Ara Maekatin Aika a Karaoaki Ibukin Anaakin Nanoia Aomata Nako
1. A kanga kaain te toro ae kakaonimaki ma ni wanawana ni kakairi iroun te abotoro Bauro?
1 N aron te abotoro Bauro ni kaangaraoi aanga nako n tataekina te rongorongo ae raoiroi n te aro are e na karekeia iai “aomata n aekaia nako,” a kabonganai ara boki ake a boreetiaki kaain te toro ae kakaonimaki ma ni wanawana, ibukin anaakin nanoia aomata aika kakaokoro aroia ao aia onimaki. (1Kor. 9:22, 23) Ai ngaia are ti kona ni kabonganai raoi maekatin aika Te Taua-n-Tantani ao te Awake! ngkana ti teimatoa n iangoia te koraki ake a kantaningaaki bwa a na wareki.
2. E katauraoaki te Awake! ibukin anaakin nanoia antai?
2 Te Awake!: E katauraoaki te maekatin aei ibukini buokaia aomata aika titeboo ma ake e taetae nakoia te abotoro Bauro aika “mwaanen Atenai.” (Mwa. 17:22) Mwaane akanne a aki arona aroia Kristian, ao e uarereke aia atatai n te Baibara. N aron anne, e karaoaki te Awake! ibukia te koraki ake a warekia ma e uarereke ke bon akea aia atatai n te Baibara. A kona n aki atai reirei ni Kristian, a kona n aki onimakina te Aro, ke a kona n aki kakoauaa manenan te reirei n te Baibara. Te boto n reirei ae kakawaki man te Awake! bwa e na kamataata riki nakoia taani warekia, bwa bon iai te Atua ni koaua. Bukin naba katauraoakin te maekatin aei bwa e na karikirakea onimakinan te Baibara iroun te tia warekia, ao ni buokia bwa e na ataia raoi ae a kaokoro Ana Tia Kakoaua Iehova ma kaain Aaro ake tabeua.
3. Antai te koraki ake a kantaningaaki bwa a na wareka Te Taua-n-Tantani?
3 Te Taua-n-Tantani: Te koraki ake a kantaningaaki bwa a na wareka te maekatin ibukia aomata nako, iai irouia karinean te Atua ao te Baibara. Iai aia atatai teutana n te Baibara ma a aki ota raoi n reirei ake iai. Titeboo raoi ngaiia ma te koraki ake e taekinia Bauro ake a “maaka te Atua.” (Mwa. 13:14-16) E moani karaoaki te maekatin ibukin te reirei ae Te Taua-n-Tantani ibukia Ana Tia Kakoaua Iehova. E iangoia Bauro bwa te koraki ake a wareki ana reta, a taneiai ma te Baibara ao iai aia atatai ae eti ibukin te koaua. (1Kor. 1:1, 2) N aron anne, kaongora ake a mena n te maekatin ibukin te reirei, a koreaki ibukia te koraki ake a kaakaei ara bobotaki ao n taneiai ma taeka ake a kakabonganai Taani Kakoaua ao aia iango.
4. E aera bwa ti riai n taneiai ma kanoani maekatin ni kabane ake ti kabonganai n te mwakuri ni minita?
4 E ngae ngkana ti angania aomata maekatin aika mwaiti, ma ti riai ni maroroakina teuana mai buakoni maekatin akanne n ara maroro. Mangaia are kateia bwa tiam ae ko na kataneiako ma kanoani maekatin ni kabane. N te aro anne, ko nang riki bwa te aomata ae mwaatai n taekini baike a na anaaki iai nanoia te koraki ake ko kaitiboo ma ngaiia.