Ninikiran te Maekatin—E Rangi ni Manena Ibukini Moanakin te Reirei n te Baibara
1. Bukin tera bwa a a kamani kaungaaki man ana botaki Iehova taan uarongorongo bwa a na kabatiaa ninikiran te maekatin irouia aomata?
1 A bati aomata ake a aki kan reirei ma ngaira n te Baibara ma a kukurei ni wawareki ara maekatin. Mangaia are a a kamani kaungaaki man ana botaki Iehova taan uarongorongo bwa a na kabatiaa ninikiran te maekatin irouia aomata. A aki toki aomata ni bwarua Ana Taeka te Atua, ngkai a katoatai ni wareki ara maekatin. (1 Bet. 2:2) N tokina ao a na kona ni kan ongoraea te baere a warekia, ao ni kairaki iai bwa a na butimwaea te reirei n te Baibara.
2. Ti na kanga ni karikirakea kan ongoraeia te koraki ake ti ninikira aia maekatin?
2 ‘Teboka’ Koraan te Koaua: N oneani mwin are ti na angani kaain te auti te maekatin ao ni kabaitira ni kitanna, kataia ni moana te maroro ma ngaia ao n ikikina ma ngaia. Ko na buokaki n aei n atai aroarona, baike e tatangiri ao ana koaua, are ko kona n taetae iai ma te ataibwai. (TaeRab. 16:23) Katauraoi imwaini kawaraia aomata. Ngkana e angaraoi, katuruturua n te aro ae kimototo te reirei ae kakawaki ao kiibu man te maekatin ake a irekereke ma te reirei anne, bwa ko aonga n teboka koraan te koaua are i nanona. (1 Kor. 3:6) Korea bongin te namwakaina are ko okiriia iai aomata, te boki ae ko katikua irouia, am maroro ao kiibu ake ko maroroakin nakoia.
3. Mwaitira ara tai ae ti riai n okiriia iai te koraki ake ti ninikira aia maekatin?
3 Mwaitira Ara Tai n Okiriia Aomata? Ko riai n okiriia aomata ake ko ninikira aia maekatin, teuana te tai n te namwakaina n angania maekatin aika boou. Ma e ngae n anne ao ko kona n rineia bwa ko na kabatiaa am tai n okioki, ni kaineti ma baika a riiriki nakoim ao te baere a kan ongora iai. N te katoto, ko kona ni manga okira te aomata, teuana ke uoua te wiki imwini katukan te maekatin irouna ao ni kangai nakoina, “I kawariko n te tai aei ao N na aki rangi ni maan, ma I kani kabwarabwarai bwaai tabeua man te maekatin are I katikua iroum.” E na kairaki n aei bwa e na kani wareka te kaongora n te maekatin. Ngkana e a kamani warekia, ko kona n titirakinna ana iango n te kaongora anne ao ni maroroakinna n te aro ae kimototo. Ke ngkana e kukurei ni wawareka ara maekatin, ko kona ni manga okiria ao n anganna te turaeki, te boroutia, ke te boki are e kabonganaaki n te namwakaina anne.
4. N te tai teuana ma teuana, tera ae ti kona ni karaoia bwa ti aonga n ataiia te koraki ake ti ninikira aia maekatin bwa a kan reirei n te Baibara?
4 Tai taningaa kaain te auti bwa e na tuangko ae e na reirei n te Baibara. Biririmoa ni karaoa anne. E ngae ngkana e aki kan reirei ngkoa n te Baibara, ma n te tai teuana ma teuana ko kona ni kaota nakoina te kaongora ae “Titiraki Aika Kaekaaki Man te Baibara” n Te Taua-n-Tantani, ao n noria ngkana e kukurei ni kani maroroakinna ma ngkoe. Tao ko kona ni moana te reirei ma ngaia n te Baibara, n tei i matan ana auti. Ma e ngae n anne, ngkana ko aki kona ni moana te reirei ma ngaia n te Baibara, ko kona n teimatoa n ninikira ana maekatin ni karikirakea kan ongorana.