Te Bure te Moko?

Ana kaeka te Baibara

Akea n te Baibara taekan te mokoa ke aanga riki tabeua ae ko kabongana iai te baakee. Ma iai booto n reirei iai aika a katerea ae e aki kariaia te Atua aroaro aika a na rota marurungin te rabwata ao aika a aki itiaki, ngaia are e iangoa te moko te Atua bwa te bure.

• Karinean te maiu. “Te Atua . . . boni ngaia ae anga te maiu ma te ikeike . . . nakoia aomata nako.” (Mwakuri 17:24, 25) Kioina ngkai te maiu bon ana bwaintangira te Atua, ti aki riai ni karaoa te bwai ae e na kauarerekei maiura, n aron te moko. Te moko boni ngaia teuana oini mateia aomata ni kabutaa te aonnaba.

• Tangiran raom n aomata. “Ko riai n tangira raom n aomata n aron tangiram i bon iroum.” (Mataio 22:39) Te moko i buakoia aomata, e aki kaotiota te tangira. A rangi ni kakai reke riki irouia naake a aki toki n ikeikena bubun te moko, aoraki tabeua ake a rereke naba irouia taani moko.

• Kakawakin te itiaki. “Kam na anga rabwatami bwa te karea ae maiu ae itiaki, ao ae butimwaeaki iroun te Atua.” (I-Rom 12:1) “Ti na kaitiakira mani kamwaraan nako te rabwata ma te nano, ma ni kororaoi n te itiaki ni maakakin te Atua.” (2 I-Korinto 7:1) Bon te bwai ae e aki riai te moko ao kaitaraan raoi te itiaki, ibukina bwa taani moko a karin i rabwataia n oin nanoia boitin aika a na rangi n ruanikai iai rabwataia.

E taekinaki n te Baibara kabonganaan te mwaruana ao taian drug riki tabeua ibukin te kaakibotu?

E aki taekinaki n te Baibara te mwaruana (ae ataaki naba bwa te uteute ke te pot) ke taian drug aika ai aron anne. Ma iai booto n reirei iai aika aki kariaia kabonganaani baika kona n tautorona te aba aikai ibukin te kaakibotu. Irarikini booto n reirei ake a a tia n taekinaki, a nanonaki naba iai aikai:

• Kainnanoan tiatianakin arora n iaiango. “Ko riai n tangira Iehova ae Atuam ma . . . am iango ni kabane.” (Mataio 22:37, 38) “Kawanawanaingkami.” (1 Betero 1:​13) E aki kona te aomata n iangoraoi ngkana e kabonganai taian drug n te aro ae riao, ao a bati naba aomata aika tautoronaki iai. E bane riki aia iango i aoni karekean ao kabonganaan taian drug nakon iangoani baika kaungaunga.​—I-Biribi 4:8.

• Te ongeaba nakon ana tua te tautaeka. “Ongeaba nakon taian tautaeka ao mwaaka n tautaeka.” (Tito 3:1) N aaba aika bati, ao iai aeka n drug tabeua aika taburoroko i aan te tua. Ngkana ti kani kakukureia te Atua, ti riai n ongeaba nakoia taani kairiri.​—I-Rom 13:1.