Onimakina Ana Taeka Iehova

“I onimakina am taeka.”​—TAIAN ARERU 119:42.

1. Tera ae ko kona n taekinna ibukin kinaakin ao aroaron te tia korea Taian Areru 119?

E KAKAWAKI ana taeka Iehova iroun te tia otea Taian Areru 119. Tao bon te nati-n-uea ngaia mai Iuta, are Etekia. Namakin aika kaotaki n te areru aei, a tonuraoi ma aroaron Etekia, are “e nimnimta Iehova” n ana tai n riki bwa uean Iuta. (2 Uea 18:3-7) Aei te bwai ae e kona raoi n taekinaki iai: E ataa kainnanoakin bwaai n taamnei te tia areru aei.​—Mataio 5:3.

2. Tera te boto n iango n Taian Areru 119, ao e kanga tein te areru aei?

² Te reirei teuana ae kakawaki ae kaotaki n Taian Areru 119, boni kakawakin ana taeka te Atua ke ana rongorongo.a Tao ibukin te bwai ni kauring, te tia korea te areru, e korea te areru aei ni karinani raoi manintaekaia (alphabet). Kibuna ni kabane ake 176 a karinani raoi manintaeka (alphabet) n te taetae n Ebera. N te taetae n Ebera nikawai, kanoan moani kibun mwakoron te areru aei ake 22 bon kiibu aika 8, ao a moanaki taekaia ni manintaeka aika titeboo. E nanonaki n aei ana taeka te Atua, ana tua, ana kauring, kawaina nako, ana kaetieti, ana moti, ana taeka n rabakau, ao ana reirei. N te kaongora aei ao n are imwina, ao e na maroroakinaki iai Taian Areru 119 ni kaineti ma te raitaeka ae eti raoi n te Baibara n Ebera. Iaiangoan bwaai aika riki ake a irekereke iai ana toro Iehova n taai ake ngkoa ao n taai aikai, e riai ni karaoiroa riki arora ni kakaitau ibukin te areru ae kairaki koreana aei. E riai naba ni karikirakea ara kakaitau ibukin ana Taeka te Atua ae te Baibara.

Ongo n Ana Taeka te Atua ao Kakatonga Iai

3. Kabwarabwaraa ao kaota te kabotau n ae e nanonaki n te moa n raoiroi.

³ E reke te kukurei ni koaua man irakin ana tua te Atua. (Taian Areru 119:1-8) Ngkana ti karaoa aei, e na taraira Iehova bwa a “moa n raoiroi” arora. (Taian Areru 119:1) Te moa n raoiroi, e aki nanonna bwa ti a kororaoi, ma e kaotia bwa ti kekeiaki mwaaka ni karaoa nanon Iehova. Noa bon te aomata ae “moan te eti arona i buakoia ana roro” ao “e nakonako . . . ma te Atua.” Te baatua ane kakaonimaki anne ao kaain ana utu, a kamaiuaki n tain te Ieka ibukina bwa a kaboraoa maiuia ma are e tangiria Iehova. (Karikani Bwaai 6:9; 1 Betero 3:20) Ti kona naba ni kamaiuaki man kamaunakin te waaki ae kaakaraoaki n te aonnaba aei, ngkana ti “botumwaka n tauu” ana tua te Atua. N te aro anne, ti karaoa iai nanona.​—Taian Areru 119:4.

4. E boboto i aon tera kukureira ao totokanikaira?

⁴ E na bon aki kitanira Iehova ngkana ti ‘katituaraoia n raoiroin te nano ao ngkana ti reirei ana moti.’ (Taian Areru 119:7, 8) Te Atua, e aki kitana te tia kairiia tibun Iteraera are Iotua, are e karaoa nanon te kaetieti ike e na wareware iai ni ‘bokin te tua ni ngaina ao ni bong, bwa e aonga ni kaakaraoi bwaai ni kabane aika koreaki i nanona.’ Anne are e a karekea totokanikaina ao ni kairia bwa e na mwakuri ma te wanawana. (Iotua 1:8) Ngke e a kaan tokin maiun Iotua, ao e teimatoa n neboa te Atua ao ni kauringia tibun Iteraera n aei: “Kam ataia i nanomi ni kabane ao n tamneimi ni kabane, ba bon akea te bwai teuana ae bwaka mai buakoni bwaai aika raraoi ni kabane ake E taekiningkami iai Iehova ae Atuami.” (Iotua 23:14) N aron Iotua ao te tia korea Taian Areru are 119, ti kona ni kukurei ma n totokanikai ngkana ti kamoamoaa Iehova ao onimakina ana taeka.

Ana Taeka Iehova E Kateimatoaira Bwa Ti na Itiaki

5. (a) Kaotia bwa e a kanga ni kona ni kateimatoaki itiakin ara onimaki. (b) Tera buokan te roro-n-rikirake ae e a tia ni karaoa te bure ae kakaiaki?

⁵ E kona n itiaki ara onimaki ngkana ti teimatoa ni kakairi n ana taeka te Atua. (Taian Areru 119:9-16) E boni koaua aei e ngae naba ngkana a aki kaota te katoto ae raoiroi iai ara karo. E ngae ngke bon te tia taromauri bouannanti taman Etekia, ma e “kaitiaka kawaina” Etekia man aia waaki beekan. Tera ae e na riki ngkana e karaoa te bure ae kakaiaki te roro-n-rikirake ae e beku iroun te Atua ni boong aikai? Te raraoma, te tataro, aia ibuobuoki ana karo, ao te buoka ae tatangira mairouia unimwaanen te ekaretia, a kona ni buokia bwa e na riki n aron Etekia ao ni ‘kaitiaki kawakina ma n tarataraia.’​—Iakobo 5:13-15.

6. Antai aine aika ‘kaitiakii kawaiia ao a tarataraiia ni kakairi n ana taeka te Atua’?

⁶ E ngae ngke a maiu Nei Raaba ma Nei Ruta n te tai ae maan imwain oteakin Taian Areru 119, ma a ‘kaitiaka kawaiia’ naba. Nei Raaba bon te aine ae kakabooaki ae kaaini Kanaan, ma e a riki n tanoata taekana ibukin ana onimaki bwa te tia taromauria Iehova. (Ebera 11:30, 31) Ainen Moaba are Nei Ruta, e kitania antina, e toro iroun Iehova, ao e nimtii ana Tua nako Iehova are e angania I-Iteraera. (Ruta 1:14-17; 4:9-13) Aine aika tiaki kaain Iteraera aika uoman aikai, a ‘tarataraiia ni kakairi n ana taeka te Atua,’ ao e reke kakabwaiakia ae kakukurei ae te riki bwa ana bakatibu Iesu Kristo.​—Mataio 1:1, 4-6.

7. E a kanga Taniera ao raona n roro-n-rikirake ake teniman ake kaain Ebera, ni katea te banna ni katoto ae tamaroa, ni kaineti ma kateimatoan itiakin te onimaki?

⁷ “E buakaka iangoan nanon te aomata man ana bong n ataei,” ma a kona rooro-n-rikirake ni kakairi n te kawai ae itiaki, e ngae naba ngke a mena n te aonnaba ae mangaongao aei ae tauaki i aan mwaakan Tatan. (Karikani Bwaai 8:21; 1 Ioane 5:19) Taniera ma raona n roro-n-rikirake ake teniman ake kaain Ebera ake a taenikai i Baburon, a ‘tarataraiia ni kakairi n ana taeka te Atua.’ N aron anne, a rawa ni kabarekaia “n ana amarake te uea ake a raraoi.” (Taniera 1:6-10) A kang amwarake aika aki-itiaki kaain Baburon ake a katabuaki kanakiia i aan te Tua Rinanon Mote. (Nakoaia Ibonga 11:1-31; 20:24-26) A aki kakatinakoi raraaia maan ake a tiringi ao a urua ana tua te Atua ibukin te raraa n aroia ni kang iriko aika iai raraaia i nanoia. (Karikani Bwaai 9:3, 4) Maroaka are a rawa iai kaain Ebera ake aman ni kana ana amwarake te Uea ake a kakangkang! Rooro-n-rikirake akana mamaaka te Atua akanne a kateimatoaa itiakin aia onimaki ao a katea iai te banna ni katoto ae tamaroa.

E Ibuobuoki Ana Taeka te Atua Nakon te Kakaonimaki

8. Tera ae ti riai ni karaoia ao te atatai raa ae ti kainnanoia, bwa ti aonga n ota raoi n ana tua te Atua ao ni maiuakinna?

⁸ Tangiran ana taeka te Atua, bon te bwai ae kakawaki ibukin kateimatoan ara kakaonimaki nakon Iehova. (Taian Areru 119:17-24) Ngkana ti katotonga aron te tia areru, ao e na korakora iroura tangiran te kan ota ni “bwaai aika kamimi” man ana tua te Atua. Ti na teimatoa n ‘tangira ana moti Iehova’ ao ni kaota ‘korakoran tangiran ana kauring.’ (Taian Areru 119:18, 20, 24, NW) Ngkana ti a tia ni katabua maiura nakon Iehova e ngae naba ngkana e aki rangi ni maan n nako, ma ti a tia ni “barua te rannimmamma ae e itiaki ae bain te tamnei”? (1 Betero 2:1, 2, BK) Ti riai n ota raoi n ana reirei te Baibara, bwa ti aonga ni kona n atatai n ana tua te Atua ao ni maiuakinna.

9. Tera ae ti riai ni karaoia ngkana iai te kauntaba i marenan ana tua te Atua ao aomata?

⁹ Ti kona n tangiri ana kauring te Atua, ma tera ae e na riki ngkana a taetae “uea” ni bukinira ni bwaai tabeua? (Taian Areru 119:23, 24) Ni boong aikai, a aki toki aomata aika tao iai mwaakaia ni kataia ni kairoroira bwa ti na moanibwai aia tua aomata nakon ana tua te Atua. Tera ae ti na karaoia, ngkana e riki te kauntaba i marenan karaoan nanoia aomata ao nanon te Atua? Korakoran tangiran ana taeka te Atua, e na buokira n teimatoa ni kakaonimaki nakon Iehova. Ti na kangai naba n aroia ana abotoro Iesu Kristo ake a bwainikirinaki: “E riai riki iran nanon te Atua nakon iran nanoia aomata.”​—Mwakuri 5:29.

10, 11. Kabwarabwaraa arora ni kona n teimatoa ni kakaonimaki nakon Iehova, i aan kataakira aika a rangi ni kakaiaki.

¹⁰ Ti boni kona ni kakaonimaki naba nakon Iehova i aan kataaki aika rangi ni kakaiaki n taai aika angabuaka ibukira. (Taian Areru 119:25-32) Ngkana ti na tokanikai ni kateimatoaa ara kakaonimaki nakon te Atua, ao e riai bwa ti na reireiaki ao ni botumwaaka n tataro ibukin ana kaetieti te Atua. Ti riai naba n “rinea te aro are te kakaonimaki.”​—Areru 119:26, 30.

¹¹ Etekia, are tao ngaia are e korea Taian Areru 119, e rinea naba “te aro are te kakaonimaki.” E karaoa aei e ngae ngke e otabwaniniaki irouia taan taromauri anti aika kewe, ao tao e a tia naba ni bwainingareaki irouia kaain ana auti te uea. E bae n ‘taonaki nanona n te rawawata’ ibukin te aroaro anne. (Taian Areru 119:28, BK) Ma e onimakina te Atua Etekia, ao e riki bwa te uea ae raoiroi, ao e karaoa “ae riai i matan Iehova.” (2 Uea 18:1-5) Ngkana ti mwiokoa te Atua ibukin buokara, ti kona naba n nanomwaaka ngkana e kataaki arora ni kakaonimaki.​—Iakobo 1:5-8.

E Kaninikoriaira Ana Taeka Iehova

12. Ti na kanga ngaira ni maiuakina ae taekinaki n Taian Areru 119:36, 37?

¹² Touan mwin ana taeka te Atua, e anganira te ninikoria are ti kainnanoia ibukin kaitaraan kataaki aika ti kaitiboo ma ngaai i nanoni maiura. (Taian Areru 119:33-40) Ti nanorinano n ukoukora ana kaetieti Iehova bwa ti aonga ni kateimatoaa tauan ana tua ‘n nanora ni kabane.’ (Taian Areru 119:33, 34) Ti titirakina naba te Atua n aron te tia areru ni kangai: “Raira nanou nakon am taeka, ao tiaki nakon te mataai ni kanibwaibwai,” ke te babakanikawai. (Taian Areru 119:36) Ti katotonga te abotoro Bauro, ni “kakaraoa ae raoiroi nakoni bwaai ni kabane.” (Ebera 13:18) Ngkana e tangiria te tia kammwakuri bwa ti na babakanikawai, ao ti ninikoria n nimtii ana kaetieti te Atua, ao e na aki toki ni kakabwaiaira Iehova ibukin ara mwakuri anne. E boni buokira bwa ti na taotaon nanora man iaiangoan baika bubuaka. Mangaia are ti bia tataro ni kangai: “Ko na katannakoi matau man noran te bwai ae akea manena.” (Taian Areru 119:37) Ti bia aki tangiria n iangoi baika akea manenaia iroun te Atua bwa a manena. (Taian Areru 97:10) Kani karaoan anne e na buokira bwa ti na rarawa nakon bwaai aika mwaiti, n ikotaki ma matakuakinan taamnei aika bwaitingako, ao ai te tabunea n aekana nako.​—1 I-Korinto 6:9, 10; Te Kaotioti 21:8.

13. E a kanga n reke te ninikoria irouia ana reirei Iesu ake a bwainikirinaki, ae te bwai ae a kainnanoia ibukin tataekinan te rongorongo n aki maaku?

¹³ Te atatai ae eti ibukin ana taeka te Atua, e kananomatoaira bwa ti na tataekina te rongorongo ma te ninikoria. (Taian Areru 119:41-48) Ao ti kainnanoa te ninikoria bwa ti na ‘kaeka iai ane e taetaebuakaira.’ (Taian Areru 119:42) N tabetai, ti kona ni katotongia ana reirei Iesu ake a bwainikirinaki, ake a tataro ni kangai: “Te Uea [Iehova], . . . Ko na angania am toro te taekina am taeka n aki maku teutana.” Tera mwina? “A bane ni kaonaki n te Tamnei are Raoiroi, ao a tataekina ana taeka te Atua n aki mamaku.” Te Uea ae Moan te Mwaaka aei e na angira te ninikoria n taekina ana taeka n aki maaku.​—Mwakuri 4:24-31.

14. Tera ae e buokira n ninikoria n uarongorongo n aron raoi are e karaoia Bauro?

¹⁴ E na reke iroura te ninikoria are ti kainnanoia n tataekina te rongorongo n akea maakan te maamaa, ngkana ti iangoa “te taeka ae koaua,” ao ni ‘kawakin ana tua te Atua n aki totoki.’ (Taian Areru 119:43, 44) Te botumwaaka n nenera ana Taeka te Atua, e kataubobongaira bwa ti na ‘tataekina ana taeka i mataia ueea.’ (Taian Areru 119:46) Te tatataro n ikotaki ma taamnein Iehova, a na buokira n taekin bwaai aika eti n te aro ae riai. (Mataio 10:16-20; I-Korote 4:6) E ninikoria Bauro n taekina ana kauring te Atua nakoia taan tautaeka n te moan tienture. N te katoto, e uarongorongo nakon te Kowana n Rom are Berika, are e “ongora i rouna n taekan onimakinani Kristo.” (Mwakuri 24:24, 25) E uarongorongo naba Bauro nakon te Kowana ae Beteto ao te Uea are Akeriba. (Mwakuri 25:22–​26:32) Man ana boutoka Iehova, ti kona naba n ninikoria n uarongorongo, ao n “aki maamaa n te euangkerio.”​—I-Rom 1:16.

E Kabebetei Nanora Ana Taeka te Atua

15. E na kanga ana Taeka te Atua ni kabebetei nanora ngkana a kaenaenaira tabeman?

¹⁵ Ana Taeka Iehova e karekea kabebetean nanora. (Taian Areru 119:49-56) Iai taai ake ti rangi ni kainnanoa iai kabebetean nanora. E ngae ngke ti ninikoria n taekina te rongorongo ngkai Taani Kakoauaa Iehova ngaira, ma aomata aika “kainikatonga,” ake a kakarabakauia nakon te Atua, a ‘kabatiaa kaenaenakira’ n tabetai. (Taian Areru 119:51) Ma ngkana ti tataro, ao ti kona n uring bwaai aika kakukurei aika taekinaki n ana Taeka te Atua, ao ni ‘kunea kabebetean nanora.’ (Taian Areru 119:52) N te tai are ti kaotii iai nanora n ara tataro, ti kona n uringa te tua man te Baibara ke te boto-n-reirei are e na anganira kabebetean nanora ma te ninikoria are ti kainnanoia ibukin kaitaraan rawawatara.

16. Tera ae a aki karaoia ana toro te Atua e ngae ngke a bwainikirinaki?

¹⁶ Aomata aika kainikatonga ake a bwainingarea te tia areru, bon I-Iteraera, ake kaain te natannaomata ae e katabuaki nakon te Atua. Ai boni kamaamaa ra aroia anne! Ti na aki katotongia ma ti bia kaiangomwaakaira bwa ti na aki kitana ana tua te Atua. (Taian Areru 119:51) Ngke a bwainikirinaki rimoa ana toro te Atua aika ngaa ma ngaa mwaitiia irouia taian Nazi, ao a a tia n rawa ni kitana ana tua te Atua ma ana boto-n-reirei ake a kuneaki n Ana Taeka. (Ioane 15:18-21) Ao tiaki te bwai ae rawawata te aantaeka nakon Iehova, bwa ana tua nako a riki bwa ai aron katangitang aika kabebetei nanora.​—Taian Areru 119:54; 1 Ioane 5:3.

Kakaitau Ibukin Ana Taeka Iehova

17. Te kakaitau ibukin ana taeka te Atua, e kairira bwa ti na karaoa tera?

¹⁷ Ti kaota ara kakaitau ibukin ana Taeka te Atua rinanon maiuakinana. (Taian Areru 119:57-64) E berita te tia areru bwa e ‘na tauu ana taeka Iehova,’ ao ‘e teirake n nukanibong ni katituaraoia ibukin ana moti aika raraoi.’ Ngkana ti uti n te tairiki, ao ai reke ra riki ara tai ni kaota ara kakaitau nakon te Atua n te tataro! (Taian Areru 119:57, 62) Ara kakaitau ibukin ana taeka te Atua, e kairira bwa ti na ukoukora ana reirei te Atua ao e na kakimwareireira bwa ti na riki bwa ‘raoia akana maaka Iehova.’ Raao aikai bon aomata ake a karinea te Atua. (Taian Areru 119:63, 64) Antai ae e kona n reke irouna te iraorao ae raoiroi riki n te aonnaba aei?

18. Tera aron Iehova ni kaekai ara tataro ngkana ‘ti niniraki n aia bwai ni kabaebae aomata aika buakaka’?

¹⁸ Ngkana ti tataro ma nanora ni koaua ao n nanorinano ni butiia Iehova bwa e na reireinira, ti ‘butiia iai akoara.’ Ti kainnanoa riki te tataro ngkana ‘ti niniraki n aia bwai ni kabaebae aomata aika buakaka.’ (Taian Areru 119:58, 61) E kona Iehova ni korea nako aia bwai ni kabaebae te koraki ake a riribaira, ao ni kainaaomataira ibukin te mwakuri n uarongorongoa te Tautaeka n Uea ao te mwakuri ni karekeia taan rimwin Kristo. (Mataio 24:14; 28:19, 20) E a tia n nonoraki aei n aaba ike e a tia iai ni katokaki ara mwakuri.

Onimakina Ana Taeka te Atua

19, 20. E a kanga ni ‘manena te karawawataki’?

¹⁹ Onimakinan te Atua ao ana Taeka e buokira n nanomwaaka i aan kataakira ao ni karaoan nanona. (Taian Areru 119:65-72) E ngae ngke a a tia aika kainikatonga n ‘otea te kewe ni bukinna iai,’ ma e anene ni kangai te tia areru: “E manena i rou ngke I karawawataki.” (Taian Areru 119:66, 69, 71) E na kanga n iangoaki bwa e raoiroi karawawatakia ana toro Iehova?

²⁰ Ngkana ti kataaki, ti boni botumwaaka ni butiia Iehova n te tataro, ao anne are e kaanira riki ma ngaia. Ti kona ni kabanea riki ara tai n nenera ana Taeka te Atua ao ni kakorakoraira riki ni maiuakina nanona. Aei are e a karekea te kakukurei ni maiura. Ma ngkana ti kataaki, ao tera ae e na riki ngkana ti kaotii anua aika aki-tangiraki n aron te aki-taotaonakinnano ao te nanorieta? Man ara botumwaaka n tataro ao ana ibuobuoki ana Taeka te Atua ma taamneina, ti kona iai ni kaaitarai anua aika aki-tangiraki aikai ao “ni karina te aomata nabangkai.” (I-Korote 3:9-14) Irarikin naba anne, e kakorakoraki ara onimaki ngkana ti nanomwaaka i aan te kataaki. (1 Betero 1:6, 7) E kakabwaiaki Bauro ni karawawatakina ibukina bwa a kairia bwa e na mwiokoa riki Iehova. (2 I-Korinto 1:8-10) Ti kariaia karawawatakira bwa e na karekea mwina ae raoiroi nakoira?

Onimakina Iehova n Taai Nako

21. Tera ae e riki ngkana e kamamaaia ake a kainikatonga te Atua?

²¹ Ana taeka te Atua e anganira bukina ae riai bwa ti na onimakina Iehova. (Taian Areru 119:73-80) Ngkana ti onimakina raoi ara tia Karikiriki, ao akea bukina ae ti na maamaa iai. Ma ibukin bwaai ake a karaoi tabeman, ti kainnanoa ngkanne te kabebeteaki ao n tangiria n tataro ni kangai: “Ke a maamaa akana kainikatonga.” (Taian Areru 119:76-78) Ngkana e kamaamaaia te koraki aikai Iehova, a kateretereaki aia buakaka nakoia, ao e karineaki iai arana ae tabu. Ti kona ni kakoauaa bwa taani bwainikirinia ana aomata te Atua, bon akea kabwaiaia ae e kona n reke. N te katoto, a bon tuai ni kona rimoa, ao a na bon aki kona naba nakon taai aika imwaira ni kamaunaia Ana tia Kakoaua Iehova aika onimakina Iehova ma nanoia ni koaua.​—Taeka N Rabakau 3:5, 6.

22. N te aro raa are e riki iai te tia areru bwa kanga “te batoro ae kunin te man i nanon te bubu”?

²² Ngkana ti bwainikirinaki, ao e kakorakoraki onimakinan te Atua iroura man ana taeka. (Taian Areru 119:81-88) Ibukin bwainikirinan te tia areru irouia ake a kainikatonga, ao e namakinna bwa kanga e “riki n ai aron te batoro ae kunin te man i nanoni bubun te ai.” (Taian Areru 119:83, 86) N taai ake e koreaki iai te Baibara, ao a karaoaki bwatoro man kunin maan bwa a na tau raan ake i nanoia, wain, ao aeka n ran riki tabeua. Ngkana a aki kabonganaki bwatoro aikai, ao a na kai rukurukumaki ngkana a katineaki ni kaaniaki ma te ai n te ruu ae akea iai nnen te bubu n otinako. Te koaua bwa te kataaki ke te bwainikirinaki e kairiko bwa ko na namakinna bwa ko a “riki n ai aron te batoro ae kunin te man i nanoni bubun te ai”? Ngkana ngaia anne, ao onimakina Iehova ao tataroakina aei: “Kamaiuai n ai aron am atataiaomata; ao N na taua ana taeka wim.”​—Taian Areru 119:88.

23. Tera ae ti a tia n rinanona ngkai man Taian Areru 119:1-88, ao tao tera ae ti riai n titirakinira iai, ngkana ti kariaa te tai ae ti na nenera iai Taian Areru 119:89-176?

²³ Reirei ake ti a tia n rinanoi ni moan iteran Taian Areru 119, a kaotia bwa e atataiaomata Iehova nakoia ana toro ibukina bwa a onimakina ana taeka ao a rangi n tangiri ana kaetieti, ana kauring, ana moti, ao ana tua. (Taian Areru 119:16, 47, 64, 70, 77, 88) E kakukureiaki irouia te koraki ake a taromauria, ao a teimatoa n tau ana taeka. (Taian Areru 119:9, 17, 41, 42) Ngkai ko kakaantaningaa te tai are ko na nenera iai nikiran te areru ae tamaroa aei, ao tao ko kona n titirakiniko ni kangai, ‘I boni kariaia ana taeka Iehova bwa e na kaotaa kawaiu?’

[Kabwarabwara ae nano]

Tera Arom ni Kaeka?

• Tera ae e boboto i aona kukureira?

• E kanga ana taeka Iehova ni kaitiaki ara onimaki?

• N te aro raa are e kaninikoriaira iai ana taeka te Atua ao e kabebeteira?

•Bukin tera bwa ti riai n onimakina Iehova ao Ana taeka?