Tai Iangoia Bwa Ko Aki Kona ni Kaangaraoa Tabem ae Bati
1. Bukin tera bwa a tabwarabwara tabeman ni kaira te reirei n te Baibara?
1 A tabwarabwara tabeman ni kaira te reirei n te Baibara ibukina bwa e bati tabetabeia. E kainnanoaki te tai ae bati n tabeakinan te aomata ae ko reirei ma ngaia n te Baibara. E kainnanoaki naba te tai ae bati ibukini katauraoan am reirei, kairan te reirei, ao buokan te aomata ae ko reirei ma ngaia bwa e na tokanikai i aon ana kangaanga ni kaineti ma rikirakena n te onimaki. E taekinna te abotoro Bauro bwa e anga maiuna ni buokiia kaain Tetaronike n reiakina taekan Iehova. (1 Tet. 2:7, 8) Ti na kanga ni kaira te reirei n te Baibara, e ngae ngkana e bati tabetabera?
2. E kanga tangiran Iehova n rota arora ni kamanena ara tai?
2 E Kainnanoaki te Tai ae Bati n te Beku Ibukin Iehova: E kakoauaaki bwa e kainnanoaki te tai ae bati n ara beku ibukin Iehova. N te katoto, ti kainnanoa n taai nako te tai ae bati ibukini kaakaeani bobotaki, uataboan te mwakuri ni minita, warekan te Baibara ao te tataro. E kukurei ni kabanea riki ana tai ma buuna te aomata ae e a tia ni mare ae tatabetabe. Ai batira riki kukureira ni “kabongana raoi” ara tai ni beku ibukin Iehova ibukin tangirana. (IEbe. 5:15-17; 1 Ioa. 5:3) Ni kaineti ma are e taekinna Iesu, ao moan te kakawaki n ara beku karekeaia taan rimwini Kristo. (Mat. 28:19, 20) E na buokira iaiangoan te beku aei bwa ti na aki tabwarabwara ni butimwaea te mwioko ae kairan te reirei n te Baibara.
3. Tera arora n tabeakina ae ti reirei ma ngaia n te Baibara, e ngae ngkana e angabuaka ara babaire n te mwakuri ni minita ibukini baika riiriki ni maiura?
3 Ma tera arora ngkana ara mwakuri ni kareketianti, te aoraki ae wenemaan ke mwiokoara n te ekaretia, a kaangabuakaa ara babaire ibukin te mwakuri ni minita? A kaira te reirei n te Baibara rinanon te tareboon ke n reitaki n te kaombiuta tabeman taan uarongorongo aika a mwananga nako n taai tabetai man aia tabo ni mwakuri. A a tia tabeman ake e angabuaka irouia kairan te reirei n te Baibara ibukin aorakia ae wenemaan, ni karaoa aia babaire bwa e na kawariia ni mwengaia te aomata are a reirei ma ngaia. Tabeman a karaoa aia babaire bwa a na mwiokoa te tia uarongorongo ae a onimakinna, bwa e na kaira aia reirei n te Baibara ngkana a tabetabe.
4. Baikara kakabwaia aika kona n reke man uataboan te mwakuri ae kairan te reirei n te Baibara?
4 E karekea te kimwareirei ae bati Bauro ngke e anga ana tai ao korakorana ni buokiia tabemwaang bwa a na reiakina te koaua. (Mwa. 20:35) E a kairaki bwa e na kaitaua Iehova, ngke e iaiangoa uaan ana mwakuri are e karaoia i Tetaronike. (1 Tet. 1:2) E kona n rikirake kimwareireira ao raun nanora n te mwakuri ni minita, ngkana ti aki kariaia tabera ae bati bwa e na tukira man uataboan te mwakuri ae kairan te reirei n te Baibara.