N te moan tienture, ao e tei te kurubu ae uarereke ae kaainaki irouia “abotoro ma unimwaane ake i Ierutarem,” bwa te rabwata n tautaeka are e karaoi babaire aika kakawaki ibukin aia ekaretia Kristian ake a kabiraki ni kabane. (Mwakuri 15:⁠2) Ngkana e boo nanoia n aia moti teuana, e bon reke imwin te uaia ni maroro i aoni baika taekinaki n te Baibara ao nanoraoia ni kairakia n taamnein te Atua. (Mwakuri 15:25 ) Anne ae kakaraoaki naba ni boong aikai.

E kabonganaaki iroun te Atua ibukini karaoan nanona. E korakora tangiran Ana Taeka te Atua irouia taari aika kabiraki ake a kaaina te Rabwata n Tautaeka, ao a rangi ni mwaatai ni bairea waakinan ara mwakuri nako ao ni kaekai titiraki man te Baibara. A boowi ni katoa wiki ibukin iaiangoani baika kainnanoaki n te botaki n itaritari ae katobibia te aonnaba. A kanakoi kaetieti aika boto man te Baibara rinanon reeta ke mataniwi aika mwamwananga ao tabeman riki, n aron naba are e karaoaki n te moan tienture. Ibukin anne, a a buokaki ana aomata te Atua n iango ao ni mwakuri n te aro ae a a katiteuanaaki. (Mwakuri 16:4, 5) Bon te Rabwata n Tautaeka ae tararuaa te waaki ibukini katauraoan amwarake n taamnei, karikirakean tataekinan rongorongon te Tautaeka n Uea, ao kairan rineaia taari mwaane nakoni mwiokoaia.

E waekoa ni butimwaea ana kairiri taamnein te Atua. A onimakina ana kairiri te tia Tautaeka i aoni Bwaai ni Kabane ae Iehova ao Atun te ekaretia ae Iesu, kaain te Rabwata n Tautaeka. (1 I-Korinto 11:3; I-Ebeto 5:23) A aki kan atongaki kaaina bwa mataniwi i aoia ana aomata te Atua. A kaai n teimatoa ma Kristian aika kabiraki n “ririmwin te Tiibutetei [ae Iesu] n aki ongeia bwa taabo raa ike e nako iai.” (Te Kaotioti 14:4) E rangi ni kakaitau te Rabwata n Tautaeka ngkana ti tataro ibukia ao aia mwakuri.

• Antai kaain te rabwata n tautaeka n te moan tienture?

• E kangaa te Rabwata n Tautaeka ni boong aikai ni butimwaea ana kairiri te Atua?

Te taeka ae Betaera bon te ara n Ebera, ae nanona “Maneaban te Atua.” (Karikani Bwaai 28:17, 19, BG) E tonu raoi te ara aei nakoni kateitei ake a kateaki irouia Ana Tia Kakoaua Iehova ni katobibia te aonnaba, are e babaireaki ao ni boutokaaki iai te mwakuri n uarongorongo. E beku te Rabwata n Tautaeka ni kautun ara botaki ni katobibia te aonnaba i New York State, U.S.A., ao mai ikanne are e a tararuaa te mwakuri ae karaoaki n aobiti n tararua n aaba aika mwaiti. A ataaki te koraki ake a beku n taabo akanne bwa kaain te utu ni Betaera. A uaia ni maeka ao ni mwakuri, n amwarake ao a katiteuanaaki n ukeuke n reirei n te Baibara, kaanga te utu ae tii teuana.​—Taian Areru 133:1.

Te tabo ae okoro are a anga ngaiia iai kaain te utu anne. Iai Kristian aika mwaane ao aine ni Betaera nako, aika a aanga ngaiia ibukini karaoan nanon te Atua ao ni mwakuri ni kabwanina aia tai ibukin te Tautaeka n Uea. (Mataio 6:33) A a aki kabooaki ke ni bwakabwai, ma a katauraoaki bwaai ni kabane ibukia n aron te ruu, te amwarake, ao te tianti teutana, ibukini buokan aia kabanemwane ni baika a kainnanoi. Iai mwiokoaia kaain te Betaera ni kabane, tao n te aobiti, n te tabo ni kuuka, ke n te tabo n amwarake. Iai aika beku n te tabo ni boreeti ke karinani booki ni bwaokia, ke te kaitiaki, te uaati, te onobwai ke bwaai riki tabeua.

Te tabo ae a tatabetabe kaaina ibukini boutokaan uarongorongoan te Tautaeka n Uea. Oin taben taiani Betaera nako, boni katauraoani koaua man te Baibara nakoia aomata nako ake a kona n reke. Te boroutia aei bon teuana te katoto ni kaineti ma anne. E koreaki te boroutia aei i aan ana tararua te Rabwata n Tautaeka, e kanakoaki rinanon te kaombiuta nakoia taan rairai aika bubua ma bubua mwaitiia ni katobibia te aonnaba, e boreetiaki ni Betaera tabeua ake iai irouia mitiin aika rangi ni baitii iai mwakuri ni boreeti, ao e katokaaki ni kaibuke nakon ekaretia aika e raka i aon 110,000 mwaitiia. Ni karaoani mwaneka akanne ni kabane, a a anga naba iai aia boutoka ae rangi ni kainnanoaki kaain te utu ni Betaera, nakon te mwakuri ae kaumakaki riki karaoana i buakoni mwakuri nako, ae tataekinan te rongorongo ae raoiroi.​—Mareko 13:10.

• Antai aika beku n te Betaera, ao baikara baika a katauraoaki ibukia?

• Tera te mwakuri ae kaumakaki karaoana, ae boutokaaki n taiani Betaera nako?

A karaoi mwioko aika kakaokoro kaain te utu ni Betaera, ao a tararuaa te mwakuri n uarongorongo n te aba teuana ke aaba tabeua. A kona n ibuobuoki n te tiim n rairai, ni boreeti maekatin, tibwatibwaani booki ao katokaia n te kaibuke, a rawe bwanaa ao birim, ke a tabeakini bwaai riki tabeua ake a kainnanoaki n te aono.

E tararuaa te mwakuri te Komete n Tararua n Aia Aobiti Ana Tia Kakoaua Iehova. E mwiokoaki iroun te Rabwata n Tautaeka te Komete n Tararua ae kaainaki irouia teniman taari mwaane ke e raka riki ake a tau n te mwioko aei, bwa a na tararuai aia waaki aobiti n tararua nako. A teimatoa kaain te komete ni kaongoa te Rabwata n Tautaeka rikiraken te mwakuri n aaba nako ake a mena i aan aia tararua, ao n ribootini kangaanga ake a riki. E buokaki te Rabwata n Tautaeka n ribooti akanne bwa a na iangoi baika a na rinanoaki ni booki ake imwina ao n taai ni bobotaki ao bwabwaro. A kakanakoaki bwa a na kawari aobiti n tararua taan Tei Ibukin te Rabwata n Tautaeka ao a katauraoa naba te kairiri ibukini kakororaoani mwiokoan te Komete n Tararua. (Taeka N Rabakau 11:14) E baireaki te kaetieti ae okoro n ikotaki ma ana kabwarabwara te tia tei ibukini kautun ara botaki, ibukini kaungaaia naake a mena i aan ana tararua te aobiti n tararua.

A boutokaaki ekaretia nako. A onimakinaki taari mwaane n te aobiti n tararua bwa a na anga te kariaia ibukini katean ekaretia aika boou. A tararuaa naba te mwakuri ibukia bwaiania, mitinare ao mataniwi n te aono ae uarereke ake a beku ni mwaangan aobiti n tararua. A bairea tain te runga n aono ke te bong ni botaki ae okoro ao bwabwaro, katean Taabo n Taromauri aika boou, ao ni kanakoi booki nakoia ekaretia nako ibukini kainnanoia. Mwakuri ni kabane ake a karaoaki n te aobiti n tararua, a bane ni boutokaa kakororaoan te mwakuri n uarongorongo ae baireaki raoi.​—1 I-Korinto 14:33, 40.

• E kangaa te Komete n Tararua n Aia Aobiti Ana Tia Kakoaua Iehova ni buoka te Rabwata n Tautaeka?

• Baikara baike e mwiokoaki iai te aobiti n tararua?