Bukin Tera Bwa A Aki Bukamarua te Rekenibong Ana Tia Kakoaua Iehova?

A aki bukamarua te rekenibong Ana Tia Kakoaua Iehova ibukina bwa ti kakoauaa ae e aki kukurei te Atua n aeka ni bukamaru akanne. E ngae ngkai e aki kamataataa raoi katabuakani bukamaruan te rekenibong te Baibara, ma e boni buokira bwa ti na iaiangoi baika irekereke ma te botaki aei ao n ota n ana iango te Atua iai. Iaiangoi baika aua aikai ao ana boto n reirei te Baibara aika irekereke iai.

1. E moan riki bukamaruan te rekenibong mairouia beekan. Ni kaineti ma te boki ae te Funk & Wagnalls Standard Dictionary of Folklore, Mythology, and Legend, a moan riki bukamaru aikai man te koaua aei: N ana rekenibong temanna, “e a reke iai aia tai taamnei aika buakaka ao mwaaka tabeua ni kaaitaraia aomata aika karaoa te bukamaru” ma “n rokoia raoraon teuare bukamaruaki ana rekenibong n taekin taeka ni katekeraoi, e a kamanoaki iai.” E taekinaki n te boki ae The Lore of Birthdays bwa n taai ake rimoa, ao moan te kakawaki ataakin ana bong ni bung te aomata ibukin “te kaiwa” ae boto i aoni “kaiwanakin bwaini karawa.” E reitia ni kangai te boki aei bwa te “taura te nenea ae kauraaki n te rekenibong, a kakoauaa aomata bwa iai mwaakana ni kakororaoa te baere e tangiraki.”

   Ma te Baibara e kabuakakaa kamanenaan te mwaaka, te kaiwa, te tabunea, ke “te aeka ni mwakuri aei.” (Te Tua-Kaua 18:14; I-Karatia 5:​19-​21) Ni koauana, bukina teuana ngkai te Atua e kabuakakaa te kaawa rimoa ae Baburon, bwa kaaina a kakaiwan itoi ae bon te tabunea naba. (Itaia 47:​11-​15) A aki iaiangoi moan rikini katei nako Ana Tia Kakoaua Iehova, ma ngkana e anga te kairiri ae mataata te Baibara iai ao ti ira nanona.

2. A aki bubukamarua te rekenibong Kristian rimoa. E taekinaki n The World Book Encyclopedia bwa “a iangoa bukamaruani bungiakin temanna Kristian rimoa bwa te katei ni beekan.” E kaotaki n te Baibara bwa abotoro ao tabeman riki ake a bon reireinaki iroun Iesu, a a tia ni katea te banna ni katoto ae a riai n iria Kristian ni kabane.​—2 I-Tetaronike 3:6.

3. A kantaningaaki Kristian bwa a na tii kakauringa maten Iesu, ma tiaki bungiakina. (Ruka 22:​17-​20) Ti aki riai ni mimi n aei bwa e bon taekinaki n te Baibara bwa “e raoiroi riki te bong ni mate nakon te bong ni bungiaki.” (Te Minita 7:1) N tokini maiun Iesu n te aonnaba, e a boni karekea iai arana ae moanibaan te raoiroi i matan te Atua, ike e a kakawaki riki iai ana bong ni mate nakon ana bong ni bungiaki.​—Ebera 1:4.

4. Akea n te Baibara taekan ae e bukamarua ana rekenibong temanna ana toro te Atua. Tiaki n ae tao e mwaninga ni karinaki rongorongoia, bwa bon iai n te Baibara uoua rekenibong aika bukamaruaki irouia aomata aika tiaki ana toro te Atua. Ao botaki aika uoua aikai a boni karaoaki iai mwakuri aika bubuaka.​—Karikani Bwaai 40:​20-​22; Mareko 6:​21-​29.

E koaua bwa a tauaki baika raraoi mairouia natiia taani Kakoaua ngkai e aki bubukamaruaki aia rekenibong?

N aroia kaaro aika mwamwannano ni kabane, a kaotiota naba te tangira taani Kakoaua nakoia natiia i nanon te ririki, n aroia ni bwabwaintangiraiia ao ni karaoi botaki aika kakukurei. A kataia n toua mwin ana katoto te Atua aika rangi n raoiroi, are e kan anga bwaai aika raraoi nakoia natina. (Mataio 7:​11) A namakinna natiia taani Kakoaua bwa a aki tauaki baika raraoi mairouia n aron ae kaotaki n aia taeka aikai:

• “E kakukurei riki anganakim te bwaintangira n te tai ae ko aki kantaningaia iai.”​—Tammy ae 12 ana ririki.

• “E ngae ngke akea te bwaintangira ae I kakarekea ngkana e koro au ririki, ma a boni kakabooi bwaintangira ibukiu au karo n taai riki tabeua. I kukurei n te aro aei bwa I kukubanako iai.”​—Gregory ae 11 ana ririki

• “N am iango, n te botaki ane tii tebwina te miniti anne, keeke aika uarereke tabeua, ao te anene, e a riki naba iai bwa te botaki? Ko riai n nakomai nakon au auti ao n nora raoi aron ae bon te botaki ni koaua!”​—Eric ae 6 ana ririki.