Bwanaa Aika Raweaki—Aroni Kabonganaaia
1. Irarikini booki ake a koreaki, tera te bwai ae manena ae iai iroura?
1 A bati aika kani kakabongana te jw.org ni wareki iai taekan te koaua aika eti ao ni kakukurei. (TeMin. 12:10) Ma ko a tia ni kakabonganai bwanaa aika raweaki? E a reke iai te anga n ongoraei rongorongo aika bati man ara atureti n te intanete. Ti kangaa ni kakabwaiaaki ni bwanaa aika raweaki?
2. Ti na kangaa ni kabonganai bwanaa aika raweaki ibukin ara reirei i bon iroura ke ara reirei n utu?
2 Ibukin Ara Reirei i Bon Iroura ke Ara Reirei n Utu: Ti kona ni buokaki ni kabonganai raoi ara tai ngkana ti ongoraei bwanaa aika raweaki aika boto man te Baibara, taiani maekatin ke te boki teuana n ara tai ni mwamwananga ke ni karaoan tabera ni katoabong. (IEbe. 5:15, 16) Ti kona naba ni katamaroa ara taromauri n utu ngkana ti ongoraea te kaongora ae warekaki ao n iriria n ara boki. E ibuobuoki riki kabonganaani bwanaa aika raweaki n ara tai n ukeuke n reirei i bon iroura ngkana ti kani katamaroaa ara wareware ke ngkana ti reiakina te taetae teuana.
3. Antai n ara aono aika kona ni kakabwaiaaki mani bwanaa aika raweaki?
3 Ibukin te Mwakuri ni Minita: A bae ni kan ongoraei bwanaa aika raweaki aomata n ara aono ake a taku bwa a tatabetabe ao e a aki reke aia tai ni wareware. Ke ti kona ni kaitiboo ma aika a kabongana te taetae teuana ao a bae ni kan ongora riki ngkana a ongo rongorongon te Tautaeka n Uea n “oin aia taetae.” (Mwa. 2:6-8) N taabo tabeua ao te ongora e kakawaki n aia katei. N te katoto, n te katei n Hmong ao a riai kaaina ni manga karakina rongorongoia nakoia te roro ake imwina ao a taui raoi rongorongo ake a ongoraei. A bati aika nako mani katein Aberika aika kakaokoro aika a kukurei n reirei mani karaki ake a ongoraei.
4. Baikara titiraki ake ti kona n titirakinira iai ibukini buokaia aomata n ara aono?
4 E na uaana n am aono katangan teuana te bwanaa ae raweaki n oin ana taetae kaain te auti? E kona te bwanaa ae raweaki man te boki n uaana nakon temanna ae ti kanakoa nakoina rinanon te intanete? Ti kona ni karekea man te intanete ao ni kaewea nakon te CD ao n angani kaain te auti ae kan ongora ao tao ni kairia ma katotona ae koreaki? E kona n tauaki mwin te boki, te boroutia, te maekatin ke te turaeki ae kanakoaki rinanon te kaombiuta are ti angan temanna n te mwakuri ni minita. A karaoaki bwanaa aika raweaki ibukira bwa ti na kabonganai n ara ukeuke n reirei i bon iroura ao ibukin naba unikani koraan te koaua ibukin te Tautaeka n Uea.—1Kor. 3:6.