Boutokaan te Tautaeka n Uea​—Katean Taabo n Taromauri ao te Ibuobuoki n Tain te Rawawata

E RANGI ni bure matam ngke ko a nakonako i nanon am Tabo n Taromauri. Ko a kamani kaakakatonga ibukin te tabo aei. Tao iai naba taai aika kakukurei ake ko ururingi, ngke ko buoka kateana tabeua te ririki n nako. Ma te bwai ae ko a rangi ni kakatonga riki iai ngkai, bwa e a onikaki te Tabo n Taromauri aei nakon te tabo n ibuobuoki. Imwin te angibuaka ae e a tibwa riki ike e a iekaki iai am aono ma n urubekebeke, ao e a waekoa te Komete n te Aobiti n Tararua ni bairea angani karekeani kanaia naake a rotakibuaka n te kabuanibwai, kunnikaia, te ran ae itiaki, ao ibuobuoki riki tabeua. A barongaaki raoi anganano ibukini bwaai n ibuobuoki. A a uarurung n roko taari mwaane ao aine n anai baike a kainnanoi, ao n angin te tai a boni waanako rannimataia ibukini kimwareireia.

E taku Iesu bwa kanikinaeaia ana aomata ae rianako, bon aia itangitangiri i marenaia. (Ioa. 13:34, 35) N te mwakoro aei ao ti na nora aroni kaotiotan te tangira ni Kristian rinanon taiani mwakuri ni kateitei ao te mwakuri n ibuobuoki ae karaoaki irouia Ana tia Kakoaua Iehova. Te aeka n tangira aei bon te bwai ni kakoaua ae e aki kona ni kakeweaki bwa ti a mena i aan ana kairiri ana Tautaeka n Uea Iesu.