Tera Ana Taeka te Baibara Ibukini Kabwakaan te Teei ae Tuai ni Bungiaki?

Ana kaeka te Baibara

E aki kabongana te taeka ae “kabwakaan te teei ae tuai ni bungiaki” te Baibara ni kabwarabwaraa iai kamatean te teei ae e a tibwa beru. Ma a bati kibun te Baibara aika kaota ana iango te Atua ibukini maiun te aomata, ae nanonaki naba iai te teei ae tuai ni bungiaki.

Te maiu bon te bwaintituaraoi mairoun te Atua. (Karikani Bwaai 9:6; Taian Areru 36:⁠9) E iangoa te maiu bwa te bae rangi ni kakawaki, n ikotaki naba ma maiun te teei are i nanon te biroto. Ngaia are ngkana iai ae e tiringa te teei ae tuai ni bungiaki n oin nanona, titeboo anne ma te tiriaomata.

E kangai ana Tua te Atua nakoia I-Iteraera: “Ngkana iai aomata aika boo n un ao a kaikoaka te aine ae bikoukou n te aro ae e a rimoan ana tai ni bung neienne, ma akea ae e mate iai, e riai teuare bure ni kaboomwi ibukini kangaanga ake e karekei, ni kaineti ma are e baireia buun te aine anne, ao e na kabwakaa ni kaineti ma aia baire taani moti. Ma ngkana iai ae e mate, ko na kabooa ngkanne te maiu ni boona ae te maiu.”​—⁠Te Otinako 21:​22, 23.a

• E moanaki n ningai maiun te aomata?

• E na kabwaraa te Atua ana bure ane e kabwakaa natina?

• E bure kabwakaan te teei ngkana e a ruanikai maiun te tina ke te teei anne?

E moanaki n ningai maiun te aomata?

E iangoa maiun te aomata te Atua bwa e moanaki man te tai are e kaitiboo iai ana man ni kariki te mwaane ao te aine. N ana Taeka ae te Baibara, ao e aki toki te Atua n taekina te teei ae tuai ni bungiaki bwa te aomata. Iangoi katoto tabeua ake e oti iai bwa titeboo iroun te Atua maiun te teei are i nanon te biroto ma te teei are e a tia ni bungiaki.

• Ni kairan te Uea are Tawita n te taamnei ae raoiroi, ao e kangai nakon te Atua: “A norai naba matam ngke I a tibwa beru.” (Taian Areru 139:16) Te Atua e a kaman iangoa Tawita bwa te aomata, mangke e tuai ni bungiaki teuaei.

• Irarikin anne, imwaini bungiakin te burabeti ae Ieremia, ao e a kaman ataia te Atua ae iai te bwai ae okoro ibukina. E taku te Atua nakoina: “I kinako imwain ae I kateiraoiko i nanon te biroto, ao I katabuko imwain ae ko bungiaki. I karaoiko bwa te burabeti nakoia natannaomata.”​​—⁠Ieremia 1:⁠5.

• Te tia korea te Baibara are Ruka ae te taokita, e kabongana te taeka ni Kuriiti ae tii teuana ni kabwarabwaraa iai te teei ae tuai ni bungiaki ao ae e a tibwa bungiaki naba.​​—⁠Ruka 1:41; 2:​12, 16.

E na kabwaraa te Atua ana bure ane e kabwakaa natina?

A kona ni kabwaraaki aia bure iroun te Atua naake a a tia ni kabwakai natiia. Ngkana a a butimwaea ana iango te Atua ni kaineti ma te maiu, a aikoa ngkanne riai n taonakinako n te uringaaba ibukin aia bure. “E nanoanga Iehova ao e atataiaomata . . . n ai aron raroan otin taai ma bungin taai, ao ai arona naba ni kararoai ara bure mairoura.”b (Taian Areru 103:​8-12) E na kabwarai aia bure aomata nako ake a raraoma raoi n aia bure ake rimoa, n ikotaki naba ma kabwakaan te teei.​​—⁠Taian Areru 86:⁠5.

E bure kabwakaan te teei ngkana e a ruanikai maiun te tina ke te teei anne?

E oti n te bae taekinaki n te Baibara ibukini maiun te teei ae tuai ni bungiaki, bwa bon akea riaini kabwakaana ngkana iai te aoraki ae e na ruanikai iai te tina ke te teei.

Ma tera arona ngkana e a riki te bae e aki bati n riiriki n tain te bung, ao e a kainnanoaki bairean ae antai ae e na kawakinaki maiuna, te tina ke natina? Ngkana e riki anne, bon aia bwai naake iai irekerekeia ma te tina ke te nati ni baireia bwa antai ae e na kawakinaki maiuna.