A Kairoroiia Natiia Ana Tia Kakoaua Iehova Bwa A na Kaaina Aia Aro?

A aki, ibukina bwa taromaurian te Atua e bon nakon ana motinnano te aomata. (I-Rom 14:12) A reireinia natiia Ana Tia Kakoaua Iehova booto n reirei man te Baibara, ma ngkana a ikawai naati, a a riai ngkanne n tatabemania nako ni baireia bwa a na riki bwa Ana Tia Kakoaua Iehova ke a na aki.​—I-Rom 12:2; I-Karatia 6:5.

N aroia angia kaaro, a tangira naba ae te kabanea n tamaroa ibukia natiia Ana Tia Kakoaua Iehova. A reireinia natiia baike a taku bwa a na kabwaia iai, n aron rabakau aika manena, n ikotaki naba ma booto n reirei ibukin te aroaro ni maiu ae riai, ao aia koaua n aia Aro. A kakoauaa Ana Tia Kakoaua Iehova ae te Baibara e boutokaa reken te maiu ae te kabanea n tamaroa, ngaia are a karina i nanoia natiia kakawakin anne, n aroia n reirei ma ngaiia n te Baibara ao ni kakaaei botaki n taromauri ma ngaiia. (Te Tua-Kaua 6:6, 7) Ngkana a ikawai naati, e kona temanna ma temanna ni baireia bwa e na ira ana Aro ana karo ke e na aki.

• A bwabetitoiia merimeri Ana Tia Kakoaua Iehova?

• A katinanikuia natiia ngkana a rawa ni bwabetitoaki Ana Tia Kakoaua Iehova?

• A aera ngkai a kakairiia natiia n uarongorongo Ana Tia Kakoaua Iehova?

• A boutokai boongi ni motirawa ke bukamaru riki tabeua Ana Tia Kakoaua Iehova?

• Tera aia namakin naake a kaikawaaki bwa Ana Tia Kakoaua Iehova?

A bwabetitoiia merimeri Ana Tia Kakoaua Iehova?

A aki. E aki kariaia te Baibara bwabetitoaia merimeri. N te katoto, e kaotia bwa i mwaini bwabetitoaia Kristian ake n te moan-tienture, ao a bon ongora n te rongorongo ao ‘a butimwaeia ma te kukurei’ ao n rairi nanoia. (Mwakuri 2:14, 22, 38, 41) Ngaia are ngkana e na bwabetitoaki temanna, e riai n ikawai raoi n te aro ae e na ota n ana reirei te Baibara, e na kakoauaa, ao e na kona ni karaoa ana motinnano bwa e aonga ni maiuakini reirei akanne. Akanne bwaai aika e aki kona ni karaoi te merimeri.

Ngkana a ikawai naati, a nang kona ni baireia bwa a na bwabetitoaki. Ma karaoan anne, a riai n ota n aia motinnano are a karaoia.

A katinanikuia natiia ngkana a rawa ni bwabetitoaki Ana Tia Kakoaua Iehova?

A aki. E ngae ngke a rawawata kaaro aika taani Kakoaua ngkana e rawa natiia ni kaaina aia Aro, ma a bon tangiria naba ao tiaki n ae a boni katoka naba reitakia ma ngaia tii ibukin ae e rawa n riki bwa te tia Kakoaua.

A aera ngkai a kakairiia natiia n uarongorongo Ana Tia Kakoaua Iehova?

A bati bukina ngkai ti kakairiia natira n ara mwakuri n uarongorongo.a

• E tua te Baibara nakoia kaaro bwa a na reiakinia natiia taekan te Atua, a na kataneiaia natiia bwa a na taromauria te Atua. (I-Ebeto 6:4) Kioina ngkai te taromauri e irekereke ma kaotiotan ara onimaki i mataia aomata, ngaia are te uarongorongo bon teuana naba te anga ae a kona n reireinaki iai ataei taekan te Atua.​—I-Rom 10:9, 10; Ebera 13:15.

• E kaungaia te koraki aika a ataei riki te Baibara bwa a na “karaoiroa aran Iehova.” (Taian Areru 148:12, 13) Te anga ae kona ni karaoiroaki iai te Atua bon man tataekinana nakoia tabemwaang.b

• A kakabwaiaaki ataei n aanga aika bati n aroia n uarongorongo ma aia karo. N te katoto, a reireinaki iai aroia ni maroro ma aeka n aomata nako, ao a karekei aeka n aroaro aika kakawaki n aron te nanoanga, te akoi, te karinerine, ao te momoaaomata. A kona naba n atai riki kiibu aika aana aia onimaki.

A boutokai boongi ni motirawa ke bukamaru riki tabeua Ana Tia Kakoaua Iehova?

A aki ira bukamaruan aia bongi n toa Aaro ke boong ni bukamaru riki tabeua aika e aki kukurei iai te Atua Ana Tia Kakoaua Iehova.c (2 I-Korinto 6:14-17; I-Ebeto 5:10) N te katoto, ti aki bukamarui rekenibong ke te kakiritimati, aika boong aika nako mairouia naaka tiaki Kristian.

Ma e ngae n anne, ti kukurei ni kabanea ara tai ma ara utu ao n anganga ma te tituaraoi nakoia natira. N oneani mwin ae ti na tii botaki ma ara utu ao n anga bwaintangira n tii taai aika onoti n te ririki, ti boni bobotaki ao n anganga bwaintangira ni katoabong i nanon te ririki.