Kamanenai Taamnei n Reiakinia Iai Am Reirei n te Baibara

E anaaki riki nanon te tia mataku ni baike e kona n nori ao e buokaki iai bwa e na ota raoi ao n ururingi baike e reiakin. E kabonganai baika kona n noraki ara tia Reirei ae Moan te Kakannato ae Iehova n angareirei iai i aoni baika kakawaki. (KB 15:5; Ier 18:​1-6) E kabongana naba anne te tia Reirei ae Kakannato ae Iesu. (Mt 18:​2-6; 22:​19-21) Teuana mai buakoni baika kona n noraki ae kakoauaaki bwa e rangi n uaana n ririki aika tibwa nako, bon te taamnei. Ko kamanenai raoi taamnei ngkana ko reirei n te Baibara ma am aomata?

A a tia ni katauraoaki taamnei aika tebwina ake a na buokira ngkana ti angareirei n te boroutia ae Te Rongorongo ae Raoiroi Mairoun te Atua! Taamnei aikai, a bane ni kaineti atuia ma te titiraki teuana mai buakon ake a turu riki n te boroutia. Iai n te boroutia are i aon te intanete te link ibukin te taamnei ae ti kauringaki iai bwa ti na kaotii taamnei aikai. Irarikina, taamnei ake tabeua a kamataatai kaongora n ara boki n reirei aika kakaokoro ake kanoan ara Bwai ni Mwakuri Ibukin te Angareirei.

Iai te reirei teuana man te Baibara ae tao e kangaanga iai otan te aomata ae ko reirei ma ngaia? Ke e kekeiaki ngkai te aomata anne i aan te kataaki teuana? Kakaaea te taamnei n jw.org® ao n Ana Kanakobwanaa JW® bwa e aonga n reke buokana iai. Ko kona ni mataku iai ma ngaia ao imwina kam maroroakinna.

A kaotinakoaki ni katoa namwakaina taamnei aika boou. Ngkana ko matakuakin, iangoa arom ni kamanenai ngkana ko reireinia tabemwaang.