E na Kangaa n Ongoraeaki Am Tataro?
Iehova ae te Atua bon te “tia Ongo te tataro.” (Taian Areru 65:2) Ti kona n taetae nakoina n taabo nako ao n taai nako, ni kabaibati ke ni karaurau. E tangirira Iehova bwa ti na weteia bwa “Tamara,” ao boni ngaia Tamara ae te kabanea n raoiroi. (Mataio 6:9) E reireinira ma te tangira Iehova arora n tataro, ao arora ae e na ongoraea iai ara tataro.
TATARO NAKON IEHOVA AE TE ATUA N ARAN IESU
“Ngkana kam butiia te Tama te bwai teuana n arau, ao ane e na anganingkami.”—Ioane 16:23.
E oti raoi n ana taeka Iesu aikai bwa e tangirira Iehova bwa ti na tataro nakoina, tiaki rinanoni bouannanti, taian santo, anera, ke aomata aika a tia ni mate, ma n aran Iesu Kristo. Ngkana ti tataro nakon te Atua n aran Iesu, ti kaotia iai bwa ti ataa kakawakin te baere karaoia Iesu ibukira. E taku Iesu: “Akea ae e na nakon te Tama ma tii ane e rirou.”—Ioane 14:6.
TATARO MAI NANOM
“Bunrii nanomi i matana.”—Taian Areru 62:8.
Ngkana ti tataro nakon Iehova, ti riai n taetae n aron ae ti kakaraoia nakon te karo ae tatangira. N oneani mwin ae ti na wareki man te boki ke n taekina te bae kamatenikunaaki, ti riai n taetae nakoina ma te karinerine ao mai nanora.
TATARO N TE ARO AE BORAOI MA NANON TE ATUA
“Ngkana ti bubutiia te bwai teuana ae boraoi ma nanona ao e bon ongo iroura.”—1 Ioane 5:14.
E tuangira Iehova ae te Atua n te Baibara, te bae e na karaoia ibukira ao te bae e tangiria bwa ti na karaoia ibukina. Ngkana e na butimwaeaki ara tataro iroun te Atua, ti riai n tataro n aron ae “boraoi ma nanona.” Ngkana ti na karaoa anne, ti riai n reiakina te Baibara bwa ti aonga ni kinaa raoi. Ni karaoan anne, e na boni kukurei n ara tataro.
TERA AE TI KONA N TATARO IBUKINA?
Tataro Ibukini Baika Ko Kainnanoi. Ti kona n tataro nakon te Atua ibukini baika ti kainnanoi ni maiura n aroni—kanara, kunnikaira, ao mwengara. Ti kona naba n tataroa te wanawana ibukini karaoan ara motinnano aika raraoi ao te korakora bwa ti na nanomwaaka i aani kataaki. Ti kona naba n tataro ibukin ara onimaki, kabwaraan ara bure, ao ai ana ibuobuoki te Atua.—Ruka 11:3, 4, 13; Iakobo 1:5, 17.
Tataro Ibukia Tabemwaang. A kukurei kaaro ngkana a tabeakinia i marenaia natiia. E tangiriia naba Iehova natina aika n te aonnaba bwa a na tabeakinia i marenaia. E kakawaki bwa ti na tataro ibukia buura, ara utu, natira, ao raoraora. E korea aei te tia rimwini Kristo ae Iakobo: “Tataro ibukia raomi n tatabemaningkami nako.”—Iakobo 5:16.
Kaota Am Kakaitau. E taekina ae kangai te Baibara ibukin ara tia Karikiriki: “E anganingkami te karau mai karawa ao boong ni mari, ao e kanuaingkami n te amwarake ma ni kaon nanomi n te kimwareirei.” (Mwakuri 14:17) Ngkana ti iangoi bwaai kabane aika e karaoi te Atua ibukira, ti na kairaki iai bwa ti na tataro ni kaitaua. Ti bon riai naba ni kaitaua te Atua n arora n ongeaba irouna.—I-Korote 3:15.
BWAINA TE TAOTAONAKINNANO AO TATATARO
N tabetai, ti kona n namakina te nanokawaki ngkana e aki waekoa ni kaekaaki ara tataro aika nako mai nanora. Ma nanon anne bwa e aki tabeakinira te Atua? Tiaki ngaia anne! Iangoi katoto tabeua ae kaotaki iai bwa ti riai n tatataro.
E taekina ae kangai Steve, are taekinaki n te moani kaongora: “Ngke arona bwa I aki teimatoa n tataro, e na kaman tia ni bua maiuu.” Tera ae karika te bitaki? E moana ana reirei n te Baibara ao n reiakina riain te tatataro ao te teimatoa ni karaoia. E taku Steve: “I tataro nakon te Atua ni kaitaua ibukin ana boutoka ae tatangira ae I karekea mairouia raoraou. I a kukurei riki ngkai nakon are mai mwaina.”
Tera aron Jenny are namakinna bwa e aki tau n ongoraeaki ana tataro iroun te Atua? E taku: “Ngke I a rangi n rawawata, ao I a tataro nakon te Atua bwa e na buokai n ataa bukin namakinan ae akea uaau.” E kangaa ni buokaki neiei n aei? “Te maroro ma te Atua e buokai n iangoai n aron ana iango, ao n ataia ae e ngae ngke e kabuakakaai nanou, ma e bon aki Ngaia kabuakakaai. E buokai naba bwa N na aki kabwaraa nanou ma N na teimatoa n tataro.” Tera mwina? “E buokai te tataro n iangoa Iehova bwa te Atua, te Karo, ao te Rao ni koaua, ae e tatangira, ao e tauraoi ni buokai, tii ngkana I teimatoa ni karaoa te bae e tangiria.”
E taku Isabel n noran natina bwa e kukurei ni maiuna n aki ongea mwaukuna, “I a kakoauaa bwa boni ngaia kaekaan au tataro”
Iangoa naba ana katoto Isabel. Ngke e bikoukou ao a a tuangnga ana taokita bwa e na mwauku natina. E rangi n rawawata iai. Iai naba ake a tuangnga bwa e na kabwakaa natina. “Irou N nangi mate ibukin rawawatan nanou aei.” Tera are e karaoia neiei? E taku: “I a tataro man tataro ibukin ana boutoka te Atua.” Imwina riki, e a bungia natina te mwaane ae mwauku, ae arana Gerard. E namakinna Isabel bwa e ongoraeaki ana tataro iroun te Atua? Eng! N te aro raa? E taku Isabel: “N noran natiu ae ai 14 ngkai ana ririki, bwa e kukurei ni maiuna n aki ongea mwaukuna, I a kakoauaa bwa boni ngaia kaekaan au tataro, ao bon te kakabwaia ae rianako mairoun Iehova ae te Atua.”
A buokira taeka aika nako man te nano aikai bwa ti na iangoi ana taeka te tia areru aika: “Ko na ongo aia bubutii aomata aika nimamannei, ngkoe ae Iehova. Ko na kamatoai nanoia ao ko na mutiakinia.” (Taian Areru 10:17) Ai raoiroira ngkanne bwa ti na teimatoa n tataro nakon te Atua!
Iai n te Baibara ana tataro Iesu aika bati. Teuana ae rangi n ataaki bon are e reireinia taan rimwina. Tera reireiara mai iai?