ARONI KATOKANI BUTANAKON TE RIRIBAI

4 | Tokanikai i Aon te Riribai Man Ana Ibuobuoki te Atua

Ana Reirei te Baibara:

“Uaan te taamnei bon te tangira, te kimwareirei, te rau, te taotaonakinnano, te akoi, te raoiroi, te onimaki, te nimamannei te taubaang”—I-KARATIA 5:22, 23.

Ae Nanonaki n te Kibu Anne:

E kona n toki butanakon te riribai man ana ibuobuoki te Atua. E kona te taamnei ae raoiroi ni karikirakei i nanora aroaro aika akea ngkoa iroura. Ngaia are n oneani mwin are ti na kataia n tokanikai i aon te riribai i bon iroura, ti wanawana ngkana ti onimakina ana ibuobuoki te Atua. Ni karaoan anne, e kona n titeboo ara namakin ma te abotoro Bauro are korea ae kangai: “I konai bwaai ni kabane ni karaoi iroun teuare anganai te korakora.” (I-Biribi 4:13) Eng, ti a kona iai ni kangai: “E roko buokau mairoun Iehova.”—Taian Areru 121:2.

Te Bwai ae Ko Kona ni Karaoia:

“E a tia ni bita aroarou Iehova man te aomata ae iowawa nakon ae rau.”—WALDO

Tataro ma nanom nakon Iehova ao butiia te taamnei ae raoiroi. (Ruka 11:13) Butiia bwa e na buokiko ni kaotiotii aroarona ni maium. Reiakina te bwai ae taekinaki n te Baibara ibukin aroaro aika a na katoka te riribai, n aron te tangira, te rau, te taotaonakinnano, ao te taubaang. Ukeri aanga ake ko na karikirakei iai aroaro akanne ni maium. Ao iraorao ma naake a kataia naba ni karikirakei aroaro akanne. A kona nakanne ni ‘kaungako nakon te tangira ao mwakuri aika raraoi.’—Ebera 10:24; kabwarabwara mai nano.

Te Rongorongo ae Koaua—WALDO

E Tokanikai i Aon te Riribai ae Iowawa

E aitara ma te maiu ae kangaanga Waldo i nanon rikirakena. E taku: “I aki toki n irekereke ma te un i nanon te kawai ma taani kaboonakoi taian drug . . . N te taina, a a kabooa temanna te mwaane ae te tia tiritiri bwa e na tiringai, kaain te kaeng ake aiau. E bon ewarai teuana te tai, ma e a reke naba angau ni birinako.”

E aki kukurei Waldo ngke e a reirei buuna n te Baibara ma Ana Tia Kakoaua Iehova. E taku: “I riribaiia taani Kakoaua, ao a bati taai ake I takarua n taekin taeka aika kamatauninga nakoia, ma a kaekaai ma te rau n taai nako.”

Imwin tabeua te tai, e a reirei n te Baibara Waldo. E taku: “E boni kangaanga maiuakinani baike I reiakin. I kakoaua ae N na bon aki kona n tokanikai i aon anuau ae te iowawa.” Ma e ngae n anne, e boni karaoi bitaki aika bubura mani baike e reiakin n te Baibara.

E taku Waldo: “N te taina, e a tuangai Alejandro, are e reirei ma ngai n te Baibara bwa N na wareka I-Karatia 5:22, 23. . . . E kabwarabwaraa Alejandro nakoiu bwa e aki boto karikirakean aroaro akanne i aoni korakorau, ma e boto i aon te taamnei ae raoiroi are mairoun te Atua. A boni bitaki au iango man te koaua anne!”

Ibukina bwa e onimakina ana ibuobuokite Atua Waldo, e a kona ni katoka butanakon te riribai ni maiuna. E taku: “A aki kona ni kakoauaa korakorani bitakini maiuu au koraki ao raoraou rimoa.” E taku riki: “E a tia ni bita aroarou Iehova man te aomata ae iowawa nakon ae rau.”