Ko a tia n iangoa warekan te Baibara ma a tauko aeka n namakin aika oti i eta? A bati aika iangoia bwa e taraa ni kakua warekan te Baibara. Ma tera arom ngkana ko a noria bwa e kona te Baibara ni buokiko ni karekea te maiu ae kakukurei ma ni karaunano riki? Ao tera arom ngkana ko a noria bwa iai aanga tabeua ibukini warekana n te aro ae kakaongora riki? Ko na kan noria bwa tera ae e kona ni karekea te Baibara nakoim?

Iangoi tii taeka tabeua mairouia naake a nori kakabwaiaaia ngke a moana warekan te Baibara.

E kangai Ezekiel ae ai tibwa 20 tabun ana ririki: “I riki ngkoa bwa kaanga te aomata ae kabuta te kaa ae e aki ataa te tabo ae e na kaea. Ma e buokai warekan te Baibara bwa N na karekea te maiu ae manena. Iai i nanona taeka n reirei aika manena ake I kona ni maiuakin ni katoabong.”

E kabwarabwaraa ni kangai Frieda ae 20 tabun naba ana ririki: “I rangi ni kiunun ngkoa. Ma ibukin au wareware n te Baibara ao I a rabakau n taotaona nanou. Ibukin aei ao I a kai kawaraki riki ao a a bati riki raoraou.”

E taekina te Baibara Eunice ae te aine ae 50 tabun ana ririki ni kangai: “E a buokai bwa N na riki bwa te aomata ae raoiroi riki, ao ni bitii anuau aika aki raraoi.”

N aron ae a a tia n noria taani wareka te Baibara akanne ao mirion ma mirion riki aomata, e kona naba ni buokiko warekan te Baibara bwa ko na kimwareirei riki ni maium. (Itaia 48:17, 18) Irarikin anne, e kona naba ni buokiko (1) ni karaoi motinnano aika raraoi, (2) ni karekeia raoraom ni koaua, (3) n tokanikai i aon te rawawata, ao (4) ae e kakawaki riki, n reiakina te koaua ibukin te Atua. A roko taeka n reirei aika n te Baibara mairoun te Atua, ngaia are ko na boni kabwaia ngkana ko kakairi iai. E aki kona n anga te taeka n reirei ae buakaka te Atua.

Te bwai ae rangi ni kakawaki boni moanakini karaoana. Baikara aanga aika manena ae e na kona ni bebete ao ni kaunga iai moanakini karaoana?

Tera te anga ae e na buokiko bwa ko na unga n am wareware n te Baibara ao ni kakabwaiaaki riki iai? Nori taian reirei n ibuobuoki aika nimaua ake a a tia ni buokaki iai aomata aika bati.

Karekea te tabo ae tau. Kataia ni kakaaea te tabo ae rau. Kauarerekei baika ko na mengomengo iai bwa ko aonga ni kaatuua am iango i aon te bae ko warekia. E kona n ibuobuoki te tabo ae raoiroi iai te oota ao e boou iai te ang bwa ko na kakabwaiaaki riki man am wareware.

Karekea te iango ae riai. Kioina ngkai te Baibara boni mairoun Tamara are i karawa, ko na rangi ni kakabwaiaaki ngkana ko arona aron te ataei ae tauraoi n reireinaki iroun ana karo ae tatangira. Ma ngkana iai am iango aika aki raraoi ibukin te Baibara, kataia katinanikui bwa e aonga n reireiniko te Atua.​—Taian Areru 25:4.

Tataro imwain ae ko wareware. E kakanoa te Baibara n ana iango te Atua, ngaia are e aki kamimi ngkai ti kainnanoa ana ibuobuoki bwa ti aonga n ota iai. E berita te Atua bwa e na “anga te taamnei ae raoiroi nakoia akana butiia.” (Ruka 11:13) E kona te taamnei ae raoiroi ni buokiko bwa ko na ota n ana iango te Atua. Imwina riki ao e na buokiko bwa ko na ota n “ana bwai naba te Atua aika nano.”​—1 I-Korinto 2:​10.

Wareware n te aro ae ko na ota. Tai tii wareware bwa e aonga ni bane te bae ko warekia. Iangoa raoi te bae ko warekia. Titirakiniko titiraki n aron aikai: ‘Baikara aroaro aika I nori iroun te aomata ae I wareka taekana aei? N na kangaa ni maiuakina aei?’

Katei tiia aika okoro. N te aro bwa ko na kakabwaiaaki n am wareware n te Baibara, reiakina te bwai ae e na katamaroaa raoi maium. Ko na bae ni katei tiia n aron aikai: ‘I kan reiakina riki taekan te Atua.’ ‘I kan riki bwa te aomata ae raoiroi riki, te buu te mwaane ke te buu te aine ae raoiroi riki.’ Rinei ngkanne mwakoron te Baibara aika a na buokiko bwa ko na roko n tiia akanne.a

Ko na buokaki n reirei n ibuobuoki aika nimaua aikai bwa ko na moana karaoana. Ma n te aro raa ae e na kakaongora riki iai am wareware? Iai reirei n ibuobuoki tabeua n te kaongora ae imwina.

E kabotu? Ke e kabebetea te nano? Tera iangoan te wareware n te Baibara iroum? E boboto riki anne i aon arom ni karaoa am wareware. Ti na nora ngkai te bwai ae ko kona ni karaoia bwa e aonga n rikirake am kani wareware ao kimwareireim iai.

Rinea te rairai ae kai ota te aba iai ao e onimakinaki. Ngkana ko wareka te boki ae a kabonganaaki iai taeka aika rangi ni kangaanga ke aika aikoa bwainaki aika ko aki atai nanoia, ko na boni bae ni botu iai. Ngaia are kakaaea te Baibara ae e kamanenaaki iai te taetae ae kai ota ae e na ringa nanom. Ma e riai naba ni karauaki n rairaki ao n eti raoi.a

Kabonganai rabakau aika boou. Ni boong aikai ao e aki tii tauraoi te Baibara n rabwatana ae te boki, ma iai naba n te kaombiuta. A kona ni warekaki Baibara tabeua n te Intanete ke a kona ni karekeaki katotona ao ni warekaki i aon taiani kaombiuta, taian tablet, ke taiani mobwaao. Iai naba bwaai n ibuobuoki iai ake a na kawaekoaa kakaaeani kibun te Baibara i aon te atu ni maroro teuana, ke ko kona ni kabotaui naba taian rairai tabeua. Ngkana ko kan ongongora riki ao ko aki nano n te wareware, e tauraoi naba te Baibara n te bwanaa ae a raweaki n taetae tabeua. A bati aomata aika kan ongongora ngkana a toka i aoni baao ni mwamwananga, ngkana a uaati, ke a karaoi mwakuri tabeua ae e kona n reke iai aia tai n ongora. E aera ngkai ko aki kataa te anga teuana ae e nakoraoi iroum?

Kabonganai bwaai n ibuobuoki n te ukeuke n Reirei n te Baibara. Ko kona ni buokaki mani bwaai n ibuobuoki aikai bwa ko na kakabwaiaaki riki man am wareware. Iai mwaben aaba aika n te Baibara ake a na buokiko ni kakaaei taabo ake ko wareki taekaia, ao n ota riki ni baike a riki n aron taia ake a riki iai. Ko kona ni buokaki bwa ko na ataa ae nanonaki ni mwakoron te Baibara aika bati, man taiani kaongora n aron aika n te maekatin aei ke ake i aan “Bible Teachings” n te atureti n te Intanete ae jw.org.

Bitii am anga. Ngkana e taraa ni kakua warekan te Baibara iroum mai moana ni karokoa banena, e aera ko aki karikirakea te kani wareware iai, n arom ni wareka moa mwakorona ae kakaongora riki iroum? Ngkana ko kani kakaaea taekaia aomata aika tanoata taekaia n te Baibara, ko kona ni kataa warekan tii rongorongoia aomata aikai. E kaotaki te anga anne n te bwaoki ae, “Ukeuke n te Baibara ni Kinaia Riki Naake A Taekinaki Iai.” Ke ko bae ni kani wareka te Baibara ni kaineti ma te rongorongo teuana ma teuana ke n taai ake a riki ake a karinanaki. E aera ngkai ko aki kataa teuana mai buakon aanga aikai?

E kaokoro te Baibara ma booki nako. Iai te taeka n reirei iai mairoun ara tia Karikiriki. (2 Timoteo 3:16) Ti kona n rangi n rotaki n te rongorongo are iai. Ni koauana, e kangai te Baibara: “E maiu ana taeka te Atua ao e mwaaka.” (Ebera 4:12) Iai mwaakana ni kanakoraoa maiura n aanga aika kakawaki aika uoua, ae anganakira te kairiri ibukini maiura ni katoabong ao buokara bwa ti na ataa te Atua ao ana berita nako.​—1 Timoteo 4:8; Iakobo 4:8.

Kanakoraoa maium ngkai. E kona ni buokiko te Baibara ni karaoan am motinnano. E anga te taeka n reirei ae manena ni kaineti ma baika karinanaki aikai.

• Te reitaki ma tabemwaang.​—I-Ebeto 4:31, 32; 5:22, 25, 28, 33.

• Marurungin te iango ao te rabwata.​—Taian Areru 37:8; Taeka N Rabakau 17:22.

• Aroaro ni maiu aika riai.​—1 I-Korinto 6:9, 10.

• Kanakoraoan te kataumwane.​—Taeka N Rabakau 10:4; 28:19; I-Ebeto 4:28.a

A rangi ni kakaitau te taanga n ataei teuana i Atia ni manenan ana taeka n reirei te Baibara. A kabokorakora ngkoa ni kataneiaia i marenaia n aroia naba taanga aika bati ake a a tibwa mareaki, ni kaineti ma kinaakin aroaroia ao ni karekea te maroro n akea te imamaakin. Ma a moana maiuakinan te baere a warekia n te Baibara. Tera mwina? E taku Vicent are te buu te mwaane: “E buokai te baere I warekia n te Baibara ni kaaitarai kangaanga n tekatekara n taanga, n te aro ae tatangira. Ti buokaki mani maiuakinan ae taekinaki n te Baibara bwa e na kakukurei maiura.” E kakoauaa buuna ae Annalou ao e taku: “Ti buokaki mani warekani katoto aika n te Baibara. I a namakina ngkai te kukurei ao te raunnano n tekatekara n taanga ao n tiara aika ti uaiakin ni maiura.”

Kinaa riki te Atua. E kangai naba Vicent irarikin ana taeka ake e taekin ibukin te tekateka n taanga: “Mani wawarekan te Baibara ao I namakinna ae I a kaaniaki riki ma Iehova ngkai nakon are mai mwaina.” E kaatuua iangoan te bae kakawaki Vicent ae taekan ae e kona ni buokiko te Baibara bwa ko na kinaa riki te Atua. Ni karaoan aei, ko na aki tii kakabwaiaaki man ana taeka n reirei ma ko na kinaa naba n aron ae raoraom. Ao ko na noria bwa e kaota taekan te tai ae e na roko ae raoiroi riki, ae te tai are ko na kona n nora iai kakukurein te “maiu ni koaua” ae akea tokina. (1 Timoteo 6:19) Anne te bwai ae a aki kona ni kabwarabwaraa booki ake tabeua.

Ngkana ko baireia bwa ko na wareka te Baibara ao ni kateimatoa karaoana, ko kona naba ni karekei kakabwaia akanne ae kanakoraoani maium ngkai ao kinaakin riki te Atua. Ma ngkana ko wareka te Baibara, ko na bae n iangoi titiraki aika bati. Ao ngkana e riki anne, iaiangoa ana katoto ae raoiroi te I-Tiobia are e maiu 2,000 te ririki n nako. A bati ana titiraki ibukin te Baibara. Ngke e titirakinaki bwa e ota n te baere e warekia, ao e kaeka ni kangai: “N na kangaa n ota ngkana akea ae e reireinai?”b Ao e ingainga ni butimwaea te ibuobuoki mairoun te aomata ae e tau n riki bwa te tia angareirei i aon te Baibara, ae Biribo are te tia rimwin Iesu n taai akekei. (Mwakuri 8:30, 31, 34) N aron naba anne, ngkana ko kan ataa riki rongorongon te Baibara, ko kona ni kanakoa am bubutii n te Intanete n te atureti ae www.pr418.com, ke koroboki nakon te atureti ae kaan riki ma ngkoe aika a kaotaki n te maekatin aei. Ko kona naba n reitaki ma kaain Ana Tia Kakoaua Iehova aika ko kaan ma ngaiia, ke kawara te Tabo n Taromauri n am aono. E aera ko a aki anaa am Baibara ngkai, ao ni kariaia bwa e na kairiko nakon te maiu ae raoiroi riki?