Uoua te Maibibi ae Uarereke Kanoana

Te anga teuana ae kakawaki ibukini boutokaan te Tautaeka n Uea, bon ara anga bwaintangira ibukin te uarongorongo ni katobibia te aonnaba. Ma tera ae ti na karaoia ngkana e aki tau ara mwane?

N te taina, ao Iesu e nora te aine ae kainnano are e a tia ni mate buuna bwa e kabwakaa uoua te maibibi ae uarereke kanoana n te nne ni mwane n te tembora. E kairaki neiei n tangiran Iehova bwa e na anga “mai buakoni kainnanona . . . ana bwai ni kabane ae booni maiuna.” (Mareko 12:41-44) E kaota aei Iesu bwa moan te kakawaki ana bwaintangira neiei i matan te Atua. A iangoia naba Kristian ake n te moan tienture bwa bon te mwioko ae rine irouia aia anga bwaintangira. A anga are a kona n anga Kristian ake a maiu ni kainnano ao ake a kaubwai naba. E taekinaki iroun te abotoro Bauro aia katoto kaaini Maketonia, bwa e ngae ngke “e bon rangi ni karako aia bwai . . . [ma a] bubutii ao n onnon naba . . . bwa a na kariaiakaki n anga aia bwaintituaraoi.”—2Kor. 8:1-4.

Ma ngkana ti kona n anga tii “uoua te maibibi ae uarereke kanoana,” ti riai n ururingnga ae a kona n riki bwa te mwaiti ae bubura bwaintangira aika uarereke aika bati. E na kukurei te Atua ae Tamara ae akoi are i karawa ngkana ti anga mai nanora, bwa “e tangira ane anga ma kukurein nanona.”—2Kor. 9:7.