Teimatoa n Tataroa Ana Akoi te Atua

E angania aomata te Atua te bwaintangira ae okoro ae te kona ni maroro ma ngaia ao n taekin aia namakin nakoina rinanon te tataro. E tataro ni kangai te burabeti ae Tawita: “Ngkoe ae te tia Ongo te tataro, a na kawariko aomata n aekaia nako.” (Taian Areru 65:2) Ma ti na kangaa n tataro bwa e aonga n ongoraeaki ara tataro iroun te Atua ao ni kakabwaiaira?

TATARO MAI NANOM AO KANANORINANOKO

Ko na kairaki n am tataro bwa ko na bunra nanom nakon te Atua, bwa ko na taekin am namakin raoi nakoina. (Taian Areru 62:8) A kakawaki iroun Teuare Moan te Mwaaka, tataro aika nako raoi man te nano.

MWANEWEA ARAN TE ATUA N AM TATARO

E ngae ngke a bati nakoan te Atua, ma bon tii teuana arana. “Bon Iehova ngai. Bon aei arau.” (Itaia 42:8) Bon 7,000 tabun mwaitin te ara ae Iehova n te Koroboki ae Tabu. A bati burabeti aika mwanewea aran te Atua ngkana a tataro nakoina. E kangai Aberaam: “Taiaoka Iehova . . . kariaia bwa N na reitaanako au taetaenikawai [nakoim].” (Karikani Bwaai 18:30) Ti riai naba ni kabongana aran te Atua ae Iehova ngkana ti tataro.

KO KONA N TATARO N OIN AM TAETAE

E ota te Atua n ara iango ao n ara namakin, n aki ongeia bwa tera ara taetae. E karauaki nanora n Ana Taeka ae kangai: “E bon aki inanonano te Atua, ma a butimwaeaki irouna aomata nako aika maakua ma ni kakaraoa ae raoiroi, mai buakoia natannaomata nako.”​—Mwakuri 10:34, 35.

Ma ngkana e na kakabwaiaira te Atua, e bati riki ae ti riai ni karaoia nakon tii te tataro. Ni kaongora aika imwina, ti na nenera iai te bae ti riai ni karaoia.