Am Taeka—“‘Eng’ ao imwina, ‘Tiaki’”?

Iangoa riki te bwai ae riki aei: E kaoaki te tina ae akea buuna ma natina aika uoman irouia te taanga teuana n ana ekaretia, bwa a na karekea aia tai ma ngaiia n te tairiki teuana. A rangi ni kukurei natin neiei ngke e kaongoia. A rangi n ingainga nakon te tairiki anne. Ma e ngae n anne, n te bong are imwaini kawaraia te taanga anne iroun te tina arei ao a a karautaeka nakoina bwa iai te bwai ae karina n riki. E a ataa bukin aia karautaeka neiei imwina riki. Imwini kaoan te tina aei, a a kaoaki naba te taanga aei irouia raoraoia tabeman n te tairiki anne ao a butimwaeia.

Ni koauana, ti riai ni kakororaoa ara taeka ngkai Kristian ngaira. Ti aki riai n iangoia bwa ti na taekina “‘eng’ ao imwina, ‘tiaki.’” (2 I-Korinto 1:18) Ma e ngae n anne, a aki bane n titeboo baika a riki n aron ae kabwarabwaraaki ni katoto aika uoua akanne. Tao iai taai ake e a taraa n akea ara aanga bwa ti a bon riai ni karautaeka nakon ara boraraoi ake ti a tia ni karaoi. N te taina, e bon rinanon naba te aekaki anne te abotoro Bauro.

E BUKINAKI BAURO BWA E KAI BITA ANA IANGO

Ni menani Bauro i Ebeto n ana katentai ni mwananga ni mitinare n 55 C.E., ao e iangoia bwa e na rinukan Taari ae te Aegean nako Korinto ao mai ikanne e na manga nako Maketonia. E iangoia bwa e na kawara te ekaretia i Korinto te kauatai i aoni kawaina n oki nako Ierutarem ike e a teretere raoi iai bwa e na anai aia bwaintituaraoi ibukia taari ake Ierutarem. (1 I-Korinto 16:3) E mataata aei n 2 I-Korinto 1:15, 16 ike ti wareka iai ae kangai: “Ibukin te aki nanokokoraki aei, ao e reke nanou ngkoa bwa N na kawaringkami kaua, bwa kam aonga ni manga kukurei riki, ao imwin tikuu i rarikimi ni kawaiu nako Maketonia, ao N na manga okiringkami mai Maketonia, ao N na bakaborauaki iroumi nako Iutaia.”

N taraana, e tuangia taari ake i Korinto Bauro ana iango n ana reta are mai mwaina. (1 I-Korinto 5:9) Ma e aki maan imwini korean te reta anne irouni Bauro, ao e a kaongoaki irouia kaain ana auti Koroe bwa iai te kaiangatoa ae korakora n te ekaretia. (1 I-Korinto 1:10, 11) E iangoia Bauro bwa e na bita ana moani babaire ao e a korea te reta ae ti ataia ngkai bwa 1 I-Korinto. Kanoan te reta anne bon te reirei ni kairiri ao kaetakia ma te tangira irouni Bauro. E taekinna naba iai bwa e a tia ni bita kawaina ao n tuangia bwa e na nako moa Maketonia ao imwina Korinto.​—1 I-Korinto 16:5, 6.a

N taraana, ngke a karekea ana reta taari ake i Korinto ao a a bukinna tabeman abotoro ake aongkoa moan te raoiroi aroia n te ekaretia anne bwa e kai bitaki ana iango ao n aki kakororaoi ana berita. E titiraki ni kangai Bauro ibukini bukinana: “Mangaia ae ngke e a reke nanou, ao tiaki I aki manikangare iai? Ke baika I iangoi bwa N na karaoi, I karaoi ma kantaningaani kakukureian te rabwata, n te aro are N na kangai ‘Eng, eng’ ao imwina, ‘Tiaki, tiaki’?”​—2 I-Korinto 1:17; 11:5.

Ti kona n titiraki ni kangai: E koaua bwa e boni “manikangare” te abotoro Bauro ni baika a riki aikai? Ni koauana, e bon aki! Te taeka ae rairaki bwa “manikangare” e kona n nanonaki iai kai bitaki, kaanga aron te aomata ae aki onimakinaki are e aki kakororaoi ana berita. E riai n teretere raoi ana titiraki Bauro are e aki kantaningaa kaekaana ae “I karaoi ma kantaningaani kakukureian te rabwata?” nakoia Kristian ake i Korinto bwa bon tiaki ana iango Bauro bwa e na aki onimakinaki ibukini bitakin ana babaire.

E katuruturua Bauro n ana koroboki ibukin te bukibuki ni kangai: “Bwa n aron te Atua ngkai e kona n onimakinaki, ao ara taetaenikawai nakoimi bon tiaki ‘Eng,’ ao imwina, ‘Tiaki.’” (2 I-Korinto 1:18) Ni koauana, e boni karaoa ana kabanea n raoiroi Bauro ibukia taari mwaane ao aine i Korinto ngke e bitii ana babaire. Ti warekia n 2 I-Korinto 1:23 bwa e ‘aki kani karawawataia’ ngaia are e a bita ana moani babaire are e na nako Korinto. Ni koauana, e a tia n angania aia tai bwa a na kaetii bwaai imwaini kaitiboona ma ngaiia. Ni menani Bauro i Maketonia, e ongo iroun Tito bwa a ringaki nanoia n ana reta n te aro are a a nanokawaki ao n rairi nanoia ae te bwai ae e a kamani kantaningaia, ao e rangi ni kimwareirei iai.​—2 I-Korinto 6:11; 7:5-7.

TAEKINAN “AMEN” NAKON TE ATUA

E kona ni kaotaki n te bukibuki ibukini kai bitakin ana iango Bauro bwa ngkana e aki kona ni kakororaoi ana berita ni maiuna ni katoabong, e na aki naba kona n onimakinaki n ana mwakuri n uarongorongo. E ngae n anne, e kauringia kaaini Korinto Bauro bwa e a tia n uarongorongoa taekan Iesu Kristo nakoia. “Bwa Natin te Atua are Kristo Iesu, are ti uarongorongoa taekana i buakomi, are ngai ma Tirouano ao Timoteo, e aki riki bwa te ‘Eng ao imwina Tiaki,’ ma te ‘Eng’ irouna bon te ‘Eng.’” (2 I-Korinto 1:19) E koaua bwa e aki onimakinaki n aanga nako Teuare Ana Banna ni Katoto Bauro ae Iesu Kristo? Tiaki ngaia anne! E aki toki ni kaotiota te koaua i nanoni maiuna ni kabane Iesu ao n ana mwakuri ni minita. (Ioane 14:6; 18:37) Ngkana a boni bane ni koaua ma n onimakinaki baike e uarongorongoi Iesu, ao e tataekina te rongorongo naba anne Bauro, ngkanne e a onimakinaki ana uarongorongo te abotoro aei.

Ni koauana, bon “te Atua ni koaua” Iehova. (Taian Areru 31:5, BG) Ti nora aei man are e koreia imwina riki Bauro ni kangai: “N aki ongeia bwa mwaitira ana berita te Atua, ma a bane n riki bwa te ‘Eng’ rinanon teuaei” ae nanonaki iai, rinanoni Kristo. Ibukina bwa e kororaoi kakaonimakin Iesu ma te nano ae eti ni menana i aon te aba, e a kanakoi iango ni kabane ibukin te nanououa ni kaineti ma ana berita Iehova. E reitia ni kangai Bauro: “Mangaia ae rinanon naba teuaei [Iesu] are e atongaki iai ‘Amen’ nakon te Atua, bwa ti aonga n neboa te Atua iai.” (2 I-Korinto 1:20) Bon te bwai ni kakoaua Iesu nakoira ke te “Amen” bwa e na kakororaoi ana berita nako Iehova ae te Atua!

N aron ae a taekina te koaua n taai nako Iehova ma Iesu, ngkanne e kakakoroi naba nanoni baike e taekini Bauro n taai nako. (2 I-Korinto 1:19) E bon aki kai bitaki n arona ni karaoi ana berita ibukini “kakukureian te rabwata.” (2 I-Korinto 1:17) N oneani mwin anne, e “nakonako ni [kairakina] n te taamnei.” (I-Karatia 5:16) E boni karaoa ana kabanea n raoiroi ngkana e boraraoi ma aomata. Ngkana e atonga Eng, e nanonna n Eng!

E KOAUA BWA AM ENG NANONA ENG?

E bwabwainaki ni boong aikai irouia aomata aika aki maiuakini booto n reirei n te Baibara taekinan aia berita ao imwina a urui ngkana e riki te kangaanga ae aki bati ni kakaiaki ke te bwai teuana ae anainano riki nakoia. Kamanenaan “eng” ni waaki ni bitineti tiaki nanona “eng” n taai nako, e ngae naba ngkana a a tia ni kamatoaaki boraraoi n te koroboki. A bati naba aika a aikoa iangoa te mare bwa te boraraoi i marenaia aomata aika uoman ae te berita ni karokoa tokini maiuia. E kaotaki ni birirakeni mwaitin te buuraure bwa a bati aika a iangoa te mare bwa te katiteuanaaki ae aki iangoaki raoi ae e kona ni kai uruaki.​—2 Timoteo 3:1, 2.

Tera arom iai? E koaua bwa am Eng nanona Eng? Ni koauana, n aron ae e rinanoaki mai moan te kaongora aei, e kona n riki ae ko riai n taona am boraraoi, tiaki ibukina bwa ko kai bita am iango ni kaangaraoia ibukim ma bon ibukini baika riki aika riaon am kona. Ma ngkana te Kristian ngkoe ae ko berita ke ko taetae ni bau, ko bon riai ni kabanea am kona ni kakororaoia. (Taian Areru 15:4; Mataio 5:37) Ngkana ko karaoa anne, ko na kinaaki iai bwa te aomata ae ko onimakinaki, ae ko kakororaoa am taeka ao ko aki toki n tataekina te koaua. (I-Ebeto 4:15, 25; Iakobo 5:12) Ngkana a ataia aomata bwa ko kona n onimakinaki ni bwaai ni kabane ni katoabong, tao a na kukurei riki n ongora iroum ngkana ko tibwaa te koaua ibukin Ana Tautaeka n Uea te Atua. Mangaia are ti bia taraia raoi bwa ara taeka ae Eng nanona raoi Eng!