A na Kan Ongora Naake A “Tauraoi Nanoia ni Butimwaea te Koaua”

1. Tera aroia aomata nakon te rongorongo ae raoiroi? (Mwakuri 13:47, 48; 16:14, 15)

A BATI aomata n te moan tienture aika a butimwaea te koaua n te tai are a ongo iai te reirei ni Kristian. (Wareka Mwakuri 13:47, 48; 16:14, 15.) N aron anne, a kimwareirei tabeman n ara bong aikai ngkana a moan ongo te rongorongo ae raoiroi. A kona naba naake a aki butimwaea te rongorongo ibukin te Tautaeka n Uea n te moantai ni manga butimwaeia imwina riki. Tera ae ti riai ni karaoia ngkana ti kuneia aomata aika “tauraoi nanoia ni butimwaea te koaua” n ara mwakuri ni minita?

2. N te aro raa ae titeboo iai ara mwakuri ni karekeia taan rimwini Kristo ma ana mwakuri te tia ununiki?

² Iangoa te kaikonaki aei. E kona ni kabotauaki ara mwakuri ni karekeia taan rimwini Kristo ma ana mwakuri te tia ununiki. Ngkana iai uaan te aroka teuana ae tawaa, e na bae te tia ununiki n rikoia e ngae ngke e tabe ni kamaraua aontano ke n ununiki n te tabo teuana n ana onnaroka. N aron anne, ngkana ti kunea temanna ae tauraoi ni butimwaea ara rongorongo, ti tangiria ni buokia bwa e na waekoa n riki bwa te tia rimwini Kristo. Ma ti bon teimatoa naba ni karikirakea te kan ongora irouia tabemwaang ake a kainnanoa riki aia tai n nora kakawakin te baere a ongo. (Ioa. 4:35, 36) E na buokira te ataibwai n rinea te anga ae te kabanea n tamaroa ibukia aomata ake a ongora iroura. Ti na maroroakinna ngkai bwa tera ae ti kona ni karaoia n ara moani maroro ni buokiia aomata ake a tauraoi n ongora. Ti na nora naba arora ni kona ni buokiia te koraki akanne bwa a na teimatoa n ririkirake.

NGKANA A TAURAOI AOMATA NI KAN ONGORA

3. Tera ae ti riai ni karaoia ngkana ti kuneia aika a kan ongora n ara mwakuri ni minita? (1 I-Korinto 9:26)

³ Ngkana ti kuneia aomata aika kan ongora n ara mwakuri ni minita, ti kani buokiia bwa a na waekoa naba ngkekei n toua te kawai nakon te maiu. Ngaia are ti aki riai n tabwara ni kairi reirei n te Baibara ao ni kaoia nakon ara taromauri n ara moani maroro ma ngaiia.—Wareka 1 I-Korinto 9:26.

4. Taekina rongorongon temanna ae e tauraoi n reirei n te Baibara n te tai ae waekoa.

⁴ Kairan te reirei n te Baibara. A tauraoi tabeman ake ti maroro ma ngaiia n reirei n te Baibara n te tai ae waekoa. N te katoto, n te Kaabong teuana ao iai te aine temanna ae ataei i Kanata ae kawara te kaa ni boki ao e anaa katoton te boroutia ae Ko Kona ni Kukurei n Aki Toki! E kabwarabwaraa te tari te aine are tei n te kaa ni boki bwa e kona naba ni kaira te reirei n te Baibara n te boroutia anne n akea boona. E kukurei iai neiei ao e a anga nambwan ana tareboon. Imwina riki n te bong anne, e a kanakoa ana rongorongo neiei nakon te tari te aine arei ibukin te reirei. Ngke e taekinna te tari te aine arei ae e na roko n te wikeen, ao e titiraki neierei ni kangai: “Ao ngkana ningabong? Bwa I mwaawa iai.” A reirei n te Kanimabong anne. E kaea ana moan taromauri te aine aei n te wikeen anne ao e teimatoa n ririkirake.

5. Ti na kangaa ni kaota te ataibwai ngkana ti kaira te reirei n te Baibara? (Nori naba taamnei.)

⁵ Ti aki kantaningaiia aomata ni kabane ake a ongora n ara rongorongo bwa a na ingainga n aron te aine anne. Tabeman a kainnanoa riki te tai ae maan teutana. Ti kona ni moana moa te maroro i aon te bae e kan ongora iai te aomata. Ma ngkana ti kateimatoa te aroaro ae raoiroi ao n teimatoa ni kaota tabeakinan te aomata, ti na bae ni kona ni moana te reirei n te tai ae waekoa. Tera ae ti kona n taekinna ngkana ti a kaira te reirei? E tabekaki te titiraki anne nakoia taari mwaane ao aine ake a mwaatai ni moana te reirei n te Baibara.

6. Tera ae ti kona n taekinna ae e na buoka te aomata n noria ae e raoiroi ibukina reiakinan te Baibara?

⁶ A kabwarabwaraa taan uarongorongo ao bwaiania ake a titirakinaki ibukini moanakin reirei n te Baibara bwa n aaba tabeua ao e raoiroi riki bwa a na aki taekin taeka aika “reirei,” “reirei n te Baibara,” ke “reireiniko,” ngkana a kabwarabwaraa taekan te reirei n Baibara. A taekinna bwa e raoiroi riki kamanenaan taeka aika “kakaraki,” “maroro,” ao “karekea ataakin te Baibara.” Ngkana e na reitinako te maroro, ko kona ni kangai, “E rangi ni kamimi ngkai a kaekaaki n te Baibara titiraki aika kakawaki ibukin te maiu” ke “Te Baibara bon tiaki tii bokin te Aro, ma e buokira n aanga aika manena.” Ko kona naba ni kangai: “E aki nang maan, 10 nakon 15 te miniti ao ti a ataa naba te bwai ae kakawaki.” Ko kona n taekina anne ao n aki kamanenai taeka aika “boraraoi” ke “ni katoa wiki,” ae oti iai bwa ko nang boni kakawaria naba n taai nako.

7. N ningai ae a moan ataa iai te koaua man te Baibara tabeman? (1 I-Korinto 14:23-25)

⁷ Kaoia nakon te taromauri. N taraana ao a nori koaua man te Baibara tabeman n ana tai te abotoro Bauro ngke a kaea te taromauri ni Kristian. (Wareka 1 I-Korinto 14:23-25.) Anne naba ae riki n ara bong aikai. A waekoa n ririkirake angiina aika a boou ngke a moana kaakaean ara taromauri. N ningai ae ko riai ni kaoia iai? E taekinaki naba te kakao n te boki are Ko Kona ni Kukurei n Aki Toki! n reirei 10, ma ko aki riai n tataninga ni karokoa ko roko n te mwakoro anne. Ko kona ni kaoa te aomata nakon te taromauri n te wikeen man te tai are ko moani maroro iai ma ngaia, tao ko taekina atun te kabwarabwara ke te reirei man te Taua-n-Tantani Ibukin te Reirei n te wiki anne.

8. Tera ae ti kona n tuanga te aomata ngkana ti kaoia nakon ara taromauri? (Itaia 54:13)

⁸ Ngkana ti kaoa te aomata ae kan ongora, kabwarabwaraa aroni kaokoron ara taromauri ma aia waaki Aaro are e taneiai ma ngaia. Ngke e moani kaea te Reirei n te Taua-n-Tantani te aine are e reirei n te Baibara, ao e titirakina ana tia reirei ni kangai, “E atai araia aomata ni kabane te tia kaira te reirei?” E kabwarabwaraa te tari te aine ae ti bane ni kataia n atai araia kaain ara ekaretia n aron ae ti atai araia kaain ara utu. E noria te aomata are reirei n te Baibara bwa e kaokoro aei ma are e rinanona n ana Aro. N aron anne, a bati aika boou n aron ara taromauri. (Wareka Itaia 54:13.) Ti ikotaki bwa ti na taromauria Iehova, ni karekea reireiara mairouna, ao ni kaungaira i marenara. (Ebera 2:12; 10:24, 25) Anne bukina ae a baireaki raoi ara bobotaki, a manena, ao a aki irianaki n te katei. (1Kor. 14:40) A bebete naba tein ara tabo n taromauri ao a karaoaki ibukira bwa ti na reiakinaki iai. Ao ti aki boutokaa te bwaatei teuana n te tautaeka ibukina bwa ti tei i nuka ao ti aki naba irira te mwaati ni kaotinano ke te itabarara. E na bae n ibuobuoki ngkana ko moantaai ni kaota te taamnei ae Tera ae Riki n te Tabo n Taromauri? nakon ane e reirei n te Baibara. N te aro anne, e na ataa te bae e na riki.

9-10. Ngkana ti kaoa te aomata nakon te taromauri, tera ae ti kona ni karaoia ni karaua iai nanona ae ti na aki kairoroa bwa e na roko ke n anga ana kaeka? (Nora naba te taamnei.)

⁹ A tabwarabwara tabeman ni kaea te taromauri ibukina bwa a maaka are a na tuangaki bwa a na kaaina ara Aro. Karaua nanon te aomata, bwa ti aki kairoroiia bwa a na roko ao ni karaoa te bwai teuana ke n anga aia kaeka, ma ti kukurei ngkana iai aika roko. A butimwaeaki utu, n ikotaki naba ma ataei aika uarereke. A aki kaokoroaki ataei n reireinaki n ara taromauri. Ma a tekateka kaaro ao natiia ao a uaia ni karekea reireiaia. N te aro anne, a ataia iai kaaro bwa a mena ia natiia ao tera te bae a reiakinaki iai. (TuaKau. 31:12) Ti aki rikomwane n ara taromauri. Ma ti kakairi n ana tua Iesu aei: “Kam anganaki n akea boona, aanga naba n aki kabooaki.” (Mat. 10:8) Ko kona naba n taekinna nakon te aomata ae e aki kainnanoia bwa e na karekea oneana ae bobuaka ibukini kaean te taromauri. E taraa te nano te Atua, tiaki tein te aomata.—1Tam. 16:7.

¹⁰ Ngkana e kaea te taromauri te aomata, kabanea am konaa ni butimwaeia. Kairia nakoia unimwaane ao taan uarongorongo tabeman. Ngkana e namakinna bwa e butimwaeaki raoi, e na kani manga oki riki. Ngkana akea ana Baibara n tain te taromauri, ibuobuoki ma ngaia ao kaota nakoina arora n irira te tia kabwarabwara ke te reirei.

NGKANA E A MOANAKI TE REIREI N TE BAIBARA

11. Ko na kangaa ni kaotia ae ko karinea ana tai kaain te auti ao ana babaire?

¹¹ Tera ae ti riai n ururingnga ngkana ti reirei n te Baibara ma temanna ni mwengana? Karinea ana tai kaain te auti ao ana babaire. N te katoto, ngkana ko karaoa am boraraoi, rooko i aon te tai, e ngae ngke a aki roroko i aon te tai aomata n am aono. Irarikina, e raoiroi riki ngkana ko kauarerekea am tai n reirei ni moan rokom. A taekinna taan uarongorongo tabeman aika mwaatai bwa e raoiroi riki ae ko moantaai ni bwara, e ngae ngkana e kan ongora riki te aomata anne. Ao tai taua atin te maroro. Kariaia kaain te auti bwa e na bunra nanona.—TaeRab. 10:19.

12. Tera tiara man te moantai ngkana ti reirei n te Baibara ma te aomata temanna ni mwengana?

¹² Tiam man te moantai bwa ko riai ni buoka te aomata bwa e na kinaa Iehova ao Iesu ao ni karikirakea tangiraia. Ko karaoa anne ngkana ko kairia nakon Ana Taeka te Atua ao tiaki nakoim ke am atatai n te Baibara. (Mwa. 10:25, 26) E aki toki ni kaatuua ana angareirei te abotoro Bauro i aon Iesu Kristo, are teuare e kanakoaki iroun Iehova bwa e na buokira ni kinaa Iehova ao n tangiria. (1Kor. 2:1, 2) E kamataataa naba Bauro aroni kakawakini buokaia taan rimwini Kristo aika boou ni karikirakei aroaro aika raraoi, aika kona ni kabotauaki ma te koora, te tirewa, ao atibu aika rangi ni kakawaki. (1Kor. 3:11-15) Aroaro aika kakawaki akanne bon te onimaki, te wanawana, te ataibwai, ao maakakin Iehova. (TaiAre. 19:9, 10; TaeRab. 3:13-15; 1Bet. 1:7) Kakairi n ana anga Bauro n angareirei n arom ni buokiia am reirei bwa a na karikirakea aia onimaki ae korakora ao aia iraorao ma Tamaia are i karawa ae tatangira.—2Kor. 1:24.

13. Ti na kangaa ni kaotiota te taotaonakinnano ao ni kataia n ota ngkai ti buokiia aika a kan ongora? (2 I-Korinto 10:4, 5) (Nora naba te taamnei.)

¹³ Kakairi n aron Iesu n angareirei n arom ni kaotiota te taotaonakinnano ao ni kataia n ota. Tai tabeki titiraki aika e na maamaa iai te aomata. Ngkana e kangaanga otana n te reirei teuana, tai tiku i aona ma waakinako ao manga okiria imwina. N oneani mwin are ko na kataia n taumatoaia bwa e na butimwaea te reirei imwain tauraoin nanona, anganna ana tai bwa e aonga ni wakaa te koaua i nanona. (Ioa. 16:12; IKoro. 2:6, 7) E kabotaui angareirei aika kewe te Baibara ake ti kataia n urui ma te tabo ni kamaiu. (Wareka 2 I-Korinto 10:4, 5) N oneani mwin are ko na urua ana tabo ni kamanomano am reirei, buokia moa bwa e na karika Iehova bwa ana Tabo ni Kamanomano.—TaiAre. 91:9.

NGKANA A ROKO AIKA BOOU N TE TAROMAURI

14. Tera arora nakoia aika boou ake a roko n ara taromauri?

¹⁴ E kantaningaira Iehova bwa ti na aki inanonano ni butimwaeaia aika boou, n aki ongeia bwa tera aia katei, nakoaia, ke kaokoron aia reeti. (Iak. 2:1-4, 9) Ngaia are ti na kangaa ni kaotiota te tangira nakoia naake a roko n ara taromauri?

15-16. Ti na kangaa ni buokiia aika a boou bwa a na namakinna ae a butimwaeaki raoi n te taromauri?

¹⁵ A roko tabeman n te taromauri bwa a kan ataia bwa tera ae kakaraoaki ke a kaungaaki iroun temanna ae mena n te tabo teuana bwa a na roko. Ngaia are ti aki riai n tabwarabwara ni kawariia te koraki akanne ngkana a roko n ara tabo n taromauri. Butimwaeiia raoi ma tiaki n te aro ae riao. Tuangia bwa a na tekateka i rarikim. Ibuobuoka am Baibara ma ngaiia ao booki ake ti reirei iai, ke karekea oin aia boki. Iaiangoa naba aia namakin. Iai temanna te mwaane ae roko n te Tabo n Taromauri ao e tuanga te tari te mwaane are e butimwaeia bwa e raraoma n oneana. E karaua nanona te tari te mwaane aei ao e kabwarabwaraa ae Ana Tia Kakoaua Iehova bon aomata naba n aekakira. Imwina riki, e a bwabetitoaki te mwaane aei ao e aki mwaninga butimwaeana iroun te tari te mwaane arei. Ma te taeka ni kauring: Ngkana ko maroro ma aika a boou imwain ao imwin te taromauri, kaotia bwa ko tabeakinia ma tai tabeki titiraki aika a na maamaa iai.—1Bet. 4:15.

¹⁶ Ti kona naba ni butimwaeiia raoi aika a roko n arora ni karinerine n ara maroro, n ara kaeka, ao ngkana ti taekinia aika tiaki taani Kakoaua ke aia koaua. Tai taekin taeka aika a na kona ni kabwakaia ke n iangoaki bwa a kamaamaeaki iai. (Tit. 2:8; 3:2) N te katoto, ti na bon aki riai ni bwainingarei aia koaua naake e kaokoro ara onimaki ma ngaiia. (2Kor. 6:3) Ibukin aei, a riai n rangi n taratara raoi taari mwaane ngkana a kabwarabwara. A riai naba n ururingnga ae iai aika tiaki taani Kakoaua aika ongora ngaia are a riai ni kabwarabwarai taeka aika aki ota iai aomata.

17. Tera tiara ngkana ti kuneia aika a “tauraoi nanoia ni butimwaea te koaua” n ara mwakuri ni minita?

¹⁷ E a kaumakaki riki ara mwakuri ni karekeia taan rimwini Kristo ni katoabong ao ti teimatoa ni kuneia aomata aika “tauraoi nanoia ni butimwaea te koaua ae kairiia nakon te maiu are aki toki.” (Mwa. 13:48) Ngkana ti karaoa anne ti aki riai n tabwarabwara ni kaira te reirei n te Baibara ma ngaiia ke ni kaoia nakon ara taromauri. Karaoan anne ti kona ni buokiia iai n toua “te kawai ae tiki nakon te maiu.”—Mat. 7:14.