E Maiu Ana Taeka Iehova
Reirei Aika Kakawaki Man te Katenua ao te Kaaua n Itera n te Boki ae Taian Areru
E TATARO te tia areru nakon te Atua ao e titiraki ni kangai: “E na taekinaki am tangira i nanon te rua? E na taekinaki am kakaonimaki n aia tabo mate?” (Taian Areru 88:11, BK) Ni kaekaan aei, e na aki. Ti aki kona ni kamoamoaa Iehova ngkana akea te maiu iroura. E manena maiura ngkana iai nanora ni kani kamoamoa Iehova, ao reken te maiu iroura e riai ni kaungaira bwa ti na kamoamoaa.
Te Katenua ao te Kaaua n Itera n te boki ae Taian Areru, aika kanoaia Areru 73 nakon 106, a anganira bukina aika bati aika ti riai iai ni kamoamoaa te tia Karikiriki ao ni karaoiroa arana. E na kakorakoraa tangiran “ana taeka te Atua” iaiangoan areru aikai, ao ni kairira bwa ti kabatiaa ao ni karaoiroa riki ara taeka n nebonebo nakoina. (Ebera 4:12) Ti bia rinanoni moa te Katenua n Itera n te boki ae Taian Areru ma nanora ae ingainga ni kan ongoraa.
“E RAOIROI I ROU TE KAANIA TE ATUA”
A oteaki areru aika 11 akana mai moa n te katenua n itera, iroun Ataba ke kaaini batana. E kabwarabwaraki n te moan anene taekan te bwai are e kamanoa Ataba man betinakona n ana iango aika kairua. E a reke ana motinnano ae riai ao e a anene ni kangai: “E raoiroi i rou te kaania te Atua.” (Taian Areru 73:28) E taorimwiaki aei n te bwaebwaeti ibukini kamaunan Ierutarem n te Areru 74. N Areru aika 75, 76 ao 77, e taekinaki iai ae Iehova bon te tia Motiki-Taeka ae raoiroi, aia tia Kamaiu akana nimamannei, ao te tia Ongoraei tataro. Te Areru 78, e kabwarabwaraa aroia ngkoa kaain Iteraera n ana tai Mote ni karokoa Tawita. Te Areru 79, bon te bwaebwaeti ibukin kamaunan te tembora. Te Areru are imwina, bon te tataro ibukin kamaiuaia ana aomata te Atua. Te Areru 81, bon te kaungaunga nakon te ongeaba iroun Iehova. Te Areru 82 ao 83, bon taian tataro ibukini karokoan ana motiki-taeka te Atua i aoia taani motikitaeka aika ribuaka, ao ana kairiribai te Atua.
E taku aia areru natini Kora: “E bati n tangiri nanon oni maneaban Iehova tamneiu, eng, e mate n tangiri.” (Taian Areru 84:2) Te Areru 85, bon te bubutii ibukin ana kakabwaia te Atua nakoia ake a okiri abaia man kataenikaiakiia. E katuruturuaki n te areru aei bwa a rangi ni kakawaki riki kakabwaia ni kaineti ma te onimaki nakon kakabwaia ni kaineti ma te rabwata. N te Areru 86, e butiia te Atua Tawita bwa e na kakawakinna ao ni kairiria. Te Areru 87, bon ibukin Tion ao te koraki ake a bungiaki iai, ao e a taorimwiaki n te tataro nakon Iehova n te Areru 88. Ana atataiaomata Iehova are e kaotaki n ana berita Tawita, ae katuruturuaki n te Areru 89, e oteaki iroun Etan, ae tao temanna mai buakoia mwaane aika wanawana aika aman ake a maiu n ana bong Toromon.—1 Uea 4:31.
A Kaekaaki Titiraki Aika Boto i Aon te Baibara:
73:9—A “kaki wiia i karawa, ao e nakonako neweia i aonaba” aomata aika buakaka, n te aro raa? Kioina ngkai akea ae a karinea i karawa ke i aon te aba aomata aika buakaka aikai, a rangi ni waekoa ngkanne ni kamatauningaa te Atua ni wiia. A kabuakakaia naba aomata n neweia.
74:13, 14—E ‘urua atuia raakon ake i taari ao ni kamaerikiriki atuia ribaietan’ n ningai Iehova? E atongaki “Barao ae uean Aikubita,” bwa “te rakon ae ababaki ae wewene i nukan ana karanga.” (Etekiera 29:3) E kona n tei te ribaietan ibukia ana aomata Barao aika korakora. (Taian Areru 74:14) Kamaerikirikian atuia, e bae n nanonaki iai konakiia ao tiringaia Barao ma ana taanga ni buaka ngke e kamaiuia tibun Iteraera Iehova man tautoronakia i Aikubita.
75:4, 5, 10—Tera nanon te taeka ae “koro”? Bon te bwai ni buaka ae rangi ni korakora koron te man. Mangaia are, e kaikonakaki te “koro” ma te mwaaka ke te korakora. E karietatai koroia ana aomata Iehova, are nanona bwa e karietataia, ao e ‘korokoroi koroia akana buakaka.’ Ti a kauringaki ibukini ‘karietatan korora nako eta’ bwa ti na kararoaa mairoura te kamoamoa ao te kainikatonga. Kioina ngkai bon taben Iehova karietatan temanna ma temanna, a riai ngkanne n taraaki mwioko i nanon te ekaretia bwa a roko mairouna.—Taian Areru 75:7.
76:10, BK—E na kanga n neboaki Iehova n “unin te aomata”? E ngae ngkai te Atua e aki tukiia aomata bwa a na un nakoira n taai tabetai, ma e kona ni karekea uaana ae raoiroi nakoira rimwi riki. A kona ni kaetaki aroarora n aanga tabeua imwin kaitaraan te kangaanga teuana. E kariaia kammarakara Iehova tii nakon are e na reke iai reireiara. (1 Betero 5:10) E katokaa nikiran unia aomata te Atua i aona. Ma tera ae ti na karaoia ngkana ti a kammarakaki ni karokoa ae ti mate? E kona ni kamoamoaki naba iai Iehova, ibukina bwa a kona ni moana kamoamoan te Atua te koraki ake a norira ni kakaonimaki n nanomwaaka nakon te mate.
78:24, 25; E aera ngkai e atongaki te manna bwa “amarakeni karawa” ao “aia amarake aomata aika korakora”? E aki nanonaki iai bwa te manna boni kanaia anera. Bon “amarekeni karawa” n te aro are e bon roko mai karawa. (Taian Areru 105:40) Kioina ngkai a maeka i karawa anera ke “aomata aika korakora,” nanon ngkanne te kibuntaeka ae “aia amarake aomata aika korakora,” bwa e katauraoaki iroun te Atua ae maeka i karawa. (Taian Areru 11:4) Tao e a tia naba Iehova ni kabonganaia anera ibukin katauraoan te manna ibukia tibun Iteraera.
82:1, 6—Antai aika atongaki bwa “atua” ao “natin Teuare Moan te Rietata”? E nanonaki n taeka akana uoua akanne, taani motiki-taeka aika aomata i Iteraera. E eti aei, kioina ngke a na riki bwa taan taetae ibukin te Atua ao taan tei ibukina.—Ioane 10:33-36.
83:2—Tera ae nanonaki n ae a “kaeka atuia” aomata? E nanonaki ni kakamwakuran te atu, tauraoin te aomata ni kaota mwaakana ke tauraoina ni karaoa te bwai teuana, ao n angiin te tai e kaota rawana, e un, ke e karawawataa te aomata.
Reireiara:
73:2-5, 18-20, 25, 28. Ti aki riai ni bakantang ni kaubwaia akana buakaka ao ni kakairi n aroaroia aika aki kakukureia te Atua. A tei aomata aika buakaka n te tabo ae kamaranran. A na ‘bwaka nakon te kabuanibwai.’ Irarikina, bon akea uaan ara kakorakora ni kamauna te buakaka kioina ngkai e aki kona ni kamaunaki te buakaka irouia taan tautaeka aika aki-kororaoi. Ti wanawana ngkana ti katotonga Ataba ngkana ti kaitaraa te buakaka ni “kaanian te Atua,” ao ni karekei kukureira n ara iraorao ma Ngaia ae kaan.
73:3, 6, 8, 27. Ti riai ni kawakinira man te kamoamoa, te kainikatonga ao te babakanikawai. E koaua aei, e ngae naba ngke e taraa n reke kabwaiara ni karaoan aaro aikai.
73:15-17. Ngkana e mangaongao ara iango, ao ti aki riai moa ni kaotii ara iango ake ti tuai ni mataata iai, nakoia aomata nako. E kona ni kabwarai nanoia aomata te “taetae n te aro aei.” Ti riai moa ni kananoi ara iango i aoni baika a katabeaiangaira ao n ibuokanibwai iai ma raora n onimaki ibukin aroni katokana.—Taeka N Rabakau 18:1.
73:21-24, BK. E katiteboaki rikiraken te kiriwe i nanora ni kaineti ma aroaroia aomata aika buakaka, ma aroia maan aika aki wanawana. E kauekeaki i bon irouna i nanora te namakin aei, ao e aki boto i aon iango aika riai. Ma ti riai ni kairaki n ana reirei Iehova, ao n onimakinna raoi bwa e na bon ‘taui baira’ ae te angaatai ao ni boutokaira. N ikotaki naba ma anne, e na ‘butimwaira n te mimitong’ Iehova, ae te iraorao ae kaan ma ngaia.
77:6. E riai kabanean ara tai ibukin te reirei ao kananoan ara iango i aoni baika ti reiakini, ngkana ti na kaota tabeakinan raoi ana koaua te Baibara ao n ukeuke n te aro ae riai. Ai kakawakira kamwawan ara tai teutana ibukin karaoan aei!
79:9. E ongoraei ara tataro Iehova ao riki ngkana a kaineti ma katabuan arana.
81:13, 16. Ti kona ni karekei kakabwaiara aika bati ngkana ti kakauongo nakoni bwanan Iehova ao n nakonako ni kawaina.—Taeka N Rabakau 10:22.
82:2, 5. E karika mwemwen “aan aonaba” te motiki-taeka ae buakaka. E urua korakoran te botannaomata te ribuaka.
84:1-4, 10-12. A katei banna ni katoto ibukira taan otei areru, n aroia ni karinea te tabo n taromauri ibukin Iehova ao raunnanoia ni mwiokoaia aika okoro.
86:5. Ai kakaitaura ngaira ngkai e ‘kani kabarai’ buure Iehova! E ukoukori bwaai aika kaotia bwa e raraoma ni koaua iai te tia bure Iehova, bwa e aonga ni kona n nanoangaia.
87:5, 6. Te koaua bwa a na atai araia te koraki ake a na kautaki nakon te maiu i karawa, te koraki ake a na maiu n te aonnaba ae Baretaiti? E kaotaki ni kiibu aikai bwa e kona n riki aei.
88:13, 14. Waeremwen kaekaan ara tataro ni kaineti ma ara kangaanga tabeua, e kona n nanonaki iai bwa e tangirira Iehova bwa ti na kaotiota tangirana ni koaua mai nanora.
“KATITUARAOIA, AO KARAOIROA ARANA”
Iangoi bukini kamoamoaan Iehova tabeua aika kakaokoro ake a taekinaki n te kaaua n itera n te boki ae Taian Areru. N te Areru 90, ao Mote e kaota iai okoron “te Uea ae aki totoki” ma maiun te aomata ae kimototo. (1 Timoteo 1:17) Ni kaineti ma Taian Areru 91:2, e taekina Iehova Mote bwa ‘nnena ni kamaiu ao ana nono’ are e boto mai iai kamanoana. Areru tabeua aika imwina riki, e taekinaki iai aroaron te Atua aika tamaroa, ana iango aika rietata riki ao ana mwakuri aika kamimi. Iai areru aika tenua aika moanaki n taeka aikai: “E uea Iehova.” (Taian Areru 93:1; 97:1; 99:1) E taekinaki Iehova iroun te tia areru bwa ara tia Karikiriki, ao e kaoira bwa ti na ‘katituaraoia, ao ni karaoiroa arana.’—Taian Areru 100:4.
E na kanga te tia tautaeka ae mamaaka Iehova n riai ni karaoi ana mwakuri? E kaekaaki te titiraki aei n Taian Areru 101 ae oteaki iroun te Uea ae Tawita. N te areru are imwina, e tuangira iai Iehova bwa e na “ongo aia tataro akana akea aia bwai, ao e aki ribai aia tataro.” (Taian Areru 102:17) E kairira te ka-103 n areru nakon ataakin ana akoi Iehova ae boto i aon te tangira ao ana nanoanga. E kakatonga te tia areru ao e taku ni kaineti ma ana karikibwai te Atua aika bati i aon te aba: “Iehova, ai bati ra am makuri! Ko kabane baikai ni karaoi n te rabakau.” (Taian Areru 104:24) E katituaraoaki Iehova ibukin ana mwakuri aika kamimi, n anene aika uoua akana taiani kabane n te Kaaua n Itera n te boki aei.—Taian Areru 105:2, 5; 106:7, 22.
A Kaekaaki Titiraki Aika Boto i Aon te Baibara:
91:1, 2—Tera “te tabo ae raba ae ana tabo Teuare Moan te Mwaka,” ao ti na kanga ni kona ni ‘maeka’ iai? Bon aei te taetae ni kaikonaki ibukin te tabo ni kamanomano ao ni mweeraoi, ae te aroaro ae ko a kamanoaki iai man uruakin am onimaki. E raba te tabo aei ibukina bwa e aki ataaki irouia ake a aki onimakina te Atua. Ti karika Iehova bwa nnera ni maeka ngkana ti onimakinna bwa nnera ni kamaiu ao ara nono, ao ngkana ti katituaraoia ngkai bwa boni ngaia te tia Tautaeka ae Rietata i aoni bwaai ni kabane, ao rinanon naba uarongorongoan te Tautaeka n Uea. Ti namakina nenen ara onimaki ibukina bwa ti ataia ae e tauraoi n taai nako Iehova ni buokira.—Taian Areru 90:1.
92:12—E na kanga ni “maiureirei te aomata ae raoiroi n ai aron te baam”? E rineaki te kai ae te baam ikai ibukina bwa a bati uaana. E katiteboaki te aomata ae raoiroi ma te kai ae te baam ibukina bwa e taraaki iroun te Atua bwa te aomata ae e ongeaba nakon ana tua ao e teimatoa n “uaa aika raraoi,” ae nanonaki iai naba mwakuri aika raraoi.—Mataio 7:17-20.
Reireiara:
90:7, 8, 13, 14. E aki toki n urua ara iraorao ma te Atua ae koaua ara mwakuri aika bure. A aki kona n raba ara bure aika ti karabai mairouna. Ma ngkana ti raraoma ni koaua ao ni kitani maiura aika bure, e na manga akoira iai Iehova, ike e nang ‘kanuaira n ana nanoanga.’
90:10, 12. Kioina ngkai a kimototo maiura, ti a riai ngkanne ni “wareki iai ara bong.” Ni kanga? Ni karekean “te nano ae wanawana,” ke ni kaotiotan te wanawana n te aro are a aikoa bakataeaki iai nikiran ara bong, ma a kamanenaki ibukini kakukureian Iehova. E kainnanoaki n aei, bwa ti na moanibwai tiara ni kaineti ma kakukureian te Atua ao n nakonako n aroia akana ataibwai.—I-Ebeto 5:15, 16; I-Biribi 1:10.
90:17. Ti riai n tataro nakon Iehova bwa e na “kamatoai aia makuri baira” ao ni kakabwaiai ara kekeiaki n te mwakuri ni minita.
92:14, 15. Ibukina bwa a botumwaaka kaara n reiakina Ana Taeka te Atua ao ni katoatai ni botaki ma ana aomata Iehova, a na teimatoa ngkanne n “uaa nako naba” ni baika a kakukureia te Atua, ao ni kakoauaki bwa taani buoka rikiraken te ekaretia.
94:19. E ngae naba ngkana tao tera ae karika ‘raraoman nanora,’ ma ti na kabebeteaki ni warekan te Baibara ao kananoan ara iango n ana “nanoanga.”
95:7, 8. Te kakauongo nakon ana reirei te Baibara, mutiakinana ao te nano ae ongeaba iai, e na totokoa rikiraken matoatoan nanora.—Ebera 3:7, 8.
106:36, 37. E kairekerekeaki ni kiibu aikai taromauriani boua ma te angakarea nakoia taimonio. E kaotaki iai bwa te aomata ae taromauri boua, e kona ni mena i aani mwaakan te taimonio. E kaumakira te Baibara ni kangai: “Kawakiningkami mani bouananti.”—1 Ioane 5:21, BK.
“Kam na Kamoamoa Iehova”
A kainaki areru aika tenua aika taiani kabane n te Kaaua n Itera n te boki ae Taian Areru, n taeka ni kaungaunga aikai: “Kam na kamoamoa Iehova.” E kaukaki te kabanea n areru n te itera aei n taeka akanne naba. (Taian Areru 104:35; 105:45; 106:1, 48) Ni koauana, a taekinaki taeka aika “kam na kamoamoa Iehova,” 19 te tai n te Kaaua n Itera n te boki ae Taian Areru.
Bon te koaua bwa a rangi ni mwaiti bukina aika ti riai ni kamoamoaa iai Iehova. Ti a tia n anganaki ara tai ae bati n Taian Areru 73 ni karokoa 106, bwa ti na iaiangoa raoi iai Tamara i karawa ao ni kabatiai ara kakaitau. A aki ngkanne anaaki nanora bwa ti na “kamoamoa Iehova” ma korakorara ni kabane, ngkana ti iangoi ana mwakuri ni kabane ake e a tia ni karaoi ibukira nakon taai aika a na roko?
[Taamnei n iteraniba 18]
Ti kona ni katotonga Ataba n tokanikai i aon te buakaka ngkana ti ‘kaanira riki ma te Atua.’
[Taamnei n iteraniba 19]
E a konaaki Barao i nanon Taari are Uraura
[Taamnei n iteraniba 19]
Ko ataia bwa e aera ngkai e aranaki te manna bwa “aia amarake aomata aika korakora”?
[Taamnei n iteraniba 21]
Tera ae buoka ‘raraomara’?