai moarara riki mataniwini kurubu n taraia raoi bwa a karekea te ibuobuoki are a kainnanoia taan uarongorongo akanne.
5. Tera arora n tibwai nako taiani beeba ni kakao ibukin te bwabwaro? (Nora naba te bwaoki n iteraniba 4.)
5 N aron ae kakaraoaki mai mwaina, ti riai n uataboa te mwakuri are e karaoaki tenua te wiki imwain te bwabwaro, ae kaoakia aomata nako bwa a na kaea te botaki. A riai ekaretia nako ni katea tiaia n tibwai beeba ni kakao ni kabutaa te aono anne. A riai n uotaki nakon te bwabwaro nikirani beeba ni kakao ake a aki kabonganai kaain am utu, bwa ko aonga ni manga kamanenai n tain te uarongorongo ae aki baireaki. A na katauraoaki rongorongo riki tabeua ibukin aei n tain te botaki. E riai n anganaki te tia ibuobuoki are e bubutimwaeia aomata, beeba ni kakao ake a aki kabonganai kaain am utu n te aono are e karaoaki iai te bwabwaro. Taiaoka ni kawakina teuana ibukim, bwa ko na manga kainnanoia n te kabanea ni kabwarabwara n te Taabati.
6. Ti na kanga n ikaungaunga i marenara ma tarira ngkana ti bobotaki ma ngaiia?
6 Te Bobotaki ae Kaungaunga: A reke ara tai aika bati n taiani bwabwaro bwa ti na uaia ni kaungaira ni katiteuanaakira n ara botaki n itaritari ni Kristian. (TaiAre. 133:1-3) E aera ko aki ‘kamwaawawa nanom’ ni kawariia taari ake a roko man ekaretia aika kakaokoro? (2Kor. 6:13) Tao ko kona ni kateia bwa tiam kinaakin temanna ae boou ke te utu ae boou ni boong akanne. E angaraoi karaoan aei n tain te katawanou. Mangaia are uota kanam ae bon tau ao amwarake n itamwaomwao ma tabemwaang, n oneani mwin are ko na karekea kanam man te tabo n amwarake ae uakaan ke n amwarake iai. E kona n reke te iraorao ae boou ao ae teimaan ni karaoan aei.
7. Bukin tera bwa ti riai n anga nanora n ibuobuoki n te bwabwaro, ao ti na kanga ni karaoa anne?
7 Ai kaungaakira nanora ni karaoan te mwakuri ae tabu ma raora n taromauri! Ko kona n anga nanom n ibuobuoki ni mwakuri tabeua ke n ibuobuoki n te kaitiaki n am ekaretia? (TaiAre. 110:3) Ngkana akea mwiokoam ibukin te mwakuri teuana, taiaoka ni kawariia te Koraki Ake A Butimwaea te Anganano Ibukin te Ibuobuoki, ni mwakuri ake a kainnanoaki n tain te bwabwaro. E karika te mwakuri ae kakukurei te ibuobuoki ae bati.
8. Tera ae ti riai ni kateia bwa tiara ngkai e a rangi n uakaan te bwabwaro, ao bukin tera?
8 E a rangi n uakaan te bwabwaro ibukin te ririki aei. E kainnanoaki te tai ao te kakorakora ae bati ni karaoani babaire, ao te bwabwaro ae na karekea te ikaungaunga. Katea tiam bwa ko na roko ni boong aikai, ao katauraoiko nakoni baike e a tia ni katauraoi ibukim Iehova ao ana botaki. Motinnanoia bwa ko na kaungaia tabemwaang n ataakin te katei iroum, am itamwaomwao ae kakukurei, ao aroarom ae raoiroi. Ngkoe ma tabemwaang kam kona n namakina ana namakin te aine are e kaea te bwabwaro n te ririki ae nako are e kangai, “I aki kona ni mwaninga namakinan te kakukurei are I karekea!”
[Caption on page 3]
N aron ae kakaraoaki mai mwaina, ti riai n uataboa te mwakuri are e karaoaki tenua te wiki imwain te bwabwaro, ae kaoakia aomata nako bwa a na kaea te botaki
[Caption on page 4]
Ti na Kanga n Tibwaa Nako te Beeba ni Kakao?
Ti riai ni kakimototoa ara maroro bwa ti aonga ni kabutaa ara aono ni kabane. Ti kona n taekina ae kangai: “Mauri. Ti uataboa tibwaakin te beeba ni kakao aio ae karaoaki ni katobibia te aonnaba. I kukurei n anganiko am beeba ni kakao aei. Ko na nora riki kabwarabwaraana i nanon te beeba anne.” E katika te nano te rongorongo ni moan te beeba ni kakao, ngaia are angania kaain te auti n te aro are a na noria. Kakorakorako ni karaoia. Ko kona naba n anga taiani maekatin ngkana e angaraoi, n tibwaakin te beeba ni kakao n te wikeen.
[Caption on page 4]
Motinnanoia bwa ko na kaungaia tabemwaang n ataakin te katei iroum, am itamwaomwao ae kakukurei, ao aroarom ae raoiroi