The Wonders of Creation Reveal God’s Glory
A bati aika kimwareirei n taraakini baike a tia ni karikaki. Ma a karako aika a ataia bwa man taraakini baike a tia ni karikaki, a a kona iai n ataa teutana ana iango ao nanon ara tia Karikiriki ae Kakannato. (IRom 1:20) N taai ake a bwakanako, ao Tawita e reiakina taekan Iehova rinanon Ana Taeka ae kairaki koreana. Ma e “taratarai” naba taiani karikibwai ao e a kaaniaki riki iai ma Ngaia. (TaiAre. 8:3, 4, BG) N te birim ae atunaki n The Wonders of Creation Reveal God’s Glory, ti a buokaki iai ma natira ao aomata ake ti reirei ma ngaiia n te Baibara, bwa ti na neneri raoi tabeua mai buakon ana karikibwai Iehova ao n nori iai aroaron ara tia Karikiriki ae Kakannato, bwa ti aonga ni kaaniaki riki ma ngaia. Imwini matakuakinan te birim aei, nori titiraki aikai ngkana ko kona ni kaekai.
(1) E kanga ni kakorakoraaki am kakaitau nakon Iehova, n raababan ao bairean raoi bwaai ni kabane n te iuniweeti? (Ita. 40:28) (2) Ngkana ti kaania te ran n taraia raoi, tera ae ti kona n reiakinna ibukin te Atua? (TeKao. 14:7) (3) E kanga ni kaotiotaki wanawanan Iehova n raababan te aonnaba ao raroana ma taai? (4) Tera bukini karikan namwakaina? (TaiAre. 89:37) (5) E kanga Iehova ni karikiia aomata bwa a na maiu ni kukurei? (6) Tera te DNA? (TaiAre. 139:16) (7) A kanga ni kaokoro aomata mai buakon ana karikibwai ni kabane Iehova aika n te aonnaba? (KBwaai 1:26) (8) Tera ae ko kariariaa n te waaki ae boou i aon te aba?
Kanoana Riki Tabeua: (9) A kanga n riki taiani kara aika kakaokoro karaia? (10) E kanga n aki rotaki te ran n ana katikitiki te aonnaba ao n roko i taberani kaai? (11) Tera bonganan te ran nakon rabwatara? (12) Aanga katoto ni kaineti ma aroni bwaai ni kabane aika karikaki, ni kaai n ibuobuoki i marenaia. (13) A kanga ni karekea te iraorao i marenaia bwaai ni kabane aika karikaki? (14) Tera te “golden angle,” ao e kanga ni kaotiotaki n te karikibwai?
‘Taratarai Raoi’ Ana Karikibwai Iehova: E kaungaira Iesu bwa ti na “taraiia raoi mannikiba i annang” ao ni ‘karekea reireiara mani kiebu aika rikirake n te tawaana.’ (Mat. 6:26, 28) Ngkana ti karaoa aei, e kona ni kakorakoraaki iai ara onimaki, e karikirakea iroura onimakinan te tia Karikiriki, ao e kakorakoraa ara kakaitau ibukini wanawanan Iehova, mwaakana ni kamaiuia ana aomata ao ana tangira. N oneani mwin are a na anaaki nanora ni baika karaoaki ni baia aomata, ti na karekea ara tai ao ni kakorakoraira n taratarai ana karikibwai Iehova aika kamimi, ao n iaiangoi baike ti reiakin ibukin Atuara.—TaiAre. 19:1.