Buokiia Mataki n Reiakina Iehova
1. E kangaa Iesu ni kaota nanoangaaia mataki?
1 Ai tii tabeua riki te bong ao e nang mate Iesu. Ngke e a kitana Ieriko, a takarua uoman mataki aika taani bubutii ni kangai: “Ko na nanoangaira, te Uea!” E ngae ngke e rangi n tabetabe ana iangoi Iesu ni kataakina ake imwaina, ma e tei ao e weteiia ao ni kanoraabaia. (Mat. 20:29-34) Ti na kangaa ni kakairi n ana nanoanga Iesu ibukia mataki?
2. Ti na kangaa n uarongorongo nakon temanna ae mataki are ti boo ma ngaia n ana tabo te botannaomata?
2 Bwaina te Ibuobuoki: Ngkana ko boo ma ae mataki, tao n ana tabo te botannaomata, kaota aram nakoina ao tauraoi ni buokia. Kioina ngkai e karako kaotiotan te akoi nakoia aekaki akanne, e kona te aomata anne ni mimi n te moantai. Ma e kona n onimakiniko n noran am mwamwannano ao tabeakinana iroum. Ururingnga naba ae e kakaokoro rinanin te mataki, ao e kona n iangoaki bwa itera raa ake a kainnanoaki iai te ibuobuoki. Ngkana ko tia ni buokia, tao ko kona n taekinna nakoina ae ko karaoa naba te angareirei n te Baibara. Wareka nakoina te kibu ae Taian Areru 146:8 ke Itaia 35:5, 6. Ngkana e kona ni wareware n aia boki mataki ae te Braille, tuangnga ngkana e kani karekea katoton aia boki mataki teuana are e na buokia n reiakina riki te Baibara. Ko kona naba ni buokia ni karekei bwanaa aika raweaki n te jw.org. Ngkana iai te burokuraem n ana kaombiuta are e kona n taekin taeka ake iai, e kona naba ni karekei booki ake a kona n anaaki rinanon te RTF (Rich Text Format).—Nora te bwaoki ae “Ngkana Ko Buoka ae Mataki . . .”
3. Ti na kangaa ni kakaaeia mataki n ara aono?
3 Kakaaeia Aika Mataki: E burenibwai noraia aomata aika mataki n tain te uarongorongo man te auti teuana ma teuana, ibukina bwa a maakinia naake a kawaria bwa a aki kinaia. Ngaia are, e riai te kakorakora ni ‘kakaaeaia’ aika mataki ao n uarongorongo nakoia. (Mat. 10:11) Iai raoraom ni mwakuri ke n reirei ae mataki? Biririmoa n taetae nakoina. Ngkana iai n am aono te kuura ibukia mataki, a anga ara boki tabeua ibukia bwa kanoan te tabo n tangoboki iai. Ko ataa temanna ae iai kaain ana utu ae mataki? Iai n am aono botaki ake a anga ibuobuoki ibukia mataki ke taabo ni maeka ma bwaai ake a kainnanoaki ibukia? Kabwarabwaraa nakoni kaain ana utu, te tia bubutimwaeia aomata ke te mataniwi bwa a rangi ni kukurei Ana Tia Kakoaua Iehova ni buokiia mataki ao tauraoi n anga booki ke bwanaa aika raweaki ibukia. Kaota nakoina te berita man te Baibara ae e na waekoa te Atua ni katoka te aoraki ae te mataki n aki toki. Tao ko kona naba ni kaota te birim man jw.org ae atuna “Without It, I Would Feel Lost,” ae kabwarabwaraaki iai aron te mwaane ae mataki are kakabwaiaaki ni kabonganaan aia Baibara mataki. Ngkana ko kamataata bukini kawarana iroum, e kona n reke angam ni karekeia riki aika mataki.
4. Tera reireiara mairoun Janet?
4 E kawara te tabo ae a maeka naba iai mataki, te tari te aine ae mataki ae Janet. E waakina te maroro ma te ataein aine temanna. E taku Janet nakoina: “E kanoraabaia mataki Iesu, are e kaotia iai bwa e na boni karaoia naba nakoia mataki ni kabane.” A kaai n rinanon Te Kaotioti 21:3, 4 ao e kabwarabwaraa Janet bwa e na kakororaoaki nanon te berita aei n Ana Tautaeka n Uea te Atua. E aki kakarongoa te aine arei ao imwina e taku: “I aki ongongo aei iroun temanna ae mataki. A kakoauaa angiina aomata ake aki mataki, bwa a mataki aomata imwin te bwai are a karaoia ke a karaoia aia bakatibu.” E meeri nakon te aine aei ni kaota nakoina aroni karekean te boki ae Ana Reirei te Baibara n te intanete, ao a reirei iai ngkai uoua te tai n te wiki.
5. E ngae ngkana ti aki kona ni katoka te aoraki ae te mataki n aron Iesu, baikara kakabwaia ni kaotan tabeakinaia aika mataki?
5 Ni koauana, ti aki kona ni katoka aorakia aomata ae te mataki n aron ae karaoia Iesu, ma ti kona ni buokiia naake a kamatakiaki nanoia iroun atuan te waaki ae ngkai, n ikotaki naba ma ake a boni mataki bwa a na ataa te koaua man Ana Taeka te Atua. (2Kor. 4:4) E katoka aorakia uoman mwaane Iesu ni uakaan ma Ieriko, ibukina bwa e “korakora nanoangaaia” irouna. (Mat. 20:34) Ngkana ti kaota naba aei nakoia aika mataki, ti kona ni kukurei iai ni buokiia tabeman n reiakina Iehova, ae ngaia are e na katoka te aoraki ae te mataki n aki toki.