Aio Ana Kantaninga te Atua Ibukira?
WAREKI nuutibeeba n aekaia nako. Mataku n te TV, ke ongora n te rongorongo ae nako man te rerio. A rangi ni bati rongorongo aika taekina te mwakuri ni kakeru, te buaka, ao te tiritiri mairouia taani kakamaaka te aba! Iangoi naba kangaanga aika rotiko ake ko raraoma iai. Tao ko karawawataaki n aorakin temanna ae tangiraki iroum ke tao matena. Tao titeboo am namakin ma te aomata are raoiroi ae Iobi, are e taku bwa e a “kaonaki n te kamaamaeaki ma te karawawataaki.”—Iobi 10:15.
Titirakiniko ni kangai:
Aio ae e tangiria te Atua bwa e na riki nakoiu ao nakon te botannaomata?
E na reke ia buokau ibukini kabebetean au kangaanga?
Iai te tai teuana ae ti nang nora iai te rau i aon te aba?
Iai kaekaan titiraki aikai aika karaunano n te Baibara.
E REIREINIRA TE BAIBARA BWA TE ATUA E NA KAREKEI KAKABWAIA AIKAI NAKON TE AONNABA
“E na kaoa te rannimata ni kabane mai mataia, ao e nang akea riki te mate, ke te nanokawaki ke te tang ke te maraki.”—Te Kaotioti 21:4.
“E na ewewe te mwauku n aron te ria.”—Itaia 35:6.
“A na kaureaki mataia aomata aika mataki.”—Itaia 35:5.
“A na bane iai n ongo bwanaana aomata ake a mena i nanon taian ruanimate ao a na otinako.”—Ioane 5:28, 29.
“Akea te tia maeka iai ae e na kangai: ‘I aoraki.’”—Itaia 33:24.
“E na bati te uita n te aonnaba.”—Taian Areru 72:16.
KAREKEA KABWAIAM MAN ANA REIREI TE BAIBARA
Tai waekoa ni kakeai bongani baike a a tibwa taekinaki n iteraniba aika imwaina, bwa aongkoa bon tii karioiango. E a tia ni berita te Atua bwa e na boni kakoroi bukini baikai, ao e kabwarabwaraaki n te Baibara aroni karaoana irouna.
Ma e bati iteran nako bonganan te Baibara. E taekina kiingini kakukureiam ni koaua n te tai ae imwaira, ao ngkai naba. Iangoa moa tabeaiangam ma am kangaanga nako. E kona ni kaineti ma te kataumwane, kangaanga n te utu, te aoraki ke maten temanna ae tangiraki. E na buokiko te Baibara bwa ko na kona ni kaaitarai kangaanga ni boong aikai, ao e na anganiko te kabebeteaki mani karekeani kaekaan titiraki aikai:
Bukin tera ngkai ti rawawata?
Ti na kangaa n tokanikai i aoni katabeaiangan te maiu aei?
Ti na kangaa ni kanakoraoa riki ara utu?
Tera ae e na riki nakoira ngkana ti mate?
Ti na manga kaitiboo ma raora aika tangiraki akea a tia ni mate?
Ti na kangaa ni kakoauaa bwa e na boni kakoroi bukin ana berita te Atua nakon taai aika a na roko?
Warekan te boki aei iroum, e kaotia bwa ko kan ataia bwa baikara ana reirei te Baibara. E na boni buokiko te boki aei. Taraia bwa ni barakirabe nako, iai titiraki aika kaineti raoi ma ngaai aika mena i nano. A a tia aomata aika mirion ma mirion mwaitiia, n noria bwa te maroro n te Baibara ma Ana Tia Kakoaua Iehova, e rangi ni kaunga ngkana e waakinaki ni kabonganai titiraki ma kaeka. Ti kantaningaia bwa ko na rangi n unga naba iai. E bia mena i aom ana kakabwaia te Atua, ngkai ko a tabe n reiakina ana reirei ni koaua te Baibara!