Kaara—Kam Kakawaki n te Ekaretia
“Ngkana I tanrikaaki, ao I boni mimi ni baike I a tia ni kona ni karaoi. Ma ngkai I a kara, e a tiatianaki au konabwai.”—Connie, 83 ana ririki.
Tao e a tiatianaki naba am konabwai ngkai ko a rikirake ni kara. E ngae ngke ko a tia n toro iroun Iehova ma te kakaonimaki i nanon ririki aika bati, ma ko bae n iangoi baika aki raraoi ibukim kioina ngkai e a tiatianaki am konabwai. N te katoto, ko bae ni kabotaua te bae ko karaoia ngkai ma are ngkoa. Ngkana anne ae riki, tera ae ko kona ni karaoia ni kaitaraa te aeka n iango anne?
TE BAE E KANTANINGAIA IEHOVA MAIROUM
Titirakiniko ni kangai, ‘Tera ae kantaningaia Iehova mairou?’ Ko kona ni karekea te kabebeteaki man taeka ake n Te Tua-Kaua 6:5, ae kangai: “Kam riai n tangira Iehova ae Atuami ma nanomi ni kabane, maiumi ni kabane ao korakorami ni kabane.”
E oti n te kibu anne bwa e kantaningaiko Iehova bwa ko na beku irouna ma nanom ni kabane, maium ni kabane, ao korakoram ni kabane. Ko kona ni buokaki n te kibu anne bwa ko na aki kabotauko ma tabemwaang, ke ko na aki kabotaua ae ko kona ni karaoia ngkai ma are ngkoa.
Iangoa aei: Tera ae ko angan Iehova ngke ko ataei? Angiina ana aomata Iehova a na bae n taekinna ae a anganna aia kabanea n tamaroa. Ma anne bon am kabanea n tamaroa n te tai arei. Tera ae ko kona ngkai n angan Iehova? Bon am kabanea n tamaroa ni kaineti ma baika riki nakoim n te bong aei, ae e nanonaki iai te bwai ae ko kona ni karaoia ngkai. Ngkana ko iaiango n aron anne, ko kona ni kakoauaa ae bon titeboo te bae ko angan Iehova ngkai ma are ngkoa. Ko anganna am kabanea n tamaroa n te tai arei ao ngkai naba.
Ko angan Iehova am kabanea ni konaa ngke ko ataei, ao ko angan naba Iehova am kabanea ni konaa ngkai ko a kara.
A KONA NI KAKABWAIAAKI TABEMWAANG IROUM
Aio riki te bae e kona n riki: N oneani mwin ae ko na iangoa am ririki bwa e tiatiana am konabwai, iangoia bwa te anga teuana ae ko kona n ibuobuoki riki iai. Ngkai te Kristian ngkoe ae ko a kara, iai bwaai tabeua aika ko kona ni karaoi ngkai aika ko aki kona ni karaoi ngke ko ataei. N te katoto, ko kona ni karaoi baikai:
Tibwai baike ko a tia n rinanoi nakoia tabemwaang. Iangoi taeka aika koreaki n te Baibara aikai:
Te Uea are Tawita: “Te ataeinimwaane ngai ngkoa ao I a kara ngkai, ma I tuai man nora te aomata ae raoiroi ae kaakaki taekana, ke natina aika bubutii te amwarake.”—TaiAre. 37:25.
Iotua: “Ao noria! Ae I a kaani mate, ao kam ataia raoi ma nanomi ni kabane ao maiumi ni kabane, bwa bon akea te taeka teuana ae bwaka mani berita aika raraoi ni kabane ake e taekin nakoimi Iehova ae Atuami. A bane ni koro bukia ibukimi. E aki bwaka te taeka teuana mai buakoia.”—Iot. 23:14.
Tao ko a tia naba n taekin aeka n taeka akanne. A uaia n taetae Tawita ma Iotua ni kaineti ma baike a a tia n rinanoi. Ibukina bwa a taekini baike a a tia n nori ao n ongo i nanon irabwi te ririki ana toro Iehova aika kakaonimaki aikai, ngaia are a boni kakawaki baike a taekin.
Ngkana ko a maan n toro iroun Iehova, ko kona naba n taekini kakabwaiaam aika ko a tia ni karekei. Iai te tai ae ko aki mwamwaninga taekana, are ko nora iai ana kakabwaia Iehova i aoia ana aomata? Karakinna nakoia tabemwaang! Iai mwina ae kona n rangi n ibuobuoki n aron naba are riki nakoim. Ngkana a ongo tabemwaang baike a riki nakoim ngke ko beku iroun Iehova, ko a kona n riki bwa nibwan te kaungaunga nakoia.—IRom 1:11, 12.
Te anga teuana ae ko kona ni kaungaia iai tabemwaang boni man rorokom ni kaea te taromauri n te ekaretia ngkana ko kona. Ko a kona iai ni buokiia taari ao boni ngkoe naba. E kangai Connie, are mwaneweaki mai mwaina: “E reke ungan nanou n rorokou n te taromauri. E na kangaa ni bwara nanou n namakinan te tangira ae bati n rokou n te Tabo n Taromauri? I kataia ni kaota au kakaitau nakoia tabemwaang n arou n angania au bwaintangira aika uarereke. Ao I teimatoa n uataboi karaoani baika irekereke ma te onimaki, i rarikia tariu ma mwaaneu n te onimaki.”
E KAKAWAKI IROUN IEHOVA AM BEKU MA TE KAKAONIMAKI
Iai n te Baibara aia katoto aomata aika tangiraki iroun Iehova e ngae ngke e tiatianaki aia konabwai. Iangoa Timeon, ae te unimwaane ae te I-Iteraera are e ooa bungiakin Iesu. Ngke e kawara te tembora Timeon, ao e bae n noriia mwaane aika ataei ni karaoi mwakuri aika rangi ni kakawaki ikekei. Ma tera aron Timeon? N te taratara n aomata, ao e kona n iangoia ae ngkai e a kara, ai akea bongana i matan Iehova. Ma e kaokoro ana taratara Iehova. E taraa Timeon bwa te mwaane ae ‘raoiroi ma n taatangira te Atua’ ao e kakabwaiaa ngke e kariaia bwa e na nora te merimeri ae Iesu. E kabonganaaki naba Timeon iroun Iehova bwa e na taetae ni burabetinna ae Iesu bon te Mesia! (Ruka 2:25-35) E teretere bwa e aki taraa Timeon Iehova bwa e a kara ma e taraia bwa te mwaane ae korakora ana onimaki, “ao e memena irouna te taamnei ae raoiroi.”
E kakabwaiaaki Timeon iroun Iehova ngke e kariaia bwa e na nora te merimeri are Iesu ao n taetae ni burabetinna ae bon te Mesia Iesu
Ko kona naba ngkoe ni kakoauaa ae e kakawaki iroun Iehova am beku ibukina ma te kakaonimaki, e ngae ngke e a tiatianaki am konabwai. Bwa e butimwaea riki Iehova te angakarea ‘are iai iroun te aomata, ma e aki kantaningaaki bwa e na anga are akea irouna.’—2Kor. 8:12.
Tai mwaninga anne ao kaatuua am iango i aon te bae ko kona ni karaoia. N te katoto, tera iteran te mwakuri ni minita ae ko teimatoa ni kona n uataboia i nanon te tai ae uarereke? Ko kona ni buokiia tabemwaang ngkana ko tareboonia ke ni korea am rongorongo ae uarereke nakoia? Te mwakuri ae uarereke ae oti iai te tangira e kona ni korakora mwina nakoia taari, moarara riki ngkana e karaoaki irouia ana toro Iehova ake a maan ni beku irouna.
Iai tabeman aika aki toamau bwain rabwataia. Nora te rongorongo mai Aberika Mainiku n te bwaoki ae “E Reke Iai Maiuna.”
Ururingnga are a kona ni kaungaaki tabemwaang n am beku ma te kakaonimaki ni koaua. Bon te banna ni katoto ngkoe ibukin te nanomwaaka, ao ko kona ni kakoauaa ae ‘e aki ribuaka te Atua ni mwanuokin am mwakuri ao am tangira ake ko kaotia ibukin arana, n arom ni buokiia te koraki aika itiaki ao ngkai ko teimatoa naba ni buokiia.’—Ebera 6:10.
TEIMATOA NI KATABETABEKO N AM BEKU
E noraki ni mwin taiani kakaae bwa a bati kaara aika buokiia tabemwaang, aika a marurung riki rabwataia, a tuai mwamwaninga, ao e abwabwaki maiuia.
E koaua ae karaoani mwakuri aika raraoi e na aki kona n tuka ana urubwai te kara. Bon tii Ana Tautaeka n Uea te Atua ae e na kona ni karaoa anne, ngkana e a kamauna te baere e karika te kara ao te mate, ae taekan aki kororaoira.—IRom 5:12.
Ma te beku are ko karaoia ibukin Iehova, n ikotaki naba ma buokaia tabemwaang bwa a na ataa Iehova, e na kanenea am kantaninga ao n anganiko naba te marurung. Ngkami aika kaara, taiaoka ma tai mwaninga ae a kakawaki iroun Iehova baika kam karaoi ibukina, ao a kakaitau kaain te ekaretia n ami katoto ibukin te onimaki.