1921—Tebubua Te Ririki N Nako

“TERA te mwakuri ae ti ingainga ni kani karaoia n te ririki aei?” E tabeka te titiraki anne te Taua-n-Tantani ae bwain Tianuare 1, 1921, nakoia Taan Reirei n te Baibara aika ingainga nanoia. E kaekaa te titiraki anne ni mwanewea Itaia 61:1, 2, (BG), ike a kauringaki iai mwiokoaia ae te uarongorongo. “E mena Tamnein te Uea ae Iehova i aou; ba E kabirai Iehova, ba N na tataekina te rongorongo ae raoiroi nakoia akana nanorinano . . . n tua bongin akoan te aba iroun Iehova, ma ana bong Atuara ni kareke kai.”

TAAN UARONGONGO AIKA NINIKORIA

Ngkana a na kakororaoa mwiokoaia Taan Reirei n te Baibara, a kainnanoa te ninikoria. A riai n tataekina “te rongorongo ae raoiroi” nakoia akana nanorinano, ao “te bong ni kareke kai” nakoia akana buakaka.

E uarongorongo ma te ninikoria n aki ongea te kakaaitara Brother J. H. Hoskin, ae maeka i Kanata. Ni moan 1921, e a kaitiboo ma te mitinare n te Aro ae te Methodist. E moana te maroro Brother Hoskin ni kangai: “Ti riai ni maroro i aon te Baibara ma te rau, ao e ngae ngkana a kaokoro ara iango i aoni bwaai tabeua ma ti boni kona ni motika ara maroro ma te rau n akea te un.” Ma e aki riki anne. E taku Brother Hoskin: “Ti a tibwa maroro i nanon tabeua te miniti ngke e a tii orea naba te mataroa te mitinare aei, ao I a taku bwa e nang bwaka kiraatin te mataroa.”

E takarua te mitinare aei ni kangai: “E aera bwa ko aki nako ni maroro ma aomata aika tiaki Kristian?” E aki otinako ana taeka Brother Hoskin, ma ngke e taonnako ao e taku i nanona, ‘Irou, I a bon tibwa tia n taetae ma te aomata ae tiaki te Kristian!’

Ngke e anga ana kabwarabwara te mitinare aei n te bong are imwina, e reitinako ana kabuakaka ibukin Brother Hoskin. E ururing ni kangai Brother Hoskin: “E kauringia ana nanai ibukiu, ao e tuangia ae boni ngai te aomata ae te kabanea ni bwanga ni kewe ae roko n te kaawa anne, ao I bon riai ni katiiaki.” Ma e aki tukaki n aei Brother Hoskin ao e teimatoa n uarongorongo nakoia aomata aika bati. E taku: “I rangi n unga n au mwakuri n uarongorongo ikanne. A taekina naba aei tabeman, ‘I ataia ae bon ana aomata te Atua ngkoe!’ Ao a tuangai bwa a kan ibuobuoki ngkana iai baika I kainnanoi.”

TE REIREI I BON IROUM AO N TE UTU

Ibukini buokaia aomata bwa a na ota riki n te Baibara, a katoatai Taan Reirei n te Baibara ni boreeti titiraki man te Baibara ao kaekaaia i nanon te maekatin, ae ti a aranna ngkai bwa te Taratara! Iai titiraki man te Baibara ibukia ataei ake a kona ni maroroakini kaaro ma natiia. A “tabeki titiraki aikai nakoia natiia ao imwina a buokiia ni kakaaei kaekaaia n te Baibara.” Titiraki tabeua n aron ae “Iraua booki i nanon te Baibara?” a boni kaotii reirei aika bebete i nanon te Baibara. Titiraki ake tabeua riki n aron ae “A riai Kristian ni koaua ni kantaningaia bwa a na bwainikirinaki?” e katauraoia rooro n rikirake bwa a na riki bwa taan uarongorongo aika ninikoria.

Iai naba titiraki man te Baibara ao kaekaaia ibukia naake e bati riki aia atatai n te Baibara. A kona n reke kaekaan titiraki akanne n te moani boki mai buakoni booki ae Studies in the Scriptures. A bati taani wareware aika kakabwaiaaki n titiraki aika katauraoaki aikai, ma imwina ao e a katanoataaki bwa e nang katokaki boreetiakina. E aera ngkai e riki te bitaki anne?

TE BOKI AE BOOU!

Te boki ae The Harp of God

Te beeba ae uarereke ae kaotii iteraniba ake a na warekaki

Beeba aika uarereke aika kanoana titiraki

A noria taani kairiri bwa a riai naake a boou aika reirei n te Baibara n reiakina te koaua n te aro ae baireaki raoi. Ibukin anne, e a kaotinakoaki te boki ae The Harp of God n Nobembwa 1921. Naake a kan ongora ake a butimwaea te boki anne, a karinaki naba n te waaki n reirei are a boni kona ni karaoia i boni irouia. Te waaki n reirei anne, e buokiia aomata n reiakina “ana kantaninga te Atua are e na angania aomata te maiu are e aki toki.” E kangaa aroni karaoana?

Ngkana e butimwaea te boki anne te aomata, e karekea naba te beeba ae uarereke ae tuangaki iai iteraniba ake e riai ni wareki. N te wiki are imwina, e a manga karekea riki te beeba ae uarereke aika karinanaki iai titiraki aika boto i aon te baere e a tia ni warekia. N tokin te beeba anne, e a manga kaotaki iai iteraniba ake e na wareki ibukin te wiki are imwina.

E kakarekea te beeba ane uarereke anne ni katoa wiki i nanon 12 te wiki te aomata ae reirei n te Baibara, man te ekaretia ae uakaan. N angiin te tai, a kanakoaki beeba akanne mairouia kaain te ekaretia ake a a kara, ke naake a aki kona n uarongorongo n te auti teuana ma teuana. N te katoto, e ururing Anna K. Gardner mai Millvale Pennsylvania i U.S.A. ao e taku: “Ngke e otinako te boki ae The Harp of God, e a reke ana tai tariu ae Thayle ae aki kona n nakonako ni karaoa ae bati riki. E kakanakoi beeba akana uarereke akanne ae kanoana taian titiraki.” Ngkana e a roko n tokina te waaki n reirei anne, e a kawaraki te aomata anne iroun temanna man te ekaretia, ibukini buokana n reiakina ae bati riki man te Baibara.

Thayle Gardner n te kaintekateka ae kokokaki

TE MWAKURI AE E NA KARAOAKI

N tokin te ririki, e a kanakoa te reta Brother J. F. Rutherford nakon taian ekaretia ni kabane. E taekinna bwa “te uarongorongo ibukin te Tautaeka n Uea n te ririki aei, e a raababanako riki ao n uaana riki nakon are karaoaki n ririki ake mai mwaina.” E reitia ni kangai: “E bati riki te mwakuri ae riai ni karaoaki. Kaungaia aomata bwa a na raonira ni karaoa te mwakuri ae tamaroa aei.” E oti raoi bwa a karaoa te bwai ane a tuangaki anne Taan Reirei n te Baibara. N te ririki 1922, a ninikoria ni kabatiaa tataekinan te Tautaeka n Uea, n aron ae a tuai ni kakaraoia mai mwaina.

Raao Aika Ninikoria

A kaotiota te itangitangiri n tari Taan Reirei n te Baibara n aroia n ibuobuoki i marenaia. Bon raao aika ninikoria aika “bungiaki ibukin tain te rawawata,” n aron ae e na kaotaki n te rongorongo ae imwina.—TaeRab. 17:17.

N te Kauabong, Mei 31, 1921, e a karabuutinaki te mwaane ae bwatabwata n te kaawa ae Tulsa, i Oklahoma i U.S.A., i aani bukinana n iowawa nakon te aine ae mainaina. Imwin anne, e raka i aon 1,000 mwaane aika mainaina aika boo n un ni kaaitaraia mwaane tabeman aika bwatabwata. E rokoroko te un anne n te aono ae Greenwood, ike a maeka iai angia aomata aika bwatabwata. E raka i aon 1,400 mwenga ao bitineti ake a niniaki ao ni kabuekaki. E ribootinaki bwa a mate 36, ma e katautauaki bwa e nakon 300 aika mate.

E taekina te bwai ae riki Brother Richard J. Hill, ae temanna i buakoia Taan Reirei n te Baibara ae bwatabwata, ae e mena i Greenwood: “N te tairiki are riki iai te mangao anne, ti karaoa ara taromauri n aron are ti taneiai iai. Ngke e a bwara, ti a ongongo te kakatii i nukan te kaawa. E reitinako te kakatii ni karokoa te nukanibong.” N ingabongin te Katenibong, Tun 1, e a korakora riki te kangaanga. “A roko tabeman n tuangira bwa ngkana ti kani kamanoira, ti riai n nakon ana kateitei te tautaeka teuana ae mena n te kaawa.” Ngaia are e a birinako Brother Hill ma buuna ao natina aika niman nakon te tabo anne. E nakon 3,000 mwaitiia mwaane ao aine aika bwatabwata ake a mena ikanne ao ni kamanoaki n te taanga ni buaka are e kanakoaki man te tautaeka bwa e na katoka te kangaanga.

N te tai anne, e a karaoa ana motinnano ae kaota te ninikoria Brother Arthur Claus, ae mainaina. “Ngke I ongo taekaia te koraki ni kamangao ake a mena i Greenwood n nini auti ao ni kabueki, I a baireia bwa N na nako n nora raoraou ae Brother Hill.”

E kamanena Arthur Claus te boki ae The Harp of God n reireinia iai ataei aika 14

Ngke e a roko n ana auti Brother Hill, e a kaitiboo ma kaain rarikina ae mainaina ae taua te katii. Kaain rarikin Brother Hill anne ae bon raoraona naba, e iangoa Arthur bwa temanna i buakoia taani kamangaongao. E takarua ni kangai: “E aera ngkai ko roko ikai?”

E ururing ni kangai Arthur: “Ngke arona bwa I aki anganna te kaeka ae e na rau nanona iai, e na bae n tia ni katiiai. I karaua nanona n tuangnga ae ngai temanna raoraon Brother Hill, ao I a bon tia n roroko n ana auti mai mwaina n taai aika bati.” E reke angaia Arthur ao kaain rarikin Brother Hill anne ni kamanoa ana auti mairouia taani kamangao.

Imwina, e a ataia Arthur ae e mena Brother Hill ma ana utu n ana kateitei te tautaeka n te kaawa. E tuangaki Arthur ae a aki kona ni kitana te tabo anne aomata aika bwatabwata ngkana e aki tiaaina te mataniwi n te taanga ni buaka ae General Barrett. E taku Arthur: “E rangi ni kangaanga kawaran te mataniwi anne. Ma ngke I a tuangnga au babaire, e titiraki ni kangai: ‘Ko kona n tararuaiia kaain te utu aei ao n tabeakini baike a kainnanoi?’ I kaeka ma te kukurei ni kangai: ‘Eng.’”

E waekoa Arthur ni kaea te tabo are a mena iai, ma te beeba are e a tia n tiainaaki. E kaota te beeba anne nakon te tautia ao e taku te tautia aei: “E bon tiainaaki am beeba aei iroun te mataniwi! Ko ataia ae ai tibwa ngkoe n te bong aei ae ko roko bwa ko na anaiia kaain te tabo aei?” Imwina ao a a kuneia Brother Hill ma ana utu. A bane n toka n ana kaa Arthur ao a a nakoni mwengana.

E taraia raoi Brother Claus bwa a na aki reke n te kangaanga Brother Hill ma ana utu. A rangi n anaaki nanoia tabeman ibukin ninikorian Brother Claus ao ana itangitangiri n tari. E taku Arthur: “E a tatangiriia riki kaain Ana Tia Kakoaua Iehova kaain rarikin Brother Hill are e ibuobuoki ni kamanoa ana auti. Ao a bati aika kan ongora taekan te Tautaeka n Uea ibukina bwa a noria ae akea te kakaokoroaki iroura n te reeti, bwa titeboo ngaira ni kabane i matan te Atua ngkai ti a tia ni katabui maiura.”