Taobaraa Namakinan ae Ko a Tiku n Tii Ngkoe n Arom ni Karekeia Raoraom—Aron te Baibara ni Buokiko

N 2023 ao e kakoauaaki irouia taan rabakau ibukini marurungia te botannaomata bwa namakinan ae ko a tiku n tii ngkoe, bon te aoraki ae karuanikai ae riai ni kakaaeaki katokana. E boni kona ni katokaki?

• “Ngkana ti namakina ae ti a tiku n tii ngaira ao ni kararoaira mairouia aomata, e kona n rotaki iai marurungira ma kukureira,” e taekina anne Dr. Vivek Murthy, ae te mataniwi irouia taokita n te taanga ni buaka i Amerika. E a manga taku: “Iai ara konabwai ni kaitaraa te kangaanga anne.” N te aro raa? “Ngkana ti karaoi mwaneka aika uarereke ni katoabong ni kakorakoraa aron reitakira ma tabemwaang.”a

Namakinan ae ti a tiku n tii ngaira, e aki riki ibukina bwa ti kararoaira ma aomata. Iai tabeman aika a namakina anne e ngae ngke a mena i buakoia aomata aika bati. E kona n ibuobuoki te Baibara n aki ongeia bwa tera bukina ngkai ti a namakina ae ti a tiku n tii ngaira. Iai ana taeka n reirei aika manena te Baibara, ake a na buokira n taobaraa namakinan ae ti a tiku n tii ngaira, man arora ni kakorakoraa reitakira ma tabemwaang.

Ana boto n reirei te Baibara aika kona n ibuobuoki

Karabakauko ni mamaroro. E aki nanonaki iai tii taekinan am namakin ma e nanona naba rabakaum ni kakauongo. E na kakorakoraaki riki arom n reitaki ma aomata ngkana ko kaotiota tabeakinaia.

• Ana boto n reirei te Baibara: “Kam na aki tii tabeakin oin aromi, ma kam na tabeakin naba aroia tabemwaang.”—I-Biribi 2:4.

Kabatiaia raoraom aika kakaokoro aroia. Tatauraoi ni karekeia raoraom aika kara ke ake a uarereke riki nakoim, ke ake a kaokoro aia reeti ke abaia ma ngkoe.

• Ana boto n reirei te Baibara: “Kam na kamwaawawai . . . nanomi.”—2 I-Korinto 6:13.

Ngkana ko kani karekea riki te rongorongo ni kaineti ma arom ni kakorakoraa am iraorao ma tabemwaang, wareka te kaongora ae “Satisfying Our Hunger for Friendship.”