Tera Ana Taeka te Baibara Ibukin te Un?

Ana kaeka te Baibara

E angareirei te Baibara bwa e karuanikai te un ae aki tiatianaki, nakon te aomata are kakaikoa unna ao nakoia kaain rarikina. (Taeka N Rabakau 29:22) E ngae ngke n tabetai iai bukin te un, ma e taku te Baibara bwa naake a teimatoa n riki bwa taan “un” a na bon aki kamaiuaki. (I-Karatia 5:19-21) Iai booto n reirei n te Baibara aika kona ni buoka te aomata ni kekeiaki ma unna.

• E bure n taai nako te un?

• N ningai ae e a bure iai te un?

• Ko na kangaa ni kekeiaki ma unim?

• Kiibu n te Baibara ibukin te un

E bure n taai nako te un?

E aki. N tabetai iai bukin te un. N te katoto, e “rangi n un” te mwaane ae kakaonimaki are Neemia, n noraia tabeman raona n taromauri ake a karawawataaki.—Neemia 5:6.

E un naba n tabetai te Atua. N te katoto, e “urarake unin Iehova n ekiianako” ana aomata rimoa, ngke a urua aia berita are a na taromauria n tii ngaia, ao a a manga toro irouia atua aika kewe. (Taani Motikitaeka 2:13, 14) Ma bon tiaki aroaron Iehova ae rianako, te un. Iai bukin unna n taai nako ao e tiatianna.—Te Otinako 34:6; Itaia 48:9.

N ningai ae e a bure iai te un?

E a bure te un ngkana e a aki tiatianaki ke akea bukina, ae anne te aeka n un ae a kaotiotia aomata aika aki kororaoi. N te katoto:

• E “urarake unin” Kain ngke e aki butimwaeaki ana karea iroun te Atua. E kakaikoa unna Kain, n uaa ae e a tiringa tarina.—Karikani Bwaai 4:3-8.

• E ‘urarake unin’ te burabeti are Iona, ngke e kaota nanoangaaia kaain Ninewe te Atua. E kaeta Iona te Atua ni kaotia bwa e aki “riai bwa [e] na rangi n un” ao e riai n nanoangaiia taani bure ake a rairi nanoia.—Iona 3:10–4:1, 4, 11.a

E oti ni katoto aikai bwa “e aki kona unin te aomata ni karekea uaana ae ana raoiroi te Atua.”—Iakobo 1:20.

Ko na kangaa ni kekeiaki ma unim?

• Ataa karuanikain te un ae aki tiatianaki. A bae n iangoia tabeman bwa kaotan unia boni kanikinaeani korakoraia. Ni koauana, ane e aki kona n tiatiana unna bon te aomata ae rangi ni mamaara. “N aron te kaawa ae uruaki ae akea oona, ao ai aron naba te aomata ae aki kona n taua unna.” (Taeka N Rabakau 25:28; 29:11) N te itera are teuana, ngkana ti a rikirake n rabakau n tiatiana unra, ti a kaotiota iai te korakora ni koaua ao te ataibwai. (Taeka N Rabakau 14:29) E taku te Baibara: “Te aomata ae iremwe n un e raoiroi riki nakon te mwaane ae korakora.”—Taeka N Rabakau 16:32.

• Taobaraaea unim imwain ae ko na karaoa te bae ko na uringaaba iai. E kangai Taian Areru 37:8: “Kanakoa te un ao kitana te un ae korakora. Tai kauna nanom ao n rairaki nakoni karaoan ae buakaka.” Ngkana e maraki nanora, ti kona n rineia bwa ti na katoka unra imwaini “karaoan ae buakaka” iroura. Ao n aron ae taekinna I-Ebeto 4:26, “ngkana kam un ao tai bure iai.”

• Ngkana ko konaa, naako imwain ae e korakora te un. E kangai te Baibara: “Moan rikin te un kaanga ai aroni kaukani mataroan te ran. Naako imwain rebwetauan te kauntaeka.” (Taeka N Rabakau 17:14) E ngae ngke e raoiroi kanakoraoan am kangaanga ma te aomata temanna n te tai ae waekoa, ma e raoiroi riki ngkana kam kakatoki moa unimi imwain ae kam maroro raoi.

• Ataa raoi bwaninin te rongorongo. E kangai Taeka N Rabakau 19:11: “Ana ataibwai te aomata e boni kakerikaaka unna.” Ti wanawana ngkana ti kabwanina moa te rongorongo imwain ae ti a un naba. Ngkana ti ongora raoi moa bwa tera ae riki, ti na bon aki kona n un n akea bukina.—Iakobo 1:19.

• Tataroa te raunnano. E kona te tataro ni buokiko ni karekea “te rau are mairoun te Atua ae riaon aia iango aomata.” (I-Biribi 4:7) Te tataro bon te anga naba teuana ae ti kona ni karekea iai taamnein te Atua, are e kona ni karikirakei iroura aroaro n aron te rau, te taotaonakinnano, ao te taubaang.—Ruka 11:13; I-Karatia 5:22, 23.

• Rineiia raoi raoraom. Ti kani kakatotongia aomata ake ti raoraonia. (Taeka N Rabakau 13:20; 1 I-Korinto 15:33) Iai bukina ae raoiroi ngkai e anga te kauring te Baibara ae kangai: “Tai iraorao ma te aomata ae kakaiun, ao tai irekereke ma ane e unun.” Bukin tera? “Bwa ko aonga n aki reireiniko arona nako, ao ni kamwaneko i bon iroum.”—Taeka N Rabakau 22:24, 25.