A Bita Kanoan te Baibara Ana Tia Kakoaua Iehova ni Kaboraoia ma Aia Koaua?
Ti bon aki karaoa anne. Ma ngkana ti kunea bwa a aki boraoi raoi ara koaua ma te Baibara, ti boni bitii ara koaua.
N te tai ae e a rangi ni maan imwaini moanakin rairan Te Baibara ae Tabu—Te Rairai ae te Aonnaba ae Boou n 1950, ti bon nenera te Baibara. Ti kamanenai Baibara nako ake a kona n reke iroura, ao ti kabotoi iai ara koaua. Iangoi katoto tabeua ni kaineti ma aia koaua ake a a rangi ni maan Ana Tia Kakoaua Iehova, ao iangoia i bon iroum bwa a boraoi ma ana reirei ni koaua te Baibara ke a aki.
Te bwai ae ti kakoauaa: Bon tiaki te Temanna n teniman te Atua. E taekinaki ae kangai n te Zion’s Watch Tower ae bwain Turai 1882: “A ataia naake a wawareki ara boki bwa e ngae ngkai ti kakoauaa Iehova, Iesu, ao te Taamnei ae raoiroi, ma ti rawa ni kakoauaa te reirei ae e bon aki boraoi ma ana reirei te Baibara, are aongkoa Atua aika teniman aikai bon te aomata ae tii temanna, ke n aron ae a kakoauaa tabeman, te Atua ae temanna ma iai teniman aomata i nanona.”
Te bwai ae taekinaki n te Baibara: “Iehova ae Atuara bon Iehova ae ti temanna.” (Te Tua-Kaua 6:4, Te Baibara): “Ti temanna te Atua, ae te Tama, are e kariki bai ni kabane ao ae ti maiu i bukina, ao ti temanna te Uea ba Iesu Kristo are a bane ni karikaki bai irouna ao ae ti maiu irouna.” (1 I-Korinto 8:6, Baibara ni Katorika) Bon Iesu ae kangai: “E kakanato riki te Tama nakoiu.”—Ioane 14:28, Baibara ni Katorika.
Te bwai ae ti kakoauaa: Akea te kammarakaki n aki toki n te ai ni moone. Ni mwanewean I-Rom 6:23 man te King James Version n te Zion’s Watch Tower ae bwain Tun 1882, n te kaongora ae atuna “Boon te Bure te Mate,” e taekinaki iai ae kangai: “E boni mataata ao ni kai ataaki nanon te taeka aei. Ai kamimira ngkai a rangi ni bati ake a taekinna bwa a kakoauaa ae te Baibara bon Ana taeka te Atua ma a teimatoa ni kaitaraa te taeka ae koaua aei, ao a kamatoaa n taekinna bwa a kakoauaa, ae e reirei te Baibara bwa, boon te bure bon te kammarakaki n te ai ni moone n aki toki.”
Te bwai ae taekinaki n te Baibara: “Te tamnei ae bure, e na mate.” (Etekiera 18:4, 20, Te Baibara) Tuuaaia ae te kabane naake a kaitaraa te Atua bon tiaki te kammarakaki n aki toki ma “bon te tiringaki n aki toki.”—2 I-Tetaronike 1:9, Baibara ni Katorika.
Te bwai ae ti kakoauaa: Ana Tautaeka n Uea te Atua bon te tautaeka ni koaua ma tiaki tii te bwai ae mena n te nano. Ni kaineti ma Ana Tautaeka n Uea te Atua, e taekinaki ae kangai n te kaongora n te Zion’s Watch Tower ae bwain Ritembwa 1881: “E bon irekereke katean te tautaeka aei ma kamaunaan tautaeka ni kabane aika n te aonnaba.”
Te bwai ae taekinaki n te Baibara: “N aia tai tan tautaeka akanne ao e na kateirakea te tautaeka teuana Atuani karawa. E na bon aki uruaki te tautaeka anne, ma e na kamaunai tautaeka akekei ni kabane, ao e na teimatoa ngaia n aki toki.”—Taniera 2:44, Baibara ni Katorika.
A onimakina Te Rairai ae te Aonnaba ae Boou Ana Tia Kakoaua Iehova n tii ngaia bwa e na boutokai aia koaua?
Tiaki ngaia anne, bwa ti teimatoa ni kamanenai Baibara aika bati n ara mwakuri n uarongorongo. E ngae ngkai ti bon anganako katoton Te Rairai ae te Aonnaba ae Boou n akea boona n ara reirei ma aomata ae akea te roo iai, ma ti kukurei naba n reirei ma naake a kani kamanenai Baibara riki tabeua.