MAIURA NI KRISTIAN
A Mwakuri Korakora ni Buokira
A kaotiota te tangira are a anga iai boni ngaiia mataniwi aika mwamwananga ma buuia nakoia naake a buokiia. Bon titeboo aroia ma ngaira ae iai naba baika a boni kainnanoi ao n tabetai a namakina te kua, te bwarannano, ao te tabeaianga. (Iak 5:17) Ma e ngae n anne, ni katoa wiki a kaatuui aia iango ni kaungaia tariia ma mwaaneia n te ekaretia are a kawaria. Ni koauana, a bon “tau ni kabatiaaki karineaia” mataniwi aika mwamwananga.—1Ti 5:17.
Ngke e bairea mwanangana te abotoro Bauro nako Rom bwa e na ‘angania te bwaintituaraoi mairoun te Atua’ kaain te ekaretia ikanne, ao e ingainga n ‘ikaungaunga’ ma ngaiia. (Ro 1:11, 12) Ko a tia n iangoa arom ni kaungaa am mataniwi ae mwamwananga ma buuna, ngkana arona bwa iai buuna?
MATAKU N TE TAAMNEI AE MAIUN TE MATANIWI AE MWAMWANANGA N TAABO AIKA TIONAKO, AO IMWINA KAEKAI TITIRAKI AIKAI:
N aaro raa ake a kaotiota iai te nano ni kan anga bon ngaiia mataniwi aika mwamwananga ma buuia ibukin te ekaretia?
Ko kangaa ni kakabwaiaaki man aia mwakuri?
Ti na kangaa ni kaungaia?