Kakairi Irouia Burabeti n Aron Naum

¹ E kakoauaaki man uruakin Ninewe n aron are e taetae ni burabetinna Naum, bwa a boni katuuaaeaki aomata ake a ribaa Iehova ao a bon aki kona ni kaitaraa, e ngae naba ngkana e rangi ni kakamaaku aia buaka ni kaitaraa iai. (Naum 1:2, 6) Ti kona ni karekea reireiara ibukin ara mwakuri ni minita ngkana ti kananoa ara iango n ana taetae ni burabeti Naum.

2. Ti na kangaa ni karaoiroa ara rongorongo?

² Anga te Kabebetenano ao te Kantaninga: E moan iangoaki te boki ae Naum bwa bon tii katanoataani kamaunaan Ninewe ae atuni kaawan te aba ae Aturia. (Naum 1:1; 3, 7) Ma e ngae n anne, e riki te katanoata aei bwa te rongorongo ae kakukurei nakoia ana aomata Iehova. E karau nanoia raona n Iutaia Naum ae nanon arana “Kabebetenano” bwa a nang kamaunaaki aia kairiribai! E a manga kamatoaa riki Naum bwa bon “te tabo ni kamaiu ae korakora [Iehova] n te bong ae e kai te nano iai.” (Naum 1:7, BG) Kioina ngkai ti uarongorongo, ti uataboa naba tataekinan te rongorongo ae raoiroi ao ni kaungaia aomata bwa a na ukera Iehova ibukini kamanoaia.​—Naum 1:15.

3. Ti na kangaa ni kakairi iroun Naum ni kamanenai kabotau ao kaikonaki?

³ Kamanenaani Kabotau ao Kaikonaki: E kairaki Naum iroun Iehova bwa e na kabotaua tokin Ninewe ma kamaunaakini kaawan Aikubita ae Thebes (No-amon) are e kataenikaiaki iroun Aturia. (Naum 3:8-10) Ngkai ti tataekina tokin te waaki ae ngkai i aon te aba, ti kona ni katuruturui taetae ni burabeti n te Baibara aika kakoauaa bwa E boni kakoroi bukin ana taeka Iehova man ae bubura ni karokoa te kabanea n uarereke. N te katoto, ngke a ninia Ninewe kaaini Baburon ao Miria n 632 B.C.E., ao e taonako ranin te karaanga are Taikiriti ni bwakan te karau ae korakora, n te aro are e a uruaki iai iteran oon te kaawa ae rangi ni matoatoa. E waekoa ni kamaunaaki Ninewe n aron are taekinna Iehova.​—Naum 1:8; 2:6

4. Ti na kangaa ni kamataata ao ni kaota te bae e nanonaki raoi n te mwakuri ni minita?

⁴ Kamataata ao Kaota te Bae e Nanonaki Raoi: E rangi ni bwarabwara raoi ao n anainano teini baike e korei Naum. A rangi n teretere raoi baika kakawaki ake e korei. (Naum 1:14; 3:1) N aron anne, ti kani kamanenai taetae aika kai ataaki nanoia. (1Kor. 14:9) Ni moani kawaran te aomata ao kamataata raoi nakoina bukini kawarana. Ngkana ko reirei n te Baibara ma tabeman, buokiia bwa a na karikirakea onimakinan Iehova ma ana Taeka ao ni kakaitau ngkai e teretere raoi te rongorongo nakoia.​—IRom 10:14.

5. Tera te karaunano ae reke man ana taetae ni burabeti Naum?

⁵ E onimakina ana taeka Iehova aika kokoro nanoia Naum ike e a kaotaki n te aro ae mataata ni bokin te Baibara are e ingoanaki iai. Ngkai e a uakaan tokin ana waaki Tatan, ti a karekea kabebetean nanora rinanon ana tua aei: “E na aki kauoua teiraken te rawawata.”​—Naum 1:9, NW.