Kabongana Ara Atureti ae Kakawaraki n te Internet n Reiakinia Iai Natim
1. Tera te tia ae uaiakinaki ni kanoan te atu ae “Children” n ara atureti ae kakawaraki n te Internet?
1 E katauraoaki ara atureti ae kakawaraki n te Internet ae jw.org, ibukin anaakin nanoia aomata aika kakaokoro aia ririki. A buokaki ataei aika uarereke ma aia karo ni kaaniaki i marenaia ao ni kaaniaki naba ma Iehova, ni kanoan te atu ae “Children” (nakon te taeka ae Bible Teachings > Children) n ara atureti ae kakawaraki n te Internet. (TuaKau. 6:6, 7) Ko na kanga ni kabongana kanoan te atureti aei n reiakinia iai natim?
2. Ko na kanga n rinea te reirei ae kaineti raoi ma aia ririki natim?
2 Kaangaraoa Am Angareirei: A kakaokoro baika a kainnanoi ataei n tatabemania nako. (1Kor. 13:11) Ko na kanga ngkanne n rinea te reirei ae kaineti raoi ma aia ririki natim? Titirakiniko ni kangai: ‘Tera ae e na anaaki riki iai nanoia natiu? Tera aron otaia iai? Maanra te tai ae a kona iai ni kaatuua aia iango n te reirei anne?’ Ko kona ni maroroakini ma natim aika tenua aia ririki ke i aana riki, karaki aika mena n te atu ae “My Bible Lessons.” A kukurei utu tabeua ni kabonganai karaki man te Baibara ni kanoan te atu ae “Teach Your Children.” Rinanoi naba kanoan ara atureti ae kakawaraki n te Internet aika oti i nano.
3. A na kanga kaaro ni kamanenai raoi karaki ao baika a riai ni mwakuriaki ni kanoan te atu ae “Family Worship Projects”?
3 Family Worship Projects: Boni bwaai ni mwakuri reirei aikai ibukini buokaia atun utu nako bwa a na reirei iai ma natiia. Kotea te bwatin ibukin te download ao wareka kanoan te atu ae “Parents’ Guide” ibukin te reirei teuana ma teuana, n reiakina iai aroni kabonganaani karaki ao reirei aika a na mwakuriaki. Kabonganai taamnei aika a na mwakuriaki n aron iteraniba aika a na karanaki, n reiakinia iai natim aika uarereke. Buokiia natim aika ikawai riki bwa a na katiai reirei aika a na mwakuriaki. A irekereke ma karaki man te Baibara ke te reirei man te Baibara baika a riai ni mwakuriaki n te reirei teuana ma teuana, ngaia are a kona ataei aika kakaokoro aia ririki ni bane n ibuobuoki ni baika a na karaoaki ni kanoan te reirei aei.
4. Tera ae kona n noraki ni kanoan te atu ae “Become Jehovah’s Friend”?
4 Become Jehovah’s Friend: A buokaki kaaro n reireia raoi natiia Ana Taeka te Atua n taian taamnei, anene ao baika a na mwakuriaki ni kanoan te atu aei n ara atureti ae kakawaraki n te Internet. (TuaKau. 31:12) A reiakinaki reirei aika manena n taamnei aika kimototo ao ni kakammwakuri. A kateretereaki kakawakin reirei akanne ni baika a na karaoaki, n aroni kakaaeani baike a tuangaki iai ataei bwa a na kakaaei. Kioina ngkai a aki toki n taatangira te anene ataei ao a buokaki iai n uringi baike a a tia n reiakin, a karinaki ni katoabong n te Internet anenen te Tautaeka n Uea ao anene aika koreaki mwaneweia, riki ibukia ataei.
5. Bukin tera bwa a riai kaaro ni butiia Iehova buokaia ibukin reiakinaia natiia te koaua?
5 Kaaro, e tangiringkami Iehova bwa kam na riki bwa kaaro aika a nakoraoi aromi n reiakinia natimi. Ngaia are butiia bwa e na buokingkami n reiakinia natimi te koaua. (MotiTae. 13:8) Man ana boutoka Iehova, kam kona iai n reiakinia natimi ni ‘kawanawanaia bwa a aonga ni kamaiuaki rinanon onimakinani Kristo Iesu.’—2Tim. 3:15; TaeRab. 4:1-4.