Kateimatoa Am Babaire ae Warekan te Baibara ni Katoabong

Ko kabokorakora n ira am babaire ibukini warekan Ana Taeka te Atua ni katoabong ibukin tabem aika rangi ni mwaiti aika ko riai ni karaoi? (Iot. 1:8) Ngkana ngaia anne, kataa teuana i buakon aanga n ibuobuoki aikai:

• Karaoa am bwai ni kauring ni katoabong. Karaoa am araam n am tareboon bwa kauringam ae ko na wareware n te Baibara.

• Katuka am Baibara n te tabo ae ko kai noria iai. Ngkana ko wawareware n te Baibara are boreetiaki, katikua n te tabo ae ko kona n noria iai ni katoabong.​—TuaKau. 11:18.

• Ongora nakoni bwanaa aika raweaki. Ongora iai ngkana ko karaoi tabem. E taku Tara ae te bwaiania ao te tina ae mwamwakuri n te bong, “I buokaki n ongongoraau n te rawebwanaa ae kanoan te Baibara ngkana I karaoi tabeu ni mwengau, bwa N na kateimatoa au wareware n te Baibara.”

• Botumwaaka. Ngkana a riki baika aki kantaningaaki aika urua am babaire, wareka tao tabeua kiibu man te Baibara imwaini matum. E ngae ngke tii tabeua kiibu aika ko wareki ma ko na boni kakabwaiaaki iai.​—1Bet. 2:2.