Kawakina Mwiokoam n te Mwakuri ni Minita
1. Tera aron taraan ara mwakuri n uarongorongo irouia angiia aomata n te aonnaba aio?
1 A mwaiti n ana aonnaba Tatan aika a taraa ara mwakuri n uarongorongo bwa te mwakuri n “nanobaba” irouia. (1 Kor. 1:18-21) Ngkana ti aki wanawana raoi n taraa te mwakuri aio n aron ae a iangoia, ao e kona ni karika te bwarannano ao ni kakerikaaka ingaingara n ara mwakuri. (TaeRab. 24:10; Ita. 5:20) Baikara bukina tabeua aika ti riai ni kawakina iai mwiokoara ae te riki bwa Ana Tia Kakoaua Iehova?—Ita. 43:10.
2. Tera bukina ngkai e aranaki te mwakuri ni minita bwa te “mwakuri ae tabu”?
2 Te “Mwakuri ae Tabu”: E taekina te mwakuri ni minita te abotoro Bauro bwa te “mwakuri ae tabu.” (IRom 15:15, 16) E kanga n riki te mwakuri ni minita bwa te “mwakuri ae tabu”? Uataboani karaoan te mwakuri aio e na karikiira bwa ‘raao ni mwakuri ngaira’ ibukin “Teuare Tabu” ae Iehova, ao ni boutokaa katabuan arana. (1 Kor. 3:9; 1 Bet. 1:15) E taraa ara mwakuri n uarongorongo Iehova bwa “te karea ni karaoiroi,” mangaia are e kakawaki te mwakuri ni minita bwa bon iteran naba ara taromauri.—Ebera 13:15.
3. Bukin tera bwa tataekinan te rongorongo ae raoiroi bon te mwioko ae kakawaki?
3 Tataekinan te rongorongo ae raoiroi bon te mwioko ae kakawaki ibukina bwa a karako aika mwiokoaki iai. A kukurei naba anera ni karaoa te mwioko aio ao akea te nanououa bwa a boni karaoia ma nanoia ni koaua. (1 Bet. 1:12) E ngae n anne, e a tia Iehova n rineira ngaira aika ti aki kororaoi aika ‘mwangko taano,’ ibukin te mwioko ae rianako kakawakina aio!—2 Kor. 4:7.
4. Ti na kanga ni kaotia bwa e kakawaki iroura te mwakuri ni minita?
4 Te Bwai ae Moanibwaiaki: Ibukina bwa e rangi ni kakawaki mwiokoara, ti taraa te mwakuri ni minita bwa teuana mai buakoni “bwaai aika kakawaki riki” i nanoni maiura. (IBir. 1:10) Ngaia are ti riai ni bairea raoi ara tai ni katoa wiki n uataboia. E katauraoia raoi imwain te kamataku ao ni kataneia raoi bwa e aonga n rangi ni mwaatai, te tia katangitang ae moanibwaia mwiokoana ibukin ana kamataku n taabo ni kamataku ake e taabangaki ataakina n te aonnaba. Ai arora naba bwa ti riai ni katauraoira raoi imwaini karaoan te mwakuri ni minita, bwa ti aonga n rabakau ni “kabwarabwaraa taekan te koaua n te aro ae eti” ao ni mwakuria karikirakean ‘rabakaura n angareirei.’—2 Tim. 2:15; 4:2.
5. Antai aika a na kukurei n ara mwakuri ni minita?
5 Tai kariaia bwaran nanom n aia kaeka aika aki raraoi angiia aomata. Uringnga bwa iai naba aomata aika bati n ara aono aika a kukurei ni butimwaeira. E ngae n anne, ti bon aki ukera kakukureiaia aomata. Ma ae kakawaki riki bon rotakin Iehova n ara mwakuri korakora ao e na rangi ni kamoamoaa ara kakorakora.—Ita. 52:7.