Kamanena Am “Bwaintituaraoi [Are] Mairoun te Atua”

Ti rangi ni kaungaaki ngkana ti karerekea ara tai ma tarira ao mwaanera ni Kristian. Ma e bati riki ae riai ni karaoaki nakoni karekean ara tai ni kaungaunga. E taekinaki n te Baibara bwa ara konabwai ni kakorakoraa ana onimaki temanna bon te “bwaintituaraoi mairoun te Atua.” (IRom 1:​11, 12) Ti na kangaa ni kamanena raoi te bwaintituaraoi anne?

Kaungaia tabemwaang n am taeka. N te katoto, ti kona n anga ara kaeka n taai ni bobotaki ae e aki boto i aora, ma e boto i aon Iehova, ana Taeka, ao ana aomata. Ngkana ti maroro ma raora n te onimaki, ti kona n rineia bwa ti na maroroakin reirei aika kaungaunga.

Kaungaia tabemwaang n am motinnano ao n am mwakuri. N te katoto, a rineia tabeman bwa a na teimatoa ni beku ni kabwanina aia tai n aki ongei kangaanga ake a kaaitarai. Ake tabemwaang a katoatai ni boutokaa te taromauri are i nukan te wiki e ngae ngke a kua imwin te mwakuri ke iai aorakia ae wenemaan.

Ko kaungaia tarim ao mwaanem n am taeka ao n te bae ko karaoia? Ao ko kukurei ni butimwaei bwaai n tituaraoi mairoun te Atua aika ai aron akanne?