Kakamaakun te Buaka
A a tia n rangi n rotakibuaka tabeman n te buaka ao te tiritiri. A ataa raoi kakaiakina tautia ao naake tiaki tautia ake a a tia n nora aron te buaka.
TAUTIA
“Ko nori baika kakamaaku aika riki—a tiringaki aomata ke a ikoaki n te aro ae kakaiaki. Ko a bon aki mano iai.”—Gary, Buritan.
“E katiiaki nukau ao ubuu, ao I noriia aika a bati n tiringaki n ikotaki ma ataei ao kaara. E kairiko te buaka bwa ko na aki nanoanga.”—Wilmar, Colombia.
“Ngkana e katiiaki te aomata i matam, ko bon aki kona ni mwaninga taekan anne. E teimatoa n titiku n am iango tatakaruana ao ngirangirana. Ko na bon aki kona ni mwaninga taekana.”—Zafirah, United States.
AOMATA AIKA TIAKI TAUTIA
“I namakinna ae I a aki kona ni manga kukurei. Ko raraomaeakina maium ma ae moamoa riki, ko raraomaeakina maiuia am utu ao raoraom.”—Oleksandra, Ukraine.
“E kakamaaku te tei n te rain ibukin te anai bwauna man te aoa 2:00 a.m. ni karokoa 11:00 p.m., bwa ko aki kona n ataia ngkana ko a tii katiaaki naba.”—Daler, Tajikistan.
“A tiringaki au karo n tain te buaka. I a riki bwa te ataei ae akea ana karo ao akea ae e kona ni kabebeteai ke n tabeakinai.”—Marie, Rwanda.
N aki ongei mwin te buaka aika kakaiaki, ma a boni karekea te raunnano naake a taekinaki i eta. Ao a kakoauaa ae e na waekoa n roko n tokina te buaka ao te tiritiri ni kabane. E na kamatataaki bwa e kangaa n riki anne, n Te Taua-n-Tantani aei mani kabonganaan te Baibara.