E Aera Iesu Ngkai E Aranaki Bwa Natin te Atua?

Ana kaeka te Baibara

E araranaki Iesu n te Baibara bwa “Natin te Atua.” (Ioane 1:49) Te taeka ae “Natin te Atua” e kakoauaaki iai bwa te Atua bon te tia Karikiriki, ke Nibwan te maiu, n ikotaki ma maiun Iesu. (Taian Areru 36:9; Te Kaotioti 4:11) E aki reiakinaki n te Baibara bwa e karika natina te Atua, n aroia kaaro aika aomata ngkana a karikiia natiia.

A aranaki naba anera n te Baibara bwa “natin te Atua ae koaua.” (Iobi 1:6) Ao e taekinaki n te Baibara bwa te moan aomata are Atam bon “natin te Atua.” (Ruka 3:38) Ma ibukina bwa Iesu bon ana moani karikibwai te Atua ao e boni karikia n tii ngaia, e a kabwarabwaraaki n te Baibara bwa Iesu bon Natin te Atua ae te kabanea ni kakannato.

• E maeka Iesu i karawa imwain ae e bungiaki n te aonnaba?

• Tera ae e karaoia Iesu imwain rokona n te aonnaba?

E maeka Iesu i karawa imwain ae e bungiaki n te aonnaba?

Eng. Bon te taamnei Iesu i karawa imwain ae e bungiaki bwa te aomata n te aonnaba. Bon Iesu ae kangai: “I ruo mai karawa.”​—Ioane 6:38; 8:23.

E karikaki Iesu iroun te Atua imwain ae e karikii bwaai ni kabane. E taku te Baibara ni kaineti ma Iesu:

• “Boni ngaia . . . te moanibung i buakoni baika karikaki ni kabane.”​—I-Korote 1:15.

• Boni ngaia “ana moani karikibwai te Atua.”​—Te Kaotioti 3:14.

E kakororaoa Iesu te taetae ni burabeti ibukin teuare “e a kaman riki man taai ake rimoa, ao mani boong ake ngkoangkoa.”​—⁠Mika 5:2; Mataio 2:​4-6.

Tera ae e karaoia Iesu imwain rokona n te aonnaba?

E rangi n rine arona i karawa. E taekina arona aei Iesu ngke e tataro ni kangai: “Kamimitongai ngkai Tamau . . . n te mimitong are mimitongiu i rarikim imwaini karikan te botannaomata.”​—Ioane 17:5.

E buoka Tamana ni karikii bwaai ni kabane. E mwamwakuri Iesu i rarikin te Atua “bwa te tia mwakuri ae mwaatai.” (Taeka N Rabakau 8:30) E taku te Baibara ni kaineti ma Iesu: “Nikirani bwaai ake i karawa ao i aon te aba, a boni karikaki rinanon teuaei.”​—I-Korote 1:16.

E mwakuri te Atua rinanon Iesu ni karikii bwaai ni kabane. A riki naba n te karikibwai aei anera ni kabane ao ai te iuniweeti. (Te Kaotioti 5:11) N itera tabeua ao te kaai n reitaki i marenan te Atua ao Iesu aei, kaanga ai aron te reitaki i marenan te tia korea taamnein te kateitei ao te tia kateitei. E korea te taamnei te tia korea taamnein te kateitei, ao e mwakuria te taamnei anne te tia kateitei.

E riki bwa te Taeka. Ngkana e taekinaki n te Baibara maiun Iesu imwain rikina n aomata, ao e taekinaki iai bwa “te Taeka.” (Ioane 1:1) E teretere iai bwa e kabongana Natina te Atua bwa e na karorokoa te rongorongo ma kaetieti nakoia anera ake tabeman riki.

E taraa naba n ae e riki Iesu bwa ana tia Taetae te Atua nakoia aomata ni menana n te aonnaba. Ngkai te Taeka Iesu, e bae n taetae te Atua rinanona ngke e anga kaetieti nakon Atam ma Ewa n te onnaroka are i Eten. (Karikani Bwaai 2:​16, 17) Tao bon Iesu te anera are e kairiia I-Iteraera ngkoa rinanon te rereua ao bwanaana naba are a riai n ongeaba iai I-Iteraera.​—Te Otinako 23:​20-23.a