E na Kaekai Au Tataro te Atua?

Ana kaeka te Baibara

Eng. E oti n te Baibara ao baika riiriki ni maiura bwa e boni kaekai tataro te Atua. E taku te Baibara: “E kanuaiia akana maakua ni baika a tangiri. E ongo tangia ni kani buokaki ao e kamaiuia.” (Taian Areru 145:19) Ma kaekaan am tataro iroun te Atua e boboto riki mairoum.

Baika kakawaki iroun te Atua

• Tataro nakon te Atua, ao tiaki nakon Iesu, Maria, taian santo ke santa, anera, ke katotongani bwaai. Tii Iehova ae te Atua “te tia Ongo te tataro.”​—Taian Areru 65:2.

• Tataro n te aro ae boraoi ma nanon te Atua, ke ana kaetieti aika n te Baibara.​—1 Ioane 5:14.

• Tataro rinanon aran Iesu, ni karinea iai mwiokoana. E taku Iesu: “Akea ae e na nakon te Tama ma tii ane e rirou.”​—Ioane 14:6.

• Tataro ma te onimaki, ao bubutii kakorakoraan riki am onimaki.​—Mataio 21:22; Ruka 17:5.

• Kananorinanoko ao nanona raoi am tataro. E taku te Baibara: “E ngae ngke e rietata Iehova, ma e noriia akana nanorinano.”​—Taian Areru 138:6.

• Botumwaaka. E taku Iesu: “Teimatoa ni bubutii ao kam na anganaki.”​—Ruka 11:9.

Baika aki kakawaki iroun te Atua

• Am reeti ke abam. “E bon aki inanonano te Atua, ma a butimwaeaki irouna aomata nako aika maakua ma ni kakaraoa ae raoiroi, mai buakoia natannaomata nako.”​—Mwakuri 10:34, 35.

• Teim n tataro. Ko kona n tataro nakon Iehova ngkana ko tekateka, ko bobaraaki, ko katorobubua, ke ko tei.​—1 Rongorongo 17:16; Neemia 8:6; Taniera 6:10; Mareko 11:25.

• Ko tataro ni kabaibati ke ko tataro i nanom. E kaekai naba tataro te Atua aika ti taekin i nanora, aika aki atai aomata.​—Neemia 2:1-6.

• A rangi ni kakawaki tabeaiangam ke a aki. E kaungako te Atua bwa ko na ‘kabanei am iango n raraoma ni kaaki i aona, ibukina bwa e mumutiakiniko.’​—1 Betero 5:7.