E a rikirake ni buakaka riki maiu

AROU RIMOA:

I ikawairake i Los Angeles, California, U.S.A ao a kinaaki angiini kaain taabo ake a uakaan ma te kaawa anne bwa kaain te kaeng ni buraakiako ao n drug. Onoman mwaitira irouia ara karo ao bon te kauoman ngai.

E kaikawaira tinara i nanon te Aro. Ma e ngae n anne, I maiuakina te maiu ae kiriuoua ngke tebwi tabun au ririki. I anenene ma kaain te kurubu n anene ni katoa Taabati, ma nikiran te bong I nanako ni kaei botaki ni kakukurei, I kamanenai taian drug n te aro ae riai ao ni karaoi mwakuri ni wene ni bure.

I a rikirake n iowawa ao ni kabonganai naba bwaai n tiritiri ngkana I un. I bon aki buokaki ni baika I reiakini n te Aro. I aki toki n taekinna ae “te tia irantanga te Atua ao bon ana bwai ni mwakuri ngai!” Ni menau n te reirei n raabanen 1960 ao e a korakora rotakiu n te botaki ae te Black Panthers are a kinaaki ibukini kariteia ibukin inaomataia aomata. I boni kaaina te botaki aei are ti a tei iai ibukia raora n reirei. E aki toki ni kainaki te reirei n taai ake ti kaoia iai ataei bwa a na matakuakini ara waaki ni karitei.

N taraana, e aki rauaki nanou ni karaoani mwakuri n iowawa. Ngaia are I a moana raonakia aomata aika kakaraoi mwakuri ni kairiribai. N te katoto, I matakuakini birim ma raoraou n te tai teuana ae kaotaki iai aroni karawawataia ngkoa kaain Aberika ngke a tautoronaki n te United States. Ti rangi n un n te mwakuri n ribuaka anne, ngaia are ti a tiriboia naba rooro n rikirake aika Imatang n te tabo n taamnei n te tai anne. Imwina, ti a manga kakaaeia riki tabeman Imatang n te tabo anne bwa ti na tiriboia.

E a kaani koro uabwi au ririki n te tai are ti kakaraoi iai mwakuri n iowawa ngai ma tariu aika teniman. Ti aki toki n reke n te kangaanga irouia taan tautaeka. E kaaina te kaeng ae rangi ni kinaaki tariu temanna ae uarereke riki nakoiu ao I bon iriria naba. E a rikirake ni buakaka riki maiu.

ARONI BITAKINI MAIU MAN TE BAIBARA:

Boni kaain Ana Tia Kakoaua Iehova ana karo raoraou temanna. A kaoai nakon aia taromauri ao I butimwaea te kakao anne. Man te tai anne ao I noria bwa a bon rangi ni kaokoro taani Kakoaua. A bane n toa n te Baibara ao ni kabongana n tain te taromauri. A anganga naba aia kabwarabwara rooro n rikirake n tain te botaki! E ringaki naba nanou ngke I ongo ae iai aran te Atua bwa Iehova ao ni kakabonganaaki. (Taian Areru 83:18) E kaainaki te ekaretia n reeti aika bati ma e kangaanga norakin te kakaokoroaki iai.

I bon aki tangiria n reirei n te Baibara ma taani Kakoaua n te moan tai, ma I tangiria n irira aia taromauri. Ni menau n aia taromauri n te tairiki teuana ao a kaea naba te kamataku teuana raoraou. Ikanne are a a kamwarua iai temanna te teinimwaane ae tebwi tabun ana ririki ni karokoa matena, ibukina bwa e rawa n anga ana kooti ae karaoaki mani kunin te man. A rangi ni kamoaia n te bwai are a karaoia n te bong are imwina. A bon aki iangoia ae rangi ni kakamaaku ngkana a kateaki n te boowi. Angia mai i buakoia a boni kabureaki ni karokoa mateia. Ibukin anne, I rangi ni kukurei bwa I aki mena i buakoia n te tairiki anne. I a motinnanoia ngkanne bwa N nang bita maiu ao ni moana te reirei n te Baibara.

E korakora bwainakin te riribai i marenaia reeti, ma I rangi ni mimi irouia taani Kakoaua. N te katoto, ngke e nangi nako te tia Kakoaua ae te Imatang ao e katikuia natina bwa a na tararuaaki irouia kaain te utu ae a bwatabwata. E butimwaeaki naba te roro n rikirake ae bwatabwata irouia kaain te utu teuana aika Imatang ni kamaekaa i rarikia. I a kakoauaa ae tonuraoi ana taeka Iesu are e koreaki n Ioane 13:35 nakoia kaain Ana Tia Kakoaua Iehova ae kangai: “Ane a na ataingkami aomata ni kabane bwa bon taan rimwiu ngkami, n aei: ngkana kam itangitangiri.” I a ataia ae I a kunea te botaki n itaritari ni koaua.

I a moanna n ataia ae I riai ni bita maiu man reiakinan te Baibara. I riai ni kabooua au iango n te aro are N na aki tii katoka arou ae te iowawa, ma N na noria naba bwa bon anne te kabanea n tamaroa ni maiu. (I-Rom 12:2) E tabe n rikirake au atatai teutana imwin teutana. N Tianuare 1974, I a bwabetitoaki bwa temanna kaain Ana Tia Kakoaua Iehova.

E ngae ngke I a tia ni bwabetitoaki ma I teimatoa naba ni mwakuria aroarou ae te kakai un. N te katoto, n te tai teuana ni karaoan te uarongorongo man te auti teuana ma teuana ao I a kaea naba te tia iraa are e anaa te rerio man au kaa. Ngke I a uakaan ma ngaia ao e a karenako naba te rerio ao ni birinako. Ngke I karakinna nakoia raou n uarongorongo ao e a titirakinai naba temanna kaain te kurubu ae te unimwaane n te ekaretia ni kangai: “Tera ae ko na karaoia Stephen ngke arona bwa e reke iroum teuarei?” E kammwakura au iango te titiraki anne ao e a kairai bwa N na teimatoa ni mwakuria maiuakinan te rau.

N Okitobwa 1974, I a moana kabwaninan au tai n te mwakuri ni minita ike I a karerekea 100 te aoa ni katoa namwakaina ibukin te reirei n te Baibara ma aomata. Imwina, I a karekea te mwioko teuana ae te mwakuri n anganano ni kautun aia botaki Ana Tia Kakoaua Iehova i Brooklyn, New York. N 1978, I a oki nako Los Angeles ibukin tararuaakin tinau ngkai e aoraki. Uoua te ririki imwina ao I a mare ma Aarhonda ae buu ae I tangiria. E rangi ni korakora ana boutoka nakoiu ngke ti tabeakina tinara ni karokoa matena. N te tai anne imwin maten tinau, ti a kaea te kuura ae te Watchtower Bible School of Gilead ngai ma Aarhonda ao ni mwiokoaki nako Panama, ike ti a beku iai bwa mitinare.

I kaaitara ma waaki aika bati ake a kona ni kairai nakon te mwakuri n iowawa man te tai are I bwabetitoaki iai. I ataia bwa I riai n nako mairouia aomata aika kataia ni kaunai ke I kataia ni karaua nanou. A a bati aomata n ikotaki naba ma buu aika kamoamoaai ibukin arou n tokanikai i aoni waaki akanne. I a manga boni mimi n arou aei! I aki riai ni kamoamoa ni bitaki aikai. Ma I ataia raoi bwa boni bwaai ni kakoaua bwa e kona ni bita maiun te aomata mwaakan te Baibara.—Ebera 4:12.

AROU NI KAKABWAIAAKI:

E a tia te Baibara ni karekea nakoiu te kantaninga ibukini maiu ao n reiakinai bwainan te rau ni koaua. I aikoa tiriboia aomata ma I a buokiia ni kaineti ma te onimaki. I reirei naba n te Baibara ma temanna raou n reirei are au kakairiribai ngkoa! Imwini bwabetitoakina ao e riki bwa kaain au ruu i nanon tabeua te tai. E a riki bwa raoraou ae I rangi ni kaan ma ngaia ni karokoa te bong aei. Ma ngkekei ni karokoa ngkai, ti a tia ngai ma buu ni buokia 80 aomata n reirei n te Baibara bwa a na riki bwa kaain Ana Tia Kakoaua Iehova.

I rangi ni kakaitau nakon Iehova bwa e a tia n anganai te maiu ae manena ao ni kakukurei i buakoia taari aika itangitangiri ni koaua.