I Tangiria ni Mate—E Kona te Baibara ni Buokai Ngkana E Roko ae I a Kani Bakabureai?
Ana kaeka te Baibara
E kona! Te Baibara boni mairoun “te Atua are kabebetei nanoia ake a rawawata.” (2 I-Korinto 7:6) E ngae ngke te Baibara bon tiaki te boki ibukin aorakin te iango, ma e a tia ni buokiia aika a bati n tokanikai i aoni kani bakabureaia. A kona naba ni buokiko taeka n reirei aika manena ake iai.
Baikara taeka n reirei aika manena aika n te Baibara?
● Kaotiotii am namakin.
Te bae e taekinna te Baibara: “E kaotiota te tangira n taai nako te rao ni koaua, ao boni ngaia te tari ae bungiaki ibukin tain te rawawata.”—Taeka N Rabakau 17:17.
Nanona: Ti kainnanoa aia ibuobuoki tabemwaang ngkana ti taonaki n iango aika karawawata.
Ngkana ko aki kaotiotii am namakin, ko a uouota iai te rawawata ao ko kona n taonakinako iai. Ma ngkana ko kaotiotii am namakin, ko a kauarerekea iai rawawatam ao ni karekea te kantaninga ae boou.
Kataa aei: Maroro ma temanna n te bong aei, ae tao kaain am utu ke raoraom ae ko onimakinna.a Ko kona naba ni kaotiotii am namakin n arom ni korei taekaia.
● Karekea buokam man te onnaoraki.
Te bae e taekinna te Baibara: “A aki kainnanoa te taokita aomata aika marurung, ma a kainnanoia akana aoraki.”—Mataio 9:12.
Nanona: Ngkana ti aoraki ti bon riai ni kakaaea buokara man te onnaoraki.
Te kani bakabure boni kanikinaean aorakin te iango ke te rawawatannano. E aki kamaamaa ngkana iai aorakin rabwatam, n aron anne ko aki naba riai ni maamaa ngkana iai aorakin am iango. E kona ni bwainnaorakiaki aorakin te iango ke te rawawatannano.
Kataa aei: Waekoa kakaaea buokam iroun te taokita.
● Uringnga ae e tabeakiniko te Atua.
Te bae e taekinna te Baibara: “Tiaki a kabooaki niman mannikiba aika tibaaro n uoua te maibibi ae uarereke kanoana? Ma e na bon aki mwanuokinaki temanna i buakoia iroun te Atua. . . . Tai maaku, bwa kam kakawaki riki nakoia tibaaro aika mwaiti.”—Ruka 12:6, 7.
Nanona: Ko rangi ni kakawaki iroun te Atua.
Ko bae n namakina te maroaa, ma e bon nora te bae ko rinanona te Atua. E tabeakiniko, e ngae naba ngkana e a bwara nanom n te maiu aei. E taku Taian Areru 51:17: “Ko na bon aki rawa nakon te nano ae uruaki ao ae karawawataaki, ngkoe ae te Atua.” E tangiria te Atua bwa ko na maiu ibukina bwa e tangiriko.
Kataa aei: Nenera taekan te bwai ni kakoaua man te Baibara ae e bon tangiriko te Atua. N te katoto, nora mwakoro 24 n te boki ae aanaki n te Baibara ae Kaaniko Riki ma Iehova.
● Tataro nakon te Atua.
Te bae e taekinna te Baibara: “Kabanei ami iango n raraoma ni kaaki i [aon te Atua], ibukina bwa e mumutiakiningkami.”—1 Betero 5:7.
Nanona: E tangiria te Atua bwa ko na kaotii raoi nakoina baika katabeaiangaa am iango.
E kona te Atua n anganiko te raunnano ao te korakora bwa ko na nanomwaaka n am kangaanga. (I-Biribi 4:6, 7, 13) Aei te anga ae e kakorakoraia iai naake a tataro nakoina ma nanoia ni koaua.—Taian Areru 55:22.
Kataa aei: Tataro n te bong aei nakon te Atua. Taboa arana ae Iehova ao kaotii am namakin nakoina. (Taian Areru 83:18) Butiia bwa e na buokiko n nanomwaaka.
● Kananoa am iango n te kantaninga ae n te Baibara ibukin taai aika imwaira.
Te bae e taekinna te Baibara: “Te kantaninga ae iroura aei, kaanga ai aron atinroni maiura ae koaua ao e nene ni matoa.”—Ebera 6:19.
Nanona: E kona ni bibitaki am namakin, n aron te kaibuke n tain te angibuaka, ma e kona te kantaninga ae n te Baibara ni kamatoako.
Te kantaninga anne bon tiaki tii te karioiango, ma e boto i aon ana berita te Atua are nang kamaunai bwaai aika kammarakira.—Te Kaotioti 21:4.
Kataa aei: Reiakina riki taekan te kantaninga ae n te Baibara, ni warekan reirei 5 n te boroutia ae Te Rongorongo ae Raoiroi Mairoun te Atua!
● Karaoa te bae ko unga iai.
Te bae e taekinna te Baibara: “Bon te bwainnaoraki ae raoiroi te nano ae kimwareirei.”—Taeka N Rabakau 17:22.
Nanona: Ngkana ti kakaraoi baika ti unga iai, ti na marurung riki ni kaineti ma ara iango ao nanora.
Kataa aei: Karaoa te bae ko unga iai. N te katoto, ongoraeakini katangitang aika kaungaunga, wareka te bwai teuana ae kaunganano, ke karaoa te bae ko tatangiria. E na rikirake riki kukureim ngkana ko buokiia tabemwaang, e ngae naba ngkana baika uarereke.—Mwakuri 20:35.
● Tararuaa raoi marurungin rabwatam.
Te bae e taekinna te Baibara: “E manena . . . te kamarurung.”—1 Timoteo 4:8.
Nanona: Ti buokaki n te kakamarurung, ni karekean te matu ae tau, ao ni kanakin amwarake aika kamarurung.
Kataa aei: Nakonako ni kawaekoakoako i nanon tao tii 15 te miniti.
● Uringa are a bibitaki ara namakin ao baika riiriki n te maiu aei.
Te bae e taekinna te Baibara: “Kam aki ataia bwa tera aroni maiumi ningabong.”—Iakobo 4:14.
Nanona: E na bon aki teimaan te kangaanga ae karawawata ae taraa n riaon am konaa.
N aki ongeia bwa karawawatara baika riki nakoim ngkai, ma e kona ni manga bitaki ningabong. Ngaia are kakaaei aanga aika a na buokiko n nanomwaaka iai. (2 I-Korinto 4:8) A boni kona ni bitaki imwina riki baika karawawata aika riki nakoim, ma ko aki kona ni kaoka maium ngkana ko bakabureiko.
Kataa aei: Wareki rongorongo n te Baibara ae taekaia aomata ake a bwara nanoia ao n tangiria ni mate, ao nora aron nakoraoini maiuia teutana imwin teutana, ao n angiin te tai a bitaki n te aro ae a aki kantaningaia. Iangoi katoto tabeua.
Iai n te Baibara taekaia aomata aika tangiria ni mate?
Iai. Ti tuangaki n te Baibara taekaia tabeman ake a tangiria naba ni mate. E aki un nakoia te Atua ma e buokiia. E kona ni karaoa naba anne nakoim.
Eria
● Antai teuaei? Eria bon te burabeti ae ninikoria. Ma e bon rotaki naba n te bwarannano. E taku Iakobo 5:17: “Eria bon te aomata naba n ai arora.”
● E aera ngke e tangiria ni mate? N te taina ao e a namakinna bwa e a tiku n tii ngaia, e a maaku, ao ai akea bonganana. Ngaia are e a bubutii ni kangai: “Iehova, an anaa maiuu ngkai.”—1 Uea 19:4.
● Tera are e buokaki iai? E kaotii ana namakin Eria nakon te Atua. E kangaa te Atua ni kaungaa teuaei? E kaota tabeakinana ao E katerea koauani mwaakana. E karaua naba nanon Eria n tuangnga bwa e teimatoa ni bongana irouna, ao e karekea te tia buokia ae akoi ao ni konabwai.
▸ Wareka taekan Eria: 1 Uea 19:2-18.
Iobi
● Antai teuaei? Iobi bon te mwaane ae kaubwai ae iai ana utu ae bubura ao e kakaonimaki n taromauria te Atua ae koaua.
● E aera ngke e tangiria ni mate? E riki te bitaki ae korakora ni maiun Iobi. A bane ni bua ana bwai. A bane ni mate natina n te kabuanibwai ae tii teuana. E reke te aoraki ae kammaraki irouna. Ao e bukinaki n te aro ae karawawata, bwa aongkoa boni ngaia ae karikii ana kangaanga. E taku Iobi: “I ribaa maiuu, I aki kan teimatoa ni maiu.”—Iobi 7:16.
● Tera are e buokaki iai? E tataro Iobi nakon te Atua ao ni maroro ma tabemwaang. (Iobi 10:1-3) E kaungaaki iroun raoraona ae atataiaomata are Eriu, are e a buokia bwa e na iangoa ana kangaanga n te aro ae kaokoro. Ma ae kakawaki riki, e butimwaea te reirei ni kairiri Iobi mairoun te Atua ao ana ibuobuoki.
▸ Wareka taekan Iobi: Iobi 1:1-3, 13-22; 2:7; 3:1-13; 36:1-7; 38:1-3; 42:1, 2, 10-13.
Mote
● Antai teuaei? Mote bon aia tia kairiri tibun Iteraera rimoa ao bon te burabeti ae kakaonimaki.
● E aera ngke e tangiria ni mate? E rangi ni mwaiti tabeni Mote, ao e aki toki ni kabuakakaaki ike e a bwara iai nanona. Ngaia are e a tang nakon te Atua ni kangai: “Taiaoka kamateai naba ngkai.”—Warekaia Iteraera 11:11, 15.
● Tera are e buokaki iai? E kaota ana namakin Mote nakon te Atua. E buoka Mote te Atua n arona ni kabebetea uotana bwa e aonga n aki rawawata.
▸ Wareka taekani Mote: Warekaia Iteraera 11:4-6, 10-17.
a Ngkana e a roko ae ko a kani bakabureiko, ao akea am utu i rarikim, tarebooni taabo ake a tabe ma kangaanga aika karina.