Kakairi n Aia Katoto Burabeti n Aron Tebania
1. E kanga ni beku Tebania bwa te burabeti, ao e kanga n riki bwa te banna ni katoto ibukira ni boong aikai?
1 E bon rangi ni korakora taromauriani Baara i aon Iuta n nukan te kaitiua n tienture B.C.E. E a tibwa tia n tiringaki te Uea ae buakaka are Amon ao ngkai e a tautaeka te teinimwaane ae Iotia bwa te Uea. (2Rong. 33:21–34:1) N te tai anne, ao e a kateirakeaki Tebania iroun Iehova bwa e na tataekina Ana rongorongo. E ngae ngke boni kaain te utu n uea Tebania ma e aki kamamaraa ana rongorongo Iehova ibukini kamaunaaia taani kairiri i aon Iuta. (Teb. 1:1; 3:1-4) N aron naba anne, ti kakorakoraira ni kakairi n aron Tebania n ninikoria ao n aki kariaia ara koraki bwa a na uruana taromaurian Iehova iroura. (Mat. 10:34-37) Tera te rongorongo are e tataekinna Tebania, ao tera mwina?
2. Tera te bae ti riai ni karaoia bwa ti aonga ni karabaaki ni bongin unin Iehova?
2 Ukoukora Iehova: Bon tii Iehova ae kona ni kamaiuia aomata n tatabemania nako ngkana e roko bongin unna. Mangaia are e kaumakiia aomatan Iuta Tebania bwa a na ukoukora Iehova, te raoiroi ao te nimamannei ngkai e reke aia tai. Ai aron naba anne ma ara bong aikai. N aron Tebania, ti kaungaia naba aomata bwa a na ukoukora Iehova, ma ti riai naba ngaira ni karaoa te mwakuri, ni motinnanoia bwa ti na “aki kekerikaaki man touani mwin Iehova.” (Teb. 1:6, BG) Ti bon ukoukora Iehova ngkana ti ukeuke n reirei n ana Taeka ao n tataroa ana kairiri. Ti ukoukora te raoiroi ngkana ti maiuakina te aroaro ni maiu ae riai. Ti ukoukora te nimamannei ngkana ti karikirakea te aroaro ae te aantaeka ao n tauraoi ni butimwaea te kairiri man ana botaki Iehova.
3. Bukin tera bwa ti riai ni kateimatoa te aroaro ae riai n ara mwakuri ni minita?
3 Uaana Aika Raraoi: A kaungaaki tabeman kaain Iuta n ana rongorongo Tebania ibukin te motikitaeka, ao e noraki anne iroun te roro n rikirake are Iotia ngke e a moanna n ukoukora Iehova ngke te teinimwaane ngaia. Imwina, e karaoa te mwakuri ae okoro ae korakora ibukini kamaunaan taromaurian bouannanti man te aba. (2Rong. 34:2-5) Ni boong aikai, e ngae ngke a bwaka tabeua koraan te Tautaeka n Uea i rarikin te kawai, n te tano ae riribwa, ke i buakon aroka aika kateketeke, ma a bwaka tabeua n te tano ae raoiroi ao a karikii uaa. (Mat. 13:18-23) Ti kakoauaa bwa e na teimatoa Iehova ni kakabwaiaa ara kakorakora ngkai ti katabetabeira n tibwatibwaa nako koraan te Tautaeka n Uea.
4. Bukin tera bwa riai n ‘teimatoa ni kantaningaa Iehova’?
4 A namakinna tabeman kaain Iuta bwa akea te bwai ae e kona ni karaoia Iehova. E ngae n anne, e kamatoaa n taekinna Iehova bwa e a kaan ana bong ae kakannato. (Teb. 1:12, 14) E na roko te kamaiu tii nakoia te koraki ake a onimakina Iehova ibukini kamanoaia. (Teb. 3:12, 17) Ngkana ti ‘teimatoa ni kantaningaa Iehova’ ti bia kimwareirei ngkai ti katiteuanaaki ni beku ma raora n taromauria Atuara ae kakannato!—Teb. 3:8, 9.