Nnen Titiraki

◼ E riai te tia uarongorongo te aine n rabuna atuna ngkana e toa ma te tia uarongorongo te mwaane, ni kairan te reirei n te Baibara i matan ana mataroa te aomata?

Ngkana e katoatai ni kaira te reirei n te Baibara ae baireaki te tia uarongorongo te aine ao e toa ma te mwaane ae te tia uarongorongoa te Tautaeka n Uea, e riai n rabuna atuna. (1Kor. 11:3-10) E kabwarabwaraaki n Te Taua-n-Tantani ae bwain Turai 15, 2002-E, iteraniba 27 ni kangai: “E a kamani baireaki te waaki n angareirei aei ibukin te aomata are boni ngaia ae e kaira te reirei n te Baibara. E a riki te waaki n angareirei aei bwa iteran ana mwakuri te ekaretia. Ngkana e kaira te aeka n angareirei anne te tia Kakoaua te aine ae e a tia ni bwabetitoaki ao n toa ma te tia Kakoaua te mwaane ae e a tia ni bwabetitoaki, e bon riai n rabuna atuna.” E bon riai ni karaoaki aei, e ngae ngkana e kairaki te reirei n te Baibara ni mwengan te aomata, i matan ana mataroa ke n taabo riki tabeua.

N te itera teuana, ngkana e tuai ni moanaki te reirei n te Baibara i matan ana mataroa te aomata, e riai te tari te aine n aki rabuna atuna ngkana e toa ma te mwaane ae te tia uarongorongoa te Tautaeka n Uea, e ngae ngkana manga okiran te aomata bon tii kaotan aron te reirei n te Baibara ke maroroakinan te kaongora man teuana mai buakoni booki aika katauaki ibukin te reirei. Kioina ngkai e tabe n rikirake teutana imwin teutana kairan te reirei n te Baibara i matan ana mataroa te aomata, a riai taan uarongorongo n iaiangoi baika riiriki ao ni kawanawanaia n iangoa te tai ae a riai n rabuna atuia iai.