‘A Na Tai Bwara Nanora’
“A na aki bwara nanora ni karaoan ae raoiroi.”—I-KARATIA 6:9.
1, 2. E na kanga ni kakorakoraaki ara onimaki n iaiangoan ana botaki Iehova ni katobibia te aonnaba?
E RANGI ni kakukurei iangoan ae ti kaaina te botaki ae rangi ni buburakaei n te aonnaba aei. E kabwarabwaraaki n te aro ae mataata aron Iehova ni mwakuria ana kantaninga bwa a na koro nanoia ni miitara ake ti wareki n Etekiera mwakoro 1 ao Taniera mwakoro 7. E kaira te mwakuri Iesu n ana botaki Iehova i aon te aonnaba are e kaatuuaki riki iai te mwakuri n tataekina te rongorongo ae raoiroi, tararuaan aia onimaki te koraki ake a uataboa te mwakuri aio, ao karikirakean te taromauri ae koaua ibukin Iehova. Ai boni korakorara ngkanne onimakinan ana botaki Iehova iroura!—Mataio 24:45.
2 Ti irira waakin te botaki ae kakukurei aei? E ririkirake ingaingara ibukin te koaua ke e tabe ni kekerikaaki? Ngkana ti iaiangoi aeka n titiraki aikai, ti a kona n noria bwa tao a a moanna ni bwara nanora ke tao ni bua ingaingara iai. E boni kona n riki anne. N te moan tienture ao e kakorakoraia raona ni Kristian te abotoro Bauro bwa a na iaiangoa ana katoto Iesu ibukin te ingainga n nano. E taekinna Bauro bwa a kona ni buokaki iai n “aki kua ao [a] na aki nimamate.” (I-Ebera 12:3) N aron naba anne, man neneran raoi te kaongora ae imwain aei are e kaotaki iai kakororaoani butin ana botaki Iehova, ti a kona ni buokaki ni kateimatoa ingaingara ao nanomwaakara.
3. Tera ae ti kainnanoia bwa a aonga n aki bwara nanora, ao tera ae ti na rinanona n te kaongora aei?
3 Ma e kaotia Bauro bwa e bati riki ae kainnanoaki ngkana a na aki bwara nanora. E taekinna bwa ti riai ni mwakuri ibukini “karaoan ae raoiroi.” (I-Karatia 6:9) Ngaia are ti kainnanoaki bwa ti na mwakuri. Ti na rinanoi baika a na mwakuriaki aika nimaua aika a kona ni buokira bwa ti na teimatoa n irira waakin ana botaki Iehova. Ngkanne, ti a kona ni baireia iroura ma ara utu baika ti na kaatuui ara iango iai.
BOBOTAKI IBUKIN TE IKAUNGAUNGA AO TE TAROMAURI
4. E aera ngkai ti kona n taekinna ae iteran ara taromauri ae koaua ae rangi ni kakawaki bon te kaai ni bobotaki?
4 Bon te bwai ae rangi ni kakawaki te kaai ni bobotaki irouia ana toro Iehova. A kaoaki naba anera ake i karawa bwa a na botaki i matan Iehova n taai aika riai. (1 Uea 22:19; Iobi 1:6; 2:1; Taniera 7:10) A tuangaki te botannaomata ae Iteraera rimoa bwa a na bobotaki “ba a aonga n ongo, ao ba a aonga n reirei.” (Te Tua-Kaua 31:10-12, BG) A taneiai I-Iutaia ake n te moan tienture n nanakon taian tinakoka ibukini warekan te Baibara. (Ruka 4:16; Mwakuri 15:21) E katuruturuaki kakawakin te kaai ni bobotaki mani moan tein te ekaretia ni Kristian, ao e teimatoa ni kakawaki ngkai bwa iteran naba ara taromauri. A “[kaungaia] nakon te tangira ma mwakuri aika raraoi,” Kristian ni koaua. Ti riai n teimatoa ni “kaungaira i marenara, ni kakorakoraira riki iai ngkai ti a nora [ana bong Iehova] arei bwa e a kaan.”—I-Ebera 10:24, 25.
5. Ti na kanga n ikaungaunga i marenara n ara bobotaki?
5 Te kaekaeka n taiani bobotaki bon te anga teuana ae kakawaki ibukin te ikaungaunga i marenara. Ti kaotiota ara onimaki man arora ni kona ni kaekai titiraki ake n taiani barakirabe, kabwarabwaraan te kibu teuana, taekinan te rongorongo teuana are kaotaki iai buokara mani booto n reirei man te Baibara ke n aanga riki tabeua. (Taian Areru 22:22; 40:9) Ko boni kakoauaa raoi bwa e ngae ngke tao ai iraua ara ririki ni kakaaei bobotaki, ma e bon teimatoa naba n riki bwa te bwai ni kaungaunga kakauongora n aia kaeka ake a nako mai nanoia taari aika ikawai ao ataei.
6. Ti kanga ni buokaki man ara bobotaki bwa ti na teimatoa n ara onimaki?
6 Baikara bukina riki tabeua aika e rangi ni kakawaki iai iroun te Atua bwa ti na kaai ni bobotaki n taai nako? Ti buokaki man ara bobotaki, ara runga ao bwabwaro bwa ti na ninikoria n taetae ao ni kaaitarai taeka n totoko ao te aki bwerengaki n ara aono. (Mwakuri 4:23, 31) A kakorakoraaki ara onimaki mani kabwarabwara ao maroro riki tabeua ake a boto man te Baibara. (Mwakuri 15:32; I-Rom 1:11, 12) A kona ni buokira taian reirei ao te uaia n ikaungaunga man ara bobotaki n taromauri, bwa ti na rinanon te kakukurei ni koaua ao ni “motika [rawara] mani boong aika bubuaka.” (Taian Areru 94:12, 13, BG) E kairiri Ana Komete Ibukin te Reirei te Rabwata n Tautaeka ibukini katauraoani kaetieti ni kabane n taiani bobotaki ibukia ana aomata Iehova ni katobibia te aonnaba. Ai kakaitaura ngaira ni babaire ake a karaoaki ibukira ake ti karerekei man angareirei ake a kakaraoaki n ara bobotaki ni katoa wiki i nanon te ririki!
7, 8. (a) Tera te bwai ae rangi ni kakawaki n ara bobotaki n te ekaretia? (b) Ko na kanga ni buokaki man taiani bobotaki?
7 Bon iai riki te bwai ae rangi ni kakawaki nakoni kakabwaia ake ti karerekei n tatabemanira nako man ara bobotaki. Te bwai ae rangi ni kakawaki ibukin ara kaai ni bobotaki bon taromaurian Iehova. (Wareka Taian Areru 95:6.) Ai kakabwaiaakira ngaira ngkai ti neboa Atuara ae tatangira n ara anene! (I-Korote 3:16) Ti bon riai n taromauria Iehova n taai nako rinanoni kakaaeani bobotaki n te ekaretia ao n anga naba ara kaeka iai. (Te Kaotioti 4:11) Maroaka ae ti a kaungaaki bwa “ti na aki kaaki arora ni bobotaki, n aron ae a taneiai iai tabemwaang”!—I-Ebera 10:25.
8 Ti iangoi ara bobotaki ni Kristian bwa te anga teuana are a na buokira n nanomwaaka ni karokoa te tai are e na kamauna iai Iehova te waaki ae buakaka ae ngkai? Ngkana ngaia anne, ti riai ni kakorakoraira ni kakaaei bobotaki ni kabane ngkai bon teuana naba mai buakoni “bwaai aika kakawaki riki,” e ngae naba ngkana ti rangi n tabetabe ni maiura. (I-Biribi 1:10) E na riai ni moanibwai kakawakina, n te aro are bon akea bukina ae ti na aki katiteuanaaki iai ma tarira ake a taromauria naba Iehova.
KAKORAKORAKO N UKERIA AIKA RAOIROI NANOIA
9. Ti kanga n ataia bwa e kakawaki tataekinan te rongorongo?
9 E buokira kabatiaan uataboan tataekinan te rongorongo bwa ti na teimatoa n irira waakin ana botaki Iehova. E moani waakina te mwakuri aei Iesu ngke e mena i aon te aba. (Mataio 28:19, 20) Mangkekei ni karokoa ngkai, ao e rangi ni kakawaki tataekinan te Tautaeka n Uea ao karekeaia taan rimwini Iesu n ana botaki Iehova ni kabane. A kakoauaaki naba n rongorongo ni bong aikai bwa a boutokaa naba ara mwakuri aio anera, ao a kairira nakoia te koraki ake a “tauraoi nanoia ni butimwaea te koaua ae kairiia nakon te maiu are aki toki.” (Mwakuri 13:48; Te Kaotioti 14:6, 7) E waaki naba n ara bong aikai, ana botaki Iehova i aon te aonnaba ao ni bairea aroni boutokaan te mwakuri ae kakawaki aei mai buakoni mwakuri nako. Ko moanibwaia naba ni maium te mwakuri ni minita?
10. (a) Kabwarabwaraa arora ni kateimatoai ingaingara ibukin te koaua. (b) E kanga te mwakuri ni minita ni buokiko bwa ko na aki bwarannano?
10 Ti buokaki ni kateimatoa tangiran te koaua ngkana ti rangi n ingainga n ara mwakuri ni minita. Iangoi ana taeka te unimwaane ae Mitchell ae rangi ni mwaatai ao e regular bwaiania naba. E taku: “I kani kakarakina te koaua nakoia aomata. I uringa te rongorongo teuana ae boou n Te Taua-n-Tantani ke te Awake! ao I mimi n te wanawana, te ataibwai ao nakoraoini kanoana aika kakaokoro are iai. I tangiria bwa N na kabanea riki au tai n te mwakuri ni minita n nori aroia aomata nakon te rongorongo aei, ao arou ni kauekei nanoia bwa a na ongora. E kateimatoaai au mwakuri ni minita. I kakorakoraai bwa N na karaoi baika kakawaki ni maiu ao n taraia bwa a na aki karibwaaki.” Ai arora naba bwa ti kona ni buokaki ni katabetabeara n te mwakuri ni minita bwa ti na nanomwaaka ni karokoa kabaneani boong aikai.—Wareka 1 I-Korinto 15:58.
REKENI KAKABWAIA MANI BOOKI AIKA AANAKI MAN TE BAIBARA
11. E aera ngkai ti riai ni kamanenai raoi amwarake n taamnei ake ti karerekei mairoun Iehova?
11 Te anga teuana are e kakorakoraira iai Iehova, bon man anganakira booki aika aanaki man te Baibara. Ko bae n uringa te tai teuana are ko wareka iai te boki ao ko kangai: ‘Bon aei raoi ae I kainnanoia! Titeboo ma e koreia Iehova tii ibukiu.’ Bon iai bukin namakinan anne iroum. E reireinira ao ni kairirira Iehova rinanoni booki aikai. E taku: “N na reireiko ma n tuangko te kawai ae ko na nakonako iai.” (Taian Areru 32:8, BG) Ti kakorakoraira ni karin i nanora amwarake n taamnei ni kabane ake ti karerekei ao ni kananoi ara iango iai? Ni karaoan anne, ti a buokaki bwa ti na teimatoa ni kariki uaa ao n aki kaingingaki n ara onimaki ni kabaneani boong aika kangaanga aikai.—Wareka Taian Areru 1:1-3; 35:28; 119:97.
12. Tera ae kona ni buokira bwa a na rangi ni kakawaki iroura ara boki aika aanaki man te Baibara?
12 E kakawaki iroura ara boki ake a aanaki man te Baibara ngkana ti iaiangoa te mwakuri ni kabane ibukini katauraoana. E kairaki rinanon te Komete Ibukin Rongorongo Man te Rabwata n Tautaeka te mwakuri ni kaineti ma te kakaae, te koroboki, kaetan te rairai, kabotau ao ai rairan ara boki ake a boreetiaki n ikotaki ma rongorongo aika n ara atureti n te Internet. A kanakoaki nakon aaba aika kaan ao aika raroa nako n taiani kaibuke, booki ake a a tia ni boreetiaki man aobiti n tararua ake a tabe ma te boreeti. E aera ngkai e karaoaki te mwakuri aio ni kabane? Bwa a aonga ni kanuaaki raoi n te aro n taamnei ana aomata Iehova. (Itaia 65:13) Ti bia kakabwaiaaki mani booki ni kabane aika aanaki man te Baibara aika ti karerekei man ana botaki Iehova.—Taian Areru 119:27.
BOUTOKAI BABAIRE MAN ANA BOTAKI IEHOVA
13, 14. Antai aika a boutokaa ana babaire Iehova i karawa, ao ti na kanga ni kaota naba anne i aon te aba?
13 N te miitara are e anganaki te abotoro Ioane, e nora Iesu n toka i aon te aoti ae mainaina bwa e na buakania te koraki ake a karitei nakon Iehova. (Te Kaotioti 19:11-15) Ai korakorara ara onimaki ngkai ti ataia bwa a boni memena anera aika kakaonimaki i rarikin Iesu ma taani kabiraki ake a tokanikai mai aon te aba, ake a a tia ni karekea kaniwangaia ae te maiu i karawa! (Te Kaotioti 2:26, 27) Bon aei te katoto ae moan te raoiroi ibukini boutokaan ana babaire Iehova!
14 Ai aroia naba anne te koraki ae uanao, a rangi ni boutokaa aia mwakuri tarini Kristo aika kabiraki aika a tiku ngkai i aon te aba ao ni kaira waakinan te botaki ni boong aikai. (Wareka Tekaria 8:23.) Ti na kanga ni kaota boutokaan ana babaire Iehova n tatabemanira nako? Te anga teuana bon te aantaeka nakoia taani kairiri. (I-Ebera 13:7, 17) E moanaki moa karaoan anne man ara ekaretia. Ti kaota karineaia unimwaane n te ekaretia ma mwiokoaia are a anganaki n ara taeka ibukia? Ti kaungaia natira bwa a na kaotiota karineaia mwaane aika kakaonimaki aikai ao n onimakini aia taeka n reirei man te Baibara? Irarikin anne, ti maroro ma ara utu n aroni kabonganaani kaubwaira ibukini boutokaan te mwakuri ni katobibia te aonnaba rinanon ara bwaintangira? (Taeka N Rabakau 3:9; 1 I-Korinto 16:2; 2 I-Korinto 8:12) Ti taraia naba bwa mwiokoara ae kakawaki uataboani kaitiakan ao kateimatoaan taraaraoin te Tabo n Taromauri? E tauraoi Iehova n anga taamneina n taai nako ngkana e nora te aeka ni karinerine ao ni boonnano anne. Ti karerekei buokara n taai nako rinanon te taamnei anne bwa ti na aki bwarannano ni kabaneani boong aikai.—Itaia 40:29-31.
MAIUAKINAN TE RONGORONGO AE TI TATAEKINNA
15. Bukin tera ngkai ti riai ni kabokorakora ni maiuakina ae boraoi ma ana kantaninga ae raoiroi Iehova?
15 N tokina, ngkana ti na nanomwaaka ao n teimatoa n irira waakin ana botaki Iehova, ti riai ni maiuakina te rongorongo ae ti tataekinna n arora n “tutuoa bwa tera ae e kukurei iai te Uea.” (I-Ebeto 5:10, 11) Ibukin aki kororaoira ao ana kakorakora Tatan ma te aonnaba ae buakaka aei, ti a teimatoa ni kabokorakora n taai nako ma mwakuri nako aika aki raraoi ake a na rotii maiura. Iai tabeman taari mwaane ao aine aika tangiraki mai buakomi ake a kakorakoraia ni buakan aroaro aikai ni katoabong bwa a na kawakina aia iraorao ma Iehova. Ibukin anne, e rangi n tangiriko Iehova. Ngaia are tai kabwaraa nanom! E na anganira Iehova te raunnano ae bati ngkana ti maiuakina ae boraoi ma nanona, ao e na taraia raoi bwa e na aki matebuaka taromauriana iroura.—1 I-Korinto 9:24-27.
16, 17. (a) Tera ae ti riai ni karaoia ngkana ti karaoa te bure ae kakaiaki? (b) Ti na kanga ni kakabwaiaaki man ana katoto Nei Anne?
16 Ma tera ae ti riai ni karaoia ngkana ti karaoa te bure ae kakaiaki? Waekoa karekea te ibuobuoki ngkekei naba. E na bati riki te kangaanga ngkana ti karaba ara bure. Uringnga bwa e taekinna Tawita bwa ngke e kainabwabu ibukin ana bure nako, a riki n mka riina ao e “bora ni ngirangira ni kabongnga.” (Taian Areru 32:3, BK) Eng, e kona ni kabwarai nanora n te aro are e a rota ara onimaki ao ara iango karabaan ara bure nako, ma “ane e kaotioti ma ni kitan ao e na nanoangaki.”—Taeka N Rabakau 28:13, BG.
17 Iangoa ana katoto Nei Anne.a E beku bwa te regular bwaiania ngke ai tebwi tabun ana ririki. E ngae n anne, e maiuakina te maiu ae kiriuoua are e a bon rangi n rotaki iai. E taku: “I rangi n uringaaba imwini karaoan ae bure. I nanokawaki ao I rawawata n taai nako.” Tera are e karaoia neiei? E taekinna bwa n tain te taromauri ao e kabwarabwaraaki Iakobo 5:14, 15. E namakinna n te tai anne neienne bwa e kainnanoa te ibuobuoki ao e a nakoia unimwaane n te ekaretia ibukini buokana. E ururing rikaaki ao e taku: “E korei Iehova kiibu ake a taekinaki ibukini bwainnaorakian te maneka n te aro n taamnei. E boni kangaanga ongakin te bwainnaoraki ma e kona ni kamaoa te maneka. I maiuakini kaetieti ake ni kiibu akanne ao a boni buokai.” Tabeua te ririki n nako, e a manga oki korakoran ingaingan Nei Anne n ana beku ibukin Iehova ma mataniwin nanona ae raoiroi.
18. Tera ae ti riai ni motinnanoia?
18 Bon te kakabwaia nakoira ngkai ti a maeka ni kabaneani boong aikai ao n riki naba bwa kaain ana botaki Iehova ae kabutaa te aonnaba! Ti riai ni motinnanoia bwa ti na aki kakeai bongan reirei ake ti anganaki. Ma ti riai ni kakorakoraira ma ara utu ni katoatai ni kakaaei bobotaki n taromauri n ara ekaretia, ti na taningamarau n ukeriia aika raoiroi nanoia n ara aono, ao ni karekei kakabwaiaara man ara boki ni kabane ake aanaki man te Baibara ake ti aki toki ni karerekei. Ti riai naba ni boutokaia naake a mwiokoaki bwa taani kairiri ao ni maiuakina te rongorongo are ti tataekinna. Ni karaoan aei, ti na aki tii irira waakin ana botaki Iehova ma a na bon aki bwara naba nanora mani karaoan ae raoiroi!
a E bitaki te ara.