Buokiia Aika Reirei n te Baibara Bwa A na Tei Ibukin te Koaua

1-2. (a) Bukin tera ngkai a tabwarabwara tabeman aika reirei n te Baibara n tei ibukin te koaua? (b) Tera ae ti na rinanona n te kaongora aei?

IAI baika tuka rikim bwa temanna Ana Tia Kakoaua Iehova ngkoe? Tao ko maakuia raom ni mwakuri, raoraom ke tao am utu ake a na kakaaitarako. Ke tao ko namakinna bwa ko na bon aki kona ni maiuakin ana kaetieti te Atua. Ngkana anne ae riki, ko na bae n ota irouia naake a reirei n te Baibara aika baenikai naba n tei ibukin te koaua.

² E kakoauaa Iesu ae aeka ni maaku akanne a kai tuka rikirakera n te onimaki. (Mat. 13:​20-22) E aki kabwaraa nanona irouia ake a tabwarabwara n iriria. Ma n oneani mwin anne e reireinia taan rimwina aroia ni buokiia aekaki n aomata aikai (1) n nori kangaanga aika tutuka rikirakeia, (2) ni kakorakoraa tangiran Iehova i nanoia, (3) ni karaoi bitaki ibukini baika a riai ni moanibwai, ao (4) n tokanikai i aon aia kangaanga. Ti na kangaa ni maiuakini baike e tuangia taan rimwina Iesu, ni kabonganaan te boki ae Ko Kona ni Kukurei n Aki Toki! ni buoka iai ae reirei n te Baibara n tei ibukin te koaua?

BUOKA AM REIREI N NORI KANGAANGA AIKA TUTUKA RIKIRAKENA

3. Tera are e tuka Nikotemo man rikina bwa te tia rimwini Iesu?

³ E kaaitara Nikotemo ae te tia kairiri ae kakannato irouia I-Iutaia, ma te kangaanga ae e tutuka rikina bwa te tia rimwin Iesu. Ai tibwa onoua te namwakaina imwini moanakin ana mwakuri ni minita Iesu, ao e a kakoauaa naba Nikotemo ae e tei Iesu ibukin te Atua. (Ioa. 3:​1, 2) Ma e rineia Nikotemo bwa e na karaba ni kaitiboo ma Iesu bwa e ‘maakuia I-Iutaia.’ (Ioa. 7:13; 12:42) E bae n iangoia bwa e na bati baika e na kabuai ngkana e riki bwa te tia rimwin Iesu.a

4. E kangaa Iesu ni buoka Nikotemo n ota n te bae e kantaningaia te Atua mairouna?

⁴ E ataa te Tua Nikotemo, ma e kainnanoa buokana n ota n te bae e kantaningaia Iehova mairouna. E kangaa Iesu ni buokia? E tituaraoi Iesu n ana tai, bwa e boni kaitiboo ma Nikotemo n te tairiki. Ao aikai baika e kamataatai raoi Iesu nakon Nikotemo aika e na karaoi bwa e aonga n riki bwa temanna te tia rimwina: e na raira nanona man ana bure, e na bwabetito n te ran, ao e na kaotiota onimakinan Natin te Atua.​—Ioa. 3:​5, 14-21.

5. Ti na kangaa ni buoka ae reirei n te Baibara n nori baika tutuka rikirakena?

⁵ E ngae ngkana bon iai otan te aomata ae reirei n te Baibara i aon te Koroboki ae Tabu, ma tao e kainnanoa buokana n nora te bae tutuka rikirakena. E kona n aki roroko n tiana n te onimaki ibukin ana mwakuri ni kareketianti ke aia kakaaitara ana utu. Ngaia are tatauraoi ibukin am reirei. Ko kona ni kairia ni moi kobee ke n rianna ni kamarurung. Ni karaoan anne, ko na kona iai ni kairia bwa e na kaotii ana kangaanga. Kaungaa am reirei bwa e na karaoi bitaki aika riai, tiaki ibukini kakukureiam, ma ibukini kaotan tangiran Iehova irouna.

6. Ko na kangaa ni buoka ae reirei bwa e na karekea ninikoriana n tei ibukin te koaua? (1 I-Korinto 16:13)

⁶ Ngkana e kakoauaa raoi te aomata ae reirei n te Baibara, ae e na boni buokia Iehova ni maiuakin ana kaetieti te Baibara, ane e na karekea te ninikoria ni maiuakini baike e reiakin. (Wareka 1 I-Korinto 16:13.) E kona ni kabotauaki tabem ma taben te tia reirei. Ngkana ko ururingi am tai n reirei, te aekakira te tia reirei ae ko tatangiria riki? E bae n ae te tia reirei ae e taotaona nanona ni buokiko ni karikirakea onimakinan oin am konabwai. N aron anne, te tia reirei n te Baibara ae raoiroi e aki tii reireinira te bae e tangiria te Atua bwa ti na karaoia, ma e karaua naba nanon ana reirei ae e boni kona ni karaoi bitaki ni maiuna, man ana ibuobuoki Iehova. Ko na kangaa ni karaoa anne?

BUOKA AM REIREI NI KAKORAKORAA TANGIRAN IEHOVA I NANONA

7. E kangaa Iesu ni buokiia taan ongora irouna ni kakorakoraa tangiran Iehova i nanoia?

⁷ E ataia Iesu ae a na kairaki taan rimwina bwa a na maiuakini baike a reiakin, ibukin tangiran te Atua. E aki toki n angareirei i aoni baika a na buokaki iai taan rimwina ni karikirakea tangiran Tamaia are i karawa. N te katoto, e kabotaua Iehova ma te mwaane ae e angangania natina baika raraoi. (Mat. 7:​9-11) Tao iai tabeman i buakoia taan ongora iroun Iesu aika a aki tatangira tamaia. Iangoa ngkanne aia namakin n ana kabotau Iesu ibukin te tama ae nanoanga are e butimwaea natina are e a tia n tiotionako. A kona n nora ana nanoanga Iehova ibukia natina aika i aon te aba.​—Ruka 15:​20-24.

8. Ko na kangaa ni buoka ae reirei n te Baibara ni kakorakoraa tangiran Iehova i nanona?

⁸ Ngkoe naba ko kona ni buoka ae reirei n te Baibara ni kakorakoraa tangiran Iehova i nanona, n arom ni kaotii raoi aroaron te Atua n am angareirei. Ni katoaa ami reirei, buokia bwa e na ataa irekereken te baere e reiakinna ma ana tangira Iehova. Ngkana kam maroroakina te kaboomwi, kaota raoi aron rotakina iai. (IRom 5:8; 1Ioa. 4:10) E na kai tangira riki Iehova am reirei ngkana e kaatuua iangoan ana tangira Iehova ibukina.​—IKar. 2:20.

9. Tera are e buoka te mwaane ae Michael ni bita maiuna?

⁹ Iangoa Michael mai Indonesia. E kaikawaaki i nanon te koaua ma e aki te roko ni bwabetitoaki. Ngke ai 18 ana ririki ao e a nako ni mwakuri i tinaniku bwa te turaiua n te turaki. Imwina riki ao e a mare, ma e kitania ana utu ibukin ana mwakuri aei. N te tai anne ao, a a reirei n te Baibara buuna ma natina ao a a ririkirake iai. Imwini maten tinan Michael ao e a motikia bwa e nang oki rikaaki nakoni mwengana ibukin tararuaan tamana, ao e butimwaea naba te reirei n te Baibara. Ngke a rinanon reirei 27 i aan are “Reiakina ae Bati Riki” n te boki ae Ko Kona ni Kukurei n Aki Toki!, ao e a rangi n ringaki nanon Michael. A boni waanako rannimatan Michael ngke e kaatuua ana iango i aon ana namakin Iehova n noran Natina ni maraki. E rikirake ana kakaitau ibukin te kaboomwi ao e a kairaki iai bwa e na bita maiuna ao ni bwabetitoaki.

BUOKA AM REIREI NI KARAOI BITAKI IBUKINI BAIKA E RIAI NI MOANIBWAI

10. E kangaa Iesu ni buokiia taan rimwina rimoa ni karaoi bitaki ibukini baika a riai ni moanibwai? (Ruka 5:​5-11) (Nora naba te taamnei.)

¹⁰ A waekoa taan rimwin Iesu ni kinaa ae ngaia te Mesia are beritanaki, ma a kainnanoa te ibuobuoki bwa a aonga ni moanibwaia te mwakuri ni minita. A a tia n riki Betero ma Anterea bwa taan rimwini Kristo i nanon tabeua te tai ngke e kaoia bwa a nang kabwanina aia tai n iriria. (Mat. 4:​18, 19) Bon iai aia bitineti ae bubura ae te akawa, ao n taraana bon raoia naba Iakobo ma Ioane. (Mareko 1:​16-20) Ngke a “kitan aia karaun” Betero ma Anterea, a boni bae n tia ni bairea aroia ni karekei kainnanoia aia utu ngke a irira Iesu. Tera are e kairiia bwa a na karaoi bitaki ibukini baika a riai ni moanibwai? Ti noria n te rongorongo are n Ruka, bwa e karaoa te kakai teuana Iesu are a a kakorakoraaki iai bwa a na onimakina ana konabwai Iehova ni katauraoi bwaai ibukia.​—Wareka Ruka 5:​5-11.

11. Ti na kangaa ni kona ni kabonganai rongorongora ni kakorakoraa iai ana onimaki ara reirei?

¹¹ Ti aki kona ni karaoi kakai n aron Iesu, ma ti kona n tataekina aron Iehova ni boutokaiia naake a moanibwaia ni maiuia. N te katoto, ko uringa aron Iehova ni buokiko ngke ko moani kaakaei bobotaki n taromauri? Ko bae ni kawara moa am tia kammwakuri ao ni kabwarabwaraa nakoina bukina ngkai ko nang aki kona n tiku ni mwakuri imwin te tai ngkana am tai n taromauri. Ngkana ko karakina rongorongom nakon am reirei, kabwarabwaraa bwa e kangaa ni kakorakoraaki am onimaki n noran Iehova ni boutokaa am motinnano ibukini moanibwaian taromauriana.

12. (a) Bukin tera bwa ti riai ni kakairiia taan uarongorongo aika kakaokoro nakon ara reirei n te Baibara? (b) Ko na kangaa ni kabonganai taamnei n reireinia iai am reirei bwa a na moanibwaia Iehova? Anga te katoto.

¹² E na kakabwaiaaki naba am reirei man ongoraeakinan taekaia Kristian tabeman ni karaoi bitaki ibukini baika a riai ni moanibwai. Ngaia are kakairiia taari aika kakaokoro bwa a na toaniko n am reirei n te Baibara. Butiia bwa a na kabwarabwaraa aroia ni kunea te koaua ao tera ae a a tia ni karaoia ibukini moanibwaian aia beku iroun Iehova. Irarikin anne, kakarekea am tai ma am reirei ni matakuakin taamnei ake i aan “Reiakina ae Bati Riki” ke “Nori Naba Aikai” n te boki ae Ko Kona ni Kukurei n Aki Toki! N te katoto, ngkana ko maroroakina reirei 37, ko kona ni katuruturui booto n reirei man te taamnei ae E na Karekei Baika Ti Kainnanoi Iehova.

BUOKA AM REIREI N TOKANIKAI I AON ANA KANGAANGA

13. E kangaa Iesu ni katauraoiia taan rimwina nakon te kakaaitara?

¹³ E okioki Iesu n tuangia taan rimwina ae a na boni boo ma te kakaaitara mairouia aomata, ao bon aia koraki naba. (Mat. 5:11; 10:​22, 36) Ngke e a kaan tokin ana mwakuri ni minita Iesu, ao e kauringia taan rimwina ae a na boni boo naba ma te mate. (Mat. 24:9; Ioa. 15:20; 16:2) E kaumakiia bwa a na taratara raoi n aia mwakuri ni minita. E angania taeka n reirei bwa a na aki kauntaeka ma ngaiia ma a na nanowanawana bwa e aonga ni kona n reitinako te uarongorongo.

14. Ti na kangaa ni buoka ara reirei ni katauraoia nakon te kakaaitara? (2 Timoteo 3:12)

¹⁴ Ti kona ni buoka ara reirei ni katauraoia nakon te kakaaitara, n arora ni kabwarabwaraa te bae e na kona n ongo mairouia raona ni mwakuri, raoraona, ao ana koraki. (Wareka 2 Timoteo 3:12.) A bae ni bwainingareia raona ni mwakuri tabeman ngkai e a bita maiuna. A kabuakakai ana koaua man te Baibara tabeman ao bon ana koraki naba ni kaan. Ngkana ti moantaai ni kabwarabwaraa nakoia ara reirei ae a kona naba n rinanon te kakaitaraaki, a na kai rabakau riki aroia ngkana e a riki te kangaanga.

15. Tera ae kona ni buoka te aomata ae reirei n te Baibara bwa e na nanomwaaka i aan aia kakaaitara ana utu?

¹⁵ Ngkana e kakaitaraaki irouia ana utu am reirei, kaungaa bwa e na iaiangoia bwa tera bukin unia ana koraki. A bae n iangoia bwa e a burebureaki, ke a bon tii riribaiia Ana Tia Kakoaua Iehova. E riribaaki naba Iesu irouia aomata aika e tangiriia. (Mareko 3:21; Ioa. 7:5) Reireina am reirei bwa e na teimatoa n taotaona nanona ao ni bwaina te wanawana nakoia aomata, n ikotaki naba ma kaain ana utu.

16. Ti na kangaa ni buoka ae reirei n te Baibara bwa e na tibwaa ana koaua ma te wanawana?

¹⁶ E ngae ngkana a kan ongora ana koraki te aomata ae reirei n te Baibara, ma e wanawana ngkana e aki kataia ni kabwarabwarai bwaai ni kabane ngkekei naba. Bwa n tokina a na manga ebu ana utu ao a na aki manga kani maroro ma ngaia taekan ana koaua. Ngaia are kaungaa am reirei bwa e na tibwai ana koaua, n te aro ae e na manga karekea angan te maroro imwina riki. (IKoro. 4:6) Tao e kona ni kaota jw.org nakoia ana koraki. N te aro anne a na kona n ataa riki taekaia Ana Tia Kakoaua Iehova i bon irouia.

17. Ko na kangaa ni kataneia te aomata ae reirei n te Baibara bwa e na kaekai iango aika kairua ibukia Ana Tia Kakoaua Iehova? (Nora naba te taamnei.)

¹⁷ Ko kona ni kabongana te kaongora ae rereitaki n jw.org ae “Titiraki Aika Tatabekaki” ni buoka iai am reirei ni katauraoi ana kaeka aika bebete nakon titiraki ake a na tabeki ana koraki ke raona ni mwakuri. (2Tim. 2:​24, 25) Ni katoaa banen te reirei teuana, rinanon te atuu ae “A Taku Tabeman” n te boki ae Ko Kona ni Kukurei n Aki Toki! Kaungaa am reirei bwa e na kamatenikunai ana kaeka akanne bwa e aonga n taekin n oin ana taeka. Buokia ni kanakoraoa riki ana kaeka ngkana e riai. Karaoan anne e na buokaki iai n tei ibukin ana onimaki ma te aki nanokokoraki.

18. Ko na kangaa ni kaungaa am reirei bwa e na kaotiota ana onimaki n tain te mwakuri ni minita? (Mataio 10:27)

¹⁸ E kaumakiia taan rimwina Iesu bwa a na tataekina te rongorongo ae raoiroi i mataia aomata. (Wareka Mataio 10:27.) Ngkana e moantaai n tataekina ana onimaki am reirei, ane e na rabakau riki n onimakina Iehova. Ko na kangaa ni buoka ae reirei n te Baibara bwa e na karekea anne bwa tiana? Ngkana e katanoataaki n te ekaretia karaoan te mwakuri n uarongorongo ae okoro, kaungaa am aomata bwa e na iaiangoia bwa tera ae e riai ni karaoia bwa e aonga n tau n riki bwa temanna te tia uarongorongo. Kabwarabwaraa nakoina bwa bukin tera ngkai a bati aika noria bwa e bebete riki iran te uarongorongo n aekaki n tai aikai. E na kona naba ni buokaki ngkana e katea tiana ae te kabwarabwara n tain te taromauri are i nukan te wiki. Ngkana e kakataneia nakon tiana anne, ane e na rabakau riki n tibwai ana koaua ma te aki nanokokoraki.

KAOTIA BWA KO ONIMAKINA AM REIREI

19. E kangaa Iesu ni kaotiota onimakinaia taan rimwina, ao ti na kangaa ni kona ni kakairi irouna?

¹⁹ Imwaini waeraken Iesu nako karawa, ao e tuangia taan rimwina bwa a na manga katiteuanaaki ma ngaia imwina riki. A aki ota ae e taekina Iesu taekani waerakeia nako karawa. Ma e ngae n anne, e kaatuua riki taraan aia kakaonimaki ni koaua, ao tiaki raraomaia. (Ioa. 14:​1-5, 8) E ataia ae a na kainnanoa te tai teutana n ota ni bwaai tabeua, n aron te kantaninga ae te nako karawa. (Ioa. 16:12) Ngaira naba ti kona ni kaotia bwa ti onimakinia ara reirei ae a boni kani kakukureia Iehova.

20. E kangaa te tari te aine mai Malawi ni kaotiota onimakinan ana reirei?

²⁰ Ti teimatoa ni kantaningaia ara reirei bwa a na kani karaoa te bwai ae eti. Nora ana katoto Chifundo ae te tari te aine mai Malawi. E moana ana reirei n te Baibara n te boki ae Ko Kona ni Kukurei n Aki Toki! ma te ataeinnaine ae Alinafe ae kaain te Katorika. Ngke e bane reirei 14, ao e a titirakinna Chifundo bwa tera ana iango n taromauriani bouannanti. E un Alinafe ao e taku, “E a bon nakon ana rinerine te aomata!” E raraoma Chifundo ao irouna e nang toki aia reirei n te Baibara. Ma e taotaona nanona ao e reitaanako te reirei ma Alinafe, ma kantaningaan ae n te taina ao e na ataia ae e boni kairua taromauriani bouannanti. Tabeua te namwakaina imwina, ao e a tabeka te titiraki n reirei 34 ae kangai Chifundo: “Tera kakabwaiaam man reiakinan te Baibara ao taekan te Atua ae koaua ae Iehova?” E reitia Chifundo ni karakina ana kaeka Alinafe ni kangai, “A bati reireiana aika rangi n tamaroa ake e mwanewei, ao teuana mai iai bon taekan ae a aki kakaraoi mwakuri aika kabuakakaaki man te Baibara taani Kakoaua.” E aki maan imwina ao e a katoka kabonganaani bouannanti ao e a tau ni bwabetitoaki.

21. Ti na kangaa ni kona ni kakorakoraa nanon te aomata ae reirei n te Baibara bwa e na kan tei ibukin te koaua?

²¹ E ngae ngke bon Iehova ae ‘karikirakea’ te aomata ae reirei n te Baibara, ma ti buoka naba rikirakena. (1Kor. 3:7) Ti aki tii reireinna baika e tangiri te Atua bwa e na karaoi. Ti buokia ni karikirakea tangiran Iehova i nanona. Ti kaungaa naba bwa e na kaotiota ana tangira, n arona ni karaoi bitaki ibukini baika e riai ni moanibwai. Ao ti reireinna naba bwa e na onimakina Iehova ngkana e kaaitarai kangaanga. Ngkana ti kaotiotia ae ti onimakinna, ti a kaungaa iai bwa e na kakoauaa ae e boni kona naba ngaia ni maiuakin ana kaetieti Iehova ao n tei ibukin te koaua.