AIA TITIRAKI ROORO N RIKIRAKE
E na Kangaa te Baibara ni Buokai?—Mwakoro 2: Karika te Wareware n te Baibara Bwa E na Kaunga
“E kona n taraa ni kabotu te Baibara, ngkana ko aki ataa arom ni warekia.” Akanne ana taeka te roro n rikirake ae Will.
Ko kan ataa arom ni wareka te Baibara n te aro ae ko na unga iai? E na buokiko te kaongora aei.
Kamaiua am wareware
Iangoia bwa ko mena i nanon te karaki. Kabonganai aanga aikai:
Rinea te rongorongo teuana man te Baibara ae ko tangiria n reiakinna. Ko kona n rinea te bwai ae riki ke te rongorongo teuana n taian Euangkerio, ke ko kona n rinea teuana mai buakon te wareware ae maiu man te Baibara n jw.org.
Wareka te rongorongo. Ko kona ni warekia n tii ngkoe, ke ko kona ni kabaibati ni warekia ma raoraom ke am utu. Temanna e kona n riki bwa te tia karaki, ao ake nikirana a riki bwa kaain te karaki ake tabeman.
Kataa teuana ke tabeua mai buakon aanga n ibuobuoki aikai:
Korea taamnein te baere ko warekia. Ke korei taamnei aika uarereke aika kaotii baika riki. Korea kabwarabwaraan te taamnei teuana ma teuana.
Korea am taibora. N te katoto, ngkana ko wareka taekan te aomata ae kakaonimaki, korei aroaron te aomata anne, ana mwakuri, ao kakabwaia ake e karekei.
Bita te karaki anne. Manga karakinna man ana taratara temanna, ao karina naba “te maroro” ma kaain te karaki ao ake a nori baika riki n te karaki.
Ngkana iai temanna n te karaki anne ae karaoa te motinnano ae aki wanawana, iangoia bwa tera ae kona n riki ngke e aki karaoa anne. N te katoto, iangoa Betero ngke e kakeaa Iesu. (Mareko 14:66-72) E na kangaa Betero ni kaeka n te aro ae raoiroi riki n te tai are e rangi ni maaku iai?
Ngkana ko rangi ni kakauiango, korea te kaotioti teuana ae boboto i aon te rongorongo man te Baibara teuana. Taekin reirei aika ti kona ni karekei man te rongorongo anne.—I-Rom 15:4.
Ko kona ni mena i nanon te baere karakinaki n te Baibara!
Ukeuke n reirei iai!
Ngkana ko rinanon raoi te rongorongo, ko kona n nori kaubwai aika raba iai. Ni koauana, e kona n riki te taeka ae tii teuana ke uoua n te rongorongo anne, bwa te bwai ae kakawaki.
N te katoto, kabotaua Mataio 28:7 ma Mareko 16:7.
E aera Mareko ngke e karina taekani manga kaotin Iesu nakoia taan rimwina “ao Betero”?
Iangoa aei: E aki nora te bwai ae riki aei Mareko, ao n taraana e reke ana rongorongo mairouni Betero.
Te kaubwai ae raba: E aera ngkai e riai n rau nanoni Betero ngke e ongo ae e kan noria Iesu? (Mareko 14:66-72) E kangaa Iesu ni kaotia bwa bon te rao ni koaua ngaia nakoni Betero? Ko na kangaa ni katotonga Iesu ao n riki bwa te rao ni koaua nakoia tabemwaang?
Ngkana ko kamaiua am wareware n te Baibara ao n rinanoi raoi rongorongo ake iai, e na rangi ni kaunga riki iroum te wareware n te Baibara!