Te Buaka n te Middle East—Tera ae E Taekinna te Baibara?

E a korakora tabeaiangaia aomata ni katobibia te aonnaba ibukin te itabarara ae a irekereke iai Amerika, Iteraera, ao Iran. E na rikirake ni korakora te itabarara aei ao n rotii aaba aika mwaiti? A kona aia tautaeka aomata n totokoa rikina ao ni karekea te rau ae taabangaki n te aonnaba?

A na bae te koraki ake a taneiai ma ana taetae ni burabeti te Baibara, n iangoia bwa te itabarara ae riki aio, e nang kairiri nakon te buaka ae Aremaketon, are taekinaki n te boki ae Te Kaotioti.

Tera ae e taekinna te Baibara?

A na kona aia tautaeka aomata ni katoka te buaka n te Middle East?

E taku te Baibara: “Tai onimakinia natinuea mwaane ke natin te aomata, ae aki kona ni karekea te kamaiu.”—Taian Areru 146:3.

Ai bon norana ngkana a na kona ni karekea te rau n te Middle East aia tautaeka aomata. Ma e ngae n anne, e katerea te Baibara bwa e aki kona te tia kairiri temanna n te tautaeka, aia tautaeka aomata, ke kurubu aika kateaki irouia aomata, ni katoka te buaka ao ni karekea te rau ae taabangaki. Bon tii te Atua ae kona ni “katoki buaka ni kabutaa te aonnaba.”—Taian Areru 46:9.

• Ngkana ko kan reiakinna riki, wareka te maekatin ae te Taua n Tantani ae atuna “Tokin te Buaka—N te Aro Raa?”

E a kakoroa nanon te taetae ni burabeti, te buaka are n te Middle East?

E taku te Baibara: “Kam na ongo karongoaani buaka ao rongorongoni buaka . . . . E na teirake te natannaomata teuana ni buakana te natannaomata teuana, ao te tautaeka n uea teuana ni buakana te tautaeka n uea teuana.”—Mataio 24:6, 7.

Te itabarara ae tabe n riki ngkai n te Middle East, bon teuana mai buakoni kanikinaean “tokin te waaki ae ngkai i aon te aba” are e a katereaki riki iai bwa ti a maeka “ni kabaneani boong.” (Mataio 24:3; 2 Timoteo 3:1) Buaka aika ti a nori ngkai, a kaotia bwa e nangi waekoa te Atua ni katoka te buaka ao kangaanga riki tabeua ake a rotakibuaka iai aomata.

• Ngkana ko kan reiakinna riki, wareka te kaongora ae “What Is the Sign of ‘the Last Days,’ or ‘End Times’?”

E na moanaki Aremaketon n te Middle East?

E taku te Baibara: “A ikotiia nakon te tabo ae aranaki n te taetae n Ebera bwa Aremaketon.”—Te Kaotioti 16:16.

Te buaka ae Aremaketon, bon tiaki te buaka ae riki i marenan aia tautaeka aomata, ae moanaki n te Middle East. Bon te buaka ae kabutaa te aonnaba, ae e na riki i marenan aia tautaeka aomata ma te Atua.

• Ngkana ko kan reiakinna riki, wareka te kaongora ae “Tera te Buaka ae Aremaketon?”

Tera ae e kona ni buokira bwa ti na rau ribuakoni kangaanga aika karika te tabeaianga?

E taku te Baibara: “Tai raraomaeakina te bwai teuana, ma a na kaotaki ami bubutii ni bwaai ni kabane nakon te Atua, n te tataro ma te kakorakora n tataro ni bubutii n raonaki n te katituaraoi.”—I-Biribi 4:6.

E tangirira Iehovaa ae te Atua bwa ti na tataro nakoina. Ibukina bwa e mumutiakinira te Atua, e na ongo n ara tataro ao n anganira te rau ribuakon tabeaiangara aika bati. (1 Betero 5:7) Te anga teuana ae e karaoa iai aei, boni man arona ni kamataataira tiaki tii ni kaineti ma bukin rikini buaka ma aron naba katokaia, ao te bwai ae e na karaoia ni katoka iai marakira ma rawawatara.—Te Kaotioti 21:3, 4.

• Ngkana ko kan reiakina riki aron te Atua ni katauraoa buokara, wareka te kaongora ae “You Can Find Words of Comfort in the Bible.”