Karikirakea te Anua ae te Roroko i Aon te Tai

¹ E kakaonimaki Iehova nakon te tai. N te katoto, e angania ana toro ‘te ibuobuoki n te tai are a kainnanoia iai.’ (Ebera 4:16) E angangania naba “kanaia n taamnei n te tai ae riai.” (Mat. 24:45) Ngaia are ti kona ni koaua raoi bwa ‘e na aki baenikai’ n roko bongin unin Iehova. (Aba. 2:3, BG) Ti na kanga ni kakabwaiaaki man aron Iehova ni kakaonimaki nakon te tai! (TaiAre. 70:5) Kioina ngkai aomata ngaira aika ti tabetabe ao ti aki naba kororaoi, e a kona ngkanne n riki bwa ara kangaanga te roroko i aon te tai. Bukin tera bwa ti riai ni karikirakea anuara ae te roroko i aon te tai?

2. Bukin tera bwa e kamoamoaaki Iehova n te roroko i aon te tai?

² E aikoa riki bwa te bwai ae rangi ni kakawaki te roroko i aon te tai ni kabaneani boong aikai, ngkai a a bati aomata aika riki bwa taan tangiria i bon irouia ao taan aki taubaang. (2Tim. 3:1-3) Ngaia are ngkana a roroko i aon te tai Kristian n aia mwakuri, aia boraraoi ao ni bobotaki, a na kona n noria tabemwaang ao ni kamoamoaaki iai Iehova. (2Bet. 2:12) Ti moana ara mwakuri ni kareketianti i aon te tai, ma ti ataia ae ti ririmwi n taai nako nakoni bobotaki aika karaoaki n te ekaretia? Te kakaonimaki n roroko ni bobotaki aika karaoaki n te ekaretia, e kaotaki iai bwa ti kani kakairi iroun Tamara are i karawa ae babairei raoi bwaai ni kabane n te aro ae riai.​—1Kor. 14:33, 40.

3. Bukin tera bwa e kaotiotaki tabeakinaia tabemwaang n rorokora i aon te tai?

³ E kaotaki naba tabeakinaia tabemwaang n te roroko i aon te tai. (IBir. 2:3, 4) N te katoto, a kona n aki katabetabeaki raora n taromauri ngkana ti roroko i aon te tai ni bobotaki aika karaoaki n te ekaretia, n ikotaki naba ma bobotaki ibukin te mwakuri ni minita. N te itera teuana, ngkana ti karikirakea anuara ae te ririmwi ao a na kona n iangoia tabemwaang bwa e kakawaki riki ara tai nakon aia tai. E kaotaki n rorokora i aon te tai bwa ti kona n onimakinaki, ti mwakuri raoi ao ni mwiokoaki aika aroaro ake a kukurei iai aomata aika maeka i rarikira.

4. Ti na kanga ni kanakoraoa arora ngkana ti aki toki n ririmwi?

⁴ Ngkana ko aki toki n ririmwi, iaiangoa bukina ngkai e riiriki anne. Babairea am tai ni karaoan am kaetieti are ko na kona ni kakororaoa iai am mwakuri n taia ae ko na katiai iai. (TeMin. 3:1; IBir. 1:10) Bubutiia Iehova ibukin ana ibuobuoki. (1Ioa. 5:14) Te roroko i aon te tai, bon te anga teuana ni kaotiotan ara kakaitau ibukin tuua aika uoua aika rangi ni kakawaki mai buakon te Tua, ae ko na tangira te Atua ao ko na tangira raom.​—Mat. 22:37-39.