Te Bwai ni Mwakuri ae Boou Ibukini Buokara ni Karaoan Ara Ukeuke

Mirion ma mirion taan uarongorongo ni kabuta te aonnaba aika a tia ni kamanena raoi te Watch Tower Publications Index ni karaoan aia ukeuke. E ngae ngke e rangi ni bwarabwara raoi te boki aei ma e tii tauraoi n taetae aika tii tabeua. Ngaia are, e a katauraoaki te Research Guide for Jehovah’s Witnesses nakon taetae aika 170 mwaitiia. Kaongora aika mwaneweaki n te Research Guide, boni man te ririki 2000 ni karokoa ngkai. E tuai ni boreetiaki te Research Guide nakon taetae nako ake e a tia n reke irouia te Index ma e a tia ni karinaki aei n te Watchtower Library ao te Watchtower ONLINE LIBRARY. E na buokiko te boki aei ni kakaaei kaekaan titiraki man te Baibara, kakaaean am rongorongo ni kaineti ma baika ko tabeaianga iai, ao ibukin am katauraoi ni bobotaki ni Kristian ao ai am reirei n utu.