Nnen Titiraki
◼ Ti na kanga n ataia bwa ti na katikui ara boki irouia aomata ke ti na aki?
Te bwai ae kakawaki ae ti riai n ataia bon nanon te aomata. Ngkana e kaotiota te kan ongora, ti kona ni katikui irouna maekatin aika uoua, te boroutia, te boki, ke booki riki tabeua aika ti kabonganai. E boni koaua aei e ngae ngke ti ataia bwa e aki tau ke bon akea ana mwane ibukini buokan te mwakuri ni katobibia te aonnaba. (Iobi 34:19; TeKao. 22:17) N te itera are teuana, ti aki riai ni katikui ara boki aika rangi ni manena irouia te koraki ake a aki kukurei ni butimwaei ara boki.—Mat. 7:6.
Ti na kanga n ataia bwa e kaota te kan ongora kaain te auti? Ti kona n ataia man norakin nanona ni kani maroro ma ngaira. E kakauongo raoi ngkana ti taetae, e kaekai titiraki, ao e kaota ana iango ni kaineti ma te baere ti maroroakinna. E kaotia bwa e kakawaki irouna Ana Taeka te Atua ngkana e taraa te Baibara ngkana ti warekia. N angiin te tai, e manena riki ngkana ti butiia bwa e na wareka te boki are e anganaki. A riai taan uarongorongo ni bwaina te wanawana bwa a na ataa nanon te aomata. N te katoto, ngkana ti uarongorongo i rarikin te kawai e aki nakoraoi ngkana ti aki iango moa ao ti a anganako naba maekatin, boroutia, ke booki nakoia aomata nako ake a rirarikira. Ngkana ti aki kona n ataa nanon te aomata, e raoiroi riki bwa ti na anganna te beeba ni kakao ke te turaeki.
N aron anne, mwaitini booki ake e anai te tia uarongorongo man te kabwate ni boki, e riai ni boto i aon te mwaiti ae tangiria n ana mwakuri ni minita, ma e aki riai ni boto i aon ana bwaintangira. Bwaintangira akanne bon tiaki boon booki, ma boutokaan iteran nako te mwakuri ni minita ni katobibia te aonnaba. N aki ongeia bwa mwaitira ara karekemwane, ma e kairira ara kakaitau bwa ti na tauraoi n anga ma nanora ni koaua mai buakoni kainnanora ibukini boutokaan te Tautaeka n Uea, ma tiaki man rakan ara mwane. (Mareko 12:41-44; 2Kor. 9:7) E na kauringira naba bwa ti na tii anai booki ake ti kainnanoi bwa e aonga n aki bakataeaki bwaintangira ibukini booki.
[Kabwarabwaraan n iteraniba 2]
A riai taan uarongorongo ni bwaina te wanawana bwa a na ataa nanon te aomata